Numbers Chapter 15 - Paipera Tapu 1868 | Te Paipera Tapu 1868

Numbers Chapter 15 - Paipera Tapu 1868

1
A i korero ano a Ihowa ki a Mohi, i mea.
2
Korero atu ki nga tamariki a Iharaira, mea atu ki a ratou, E tae koutou ki te whenua e noho ai koutou, ki taku e hoatu ai ki a koutou,
3
A ka mea i te whakahere ahi ki a Ihowa, i te tahunga tinana, i te patunga tapu ranei hei whakamananga mo te ki taurangi, i te whakahere tuku noa ranei, i a koutou hakari nui, hei whakakakara reka ki a Ihowa, he mea no nga kau, no nga hipi ranei:
4
Na, me kawe mai tana whakahere e te kai whakahere ki a Ihowa he whakahere toto-kore, te wahi whakatekau o te paraoa, he mea konatunatu ki te wahi whakawha o te hine hinu.
5
Kia rite mai ano hoki i a koe te wahi whakawha o te hine waina, hei ringihanga, hei kinaki mo te tahunga tinana, mo te patunga tapu ranei, mo te reme kotahi.
6
Ki te mea he hipi toa, kia rite mai i a koe hei whakahere toto-kore nga wahi whakatekau e rua o te paraoa, he mea konatunatu ki te wahi whakatoru o te hine hinu.
7
Me whakahere ano hoki e koe te wahi whakatoru o te hine waina hei ringihanga, hei kakara reka ki a Ihowa:
8
I nga wa ano hoki e meatia ai e koe he puru, hei tahunga tinana, hei patunga tapu ranei, ina whakamana he kupu taurangi, hei whakamarietanga ranei ki a Ihowa:
9
Na, me kawe tahi mai ano e ia me te puru, hei whakahere toto-kore, kia toru nga wahi whakatekau o te paraoa, he mea konatunatu ki te hawhe o te hine hinu.
10
Me kawe mai ano e koe te hawhe o te hine waina hei ringihanga, hei whakahere ahi, hei kakara reka ki a Ihowa.
11
Kia penei te meatanga mo te puru kotahi, mo te hipi toa kotahi, mo te reme, mo te kuao koati.
12
Kia rite ki te maha o a koutou e tuku ai ta koutou e mea ai ki tetahi ki tetahi, kia rite tonu ki te maha o ratou.
13
Kia penei te meatanga a nga tangata whenua katoa i enei mea, ina whakahere i te whakahere ahi, hei kakara reka ki a Ihowa.
14
Ki te noho ano hoki i a koe he manene, he aha noa atu ranei, i roto i a koutou i o koutou whakatupuranga, a ka mea kia whakahere i te whakahere ahi, i te kakara reka ki a Ihowa; kia rite tana e mea ai ki ta koutou e mea ai.
15
Kia kotahi ano te tikanga ma koutou ma nga mea o te whakaminenga, ma te manene ano hoki e noho noa ana, hei tikanga puta noa i o koutou whakatupuranga: kia pera ano me koutou te manene i te aroaro o Ihowa.
16
Kia kotahi ano te ture kia kotahi ano hoki te ritenga mo koutou, mo te manene hoki e noho ana i a koutou.
17
A i korero ano a Ihowa ki a Mohi, i mea,
18
Korero atu ki nga tamariki a Iharaira, mea atu ki a ratou, E tae koutou ki te whenua e kawea atu nei koutou e ahau ki reira,
19
Na, e kai koutou i te taro o te whenua, me whakahere e koutou he whakahere hapahapai ki a Ihowa.
20
Me whakahere he keke no ta koutou paraoa pokepoke mataati hei whakahere hapahapai: kia rite ki te whakahere hapahapai o te patunga witi ta koutou hapahapainga i taua mea.
21
Me hoatu e koutou tetahi wahi o ta koutou paraoa pokepokenga mataati ki a Ihowa, hei whakahere hapahapai, puta noa i o koutou whakatupuranga.
22
A ki te mea kua pohehe koutou, a kihai i rite i a koutou enei whakahaunga katoa i korerotia nei e Ihowa ki a Mohi,
23
Ara, nga mea katoa i whakahaua mai ai koutou e Ihowa, i whakapuakina mai hoki e Mohi, o te ra ano i whakahau ai a Ihowa, a, tuku iho ki o koutou whakatupuranga;
24
Ko reira, ki te meatia tetahi mea, he pohehetanga hoki, a e ngaro ana nga kanohi o te whakaminenga, na me whakahere e te whakaminenga katoa tetahi puru kuao hei tahunga tinana, hei kakara reka ki a Ihowa, me tona whakahere toto-kore, me tona ringihanga; kia rite ki te tikanga, kia kotahi hoki kuao koati hei whakahere hara.
25
A ka mea whakamarietanga te tohunga mo te whakaminenga katoa o nga tamariki a Iharaira, a ka murua to ratou he; he pohehetanga hoki: a me kawe mai e ratou ta ratou whakahere, hei whakahere ahi ki a Ihowa, me ta ratou whakahere hara, ki te aroaro o Ihowa, mo to ratou pohehetanga:
26
A ka murua taua he o te whakaminenga katoa o nga tamariki a Iharaira, o te manene ano hoki e noho ana i roto i a ratou: no te mea i pohehe katoa te iwi.
27
Ki te pohehe ano hoki tetahi wairua, a ka hara, na me kawe mai e ia he koati uha, ki te tau-tahi, hei whakahere hara.
28
A me mea whakamarietanga te tohunga mo te wairua i hara pohehe, ina hara pohehe ia ki te aroaro o Ihowa, hei mea whakamarietanga mona; a ka murua tona he.
29
Kia kotahi ano ta koutou ture mo te tangata i hara pohehe, mo te tangata whenua o nga tamariki a Iharaira raua ko te manene e noho ana i roto i a ratou.
30
Ko te wairua ia, i whakakake tana mahi, ahakoa tangata whenua, manene ranei, he whakahe tana i a Ihowa; a ka hatepea atu taua wairua i roto i tona iwi.
31
Mona i whakahawea ki te kupu a Ihowa, i whakataka hoki i tana whakahaunga, ka tino hatepea atu taua wairua; ka mau tana kino ki runga ki a ia.
32
A i nga tamariki a Iharaira i te koraha, ka kitea tetahi tangata e kohikohi rakau ana i te ra hapati.
33
Na, ka kawea ia e nga tangata i kitea ai ia e kohikohi ana i nga rakau, ki a Mohi ratou ko Arona, ko te whakaminenga katoa.
34
Na, hoatu ana ia e ratou kia tiakina, no te mea kahore ano i whakaaturia mai me aha ia.
35
A ka mea a Ihowa ki a Mohi, Me whakamate rawa tena tangata: ma te whakaminenga katoa ia e aki ki te kohatu ki waho o te puni.
36
Na, kawea atu ana e te whakaminenga katoa ki waho o te puni, a akina ana ki te kohatu, a ka mate, i peratia ano me ta Ihowa i whakahau ai ki a Mohi.
37
A i korero ano a Ihowa ki a Mohi, i mea,
38
Korero atu ki nga tamariki a Iharaira, mea atu ki a ratou kia hangā etahi kurupatu ma ratou, mo nga pito a o ratou kakahu, puta noa i o ratou whakatupuranga, kia karapitia hoki e ratou te kurupatu o te pito ki te miro puuru:
39
A ka waiho hei kurupatu ma koutou, mo ta koutou titiro iho ki taua mea, na ka mahara ki nga whakahaunga katoa a Ihowa, a ka mahia e koutou; kei rapu koutou i ta o koutou ngakau, i ta o koutou kanohi, ara i nga mea e whaia atu nei, e puremutia atu nei e koutou:
40
Kia mahara ai koutou ki te mahi i aku whakahaunga katoa, kia tapu ai hoki ki to koutou Atua.
41
Ko Ihowa ahau, ko to koutou Atua i whakaputa mai nei i a koutou i te whenua o Ihipa, kia waiho ai hei Atua mo koutou: ko Ihowa ahau ko to koutou Atua.