- 1
- Na, ka korero mai a Ihowa ki a Mohi, ka mea,
- 2
- Korero atu ki nga tamariki a Iharaira, tangohia mai ano hoki he tokotoko i tenei tangata i tenei tangata o ratou, kia rite ki nga whare o o ratou mātua, me tango i o nga ariki katoa o nga whare o o ratou mātua, kia kotahi tekau ma rua nga tokotoko: me tuhituhi e koe te ingoa o tenei o tenei ki tona tokotoko.
- 3
- Me tuhituhi ano hoki e koe te ingoa o Arona ki te tokotoko o Riwai: kia kotahi te tokotoko mo te upoko o te whare o o ratou matua.
- 4
- Ka whakatakoto ai ki roto ki te tapenakara o te whakaminenga ki mua mai o te whakaaturanga, ki te wahi e tutaki ai ahau ki a koutou.
- 5
- Na, ko te tangata e whiriwhiri ai ahau, ka pihi tana tokotoko, a ka whakamutua e ahau te puta ake ki a au o te amuamunga a nga tamariki a Iharaira, e amuamu nei ratou ki a korua.
- 6
- Na, ka korero atu a Mohi ki nga tamariki a Iharaira, a homai ana e o ratou ariki katoa ki a ia, kotahi tokotoko e tenei ariki, kotahi tokotoko e tenei ariki, rite tonu ki nga whare o o ratou mātua, kotahi tekau ma rua nga tokotoko: a i roto ano i o ratou tokotoko te tokotoko o Arona.
- 7
- A whakatakotoria atu ana nga tokotoko a Mohi ki te aroaro o Ihowa ki roto ki te tapenakara o te whakaaturanga.
- 8
- A i te aonga ake, na, ka haere a Mohi ki te tapenakara o te whakaaturanga; e! kua pihi te tokotoko o Arona, to te whare hoki o Riwai, kua wana, kua rapupuku, kua kohera hoki nga puawai, a kua hua nga aramona.
- 9
- Na, kawea mai ana e Mohi nga tokotoko katoa i te aroaro o Ihowa ki nga tamariki katoa a Iharaira: a tirohia iho ana e ratou, tangohia ana hoki e ratou tona tokotoko tona tokotoko.
- 10
- Na, ka mea a Ihowa ki a Mohi, Whakahokia mai te tokotoko o Arona ki mua i te whakaaturanga, kia tiakina, hei tohu ki te hunga tutu; kia whakamutua rawatia ai e koe te putanga ake o a ratou amuamunga ki a au, kei mate ratou.
- 11
- A peratia ana e Mohi, rite tonu ki ta Ihowa i whakahau ai ki a ia tana i mea ai.
- 12
- Na, ko te meatanga mai a nga tamariki a Iharaira ki a Mohi, Nana, ka mate matou, ka ngaro matou, ngaro katoa.
- 13
- Ki te whakatata tetahi tangata ki te tapenakara o Ihowa, ka mate: kia poto ranei matou ki te mate?
Address: 
Phone: 
Email: