Proverbs Chapter 27 - Paipera Tapu 1868 | Te Paipera Tapu 1868

Proverbs Chapter 27 - Paipera Tapu 1868

1
Kei whakamanamana koe ki te rangi apopo; e kore hoki koe e mohio ko te aha e puta mai i roto i te ra.
2
Ma te tangata te whakamoemiti mou, kaua tou mangai ake, ma te tangata ke, kaua ou ngutu.
3
E taimaha ana te kohatu, e taimaha ana ano te onepu; taimaha rawa ia i a raua te riri a te whakaaro-kore.
4
He mea nanakia te riri, he rutaki te aritarita; ko wai ia e tu ki mua i te hae?
5
Te riri matanui i te he, engari tera i te aroha huna.
6
Nga patu a te hoa aroha he mea na te pono, hono tonu ia nga kihi a te hoa riri.
7
He wairua i makona ka ngarurutia e ia te honi e maturuturu ana; he wairua e hiakai ana, reka kau nga mea kawa katoa.
8
Rite tonu ki te manu e atiutiu noa atu ana i tona kohanga te tangata e atiutiu noa atu ana i tona wahi.
9
He whakahari ngakau te hinu me te whakakakara; me nga ahuareka ano hoki o tona hoa, ara, nga tikanga e whakatakotoria mai ana e tona ngakau.
10
Kei whakarerea e koe tou hoa aroha, me te hoa ano o tou pāpā, kaua ano hoki e haere ki te whare o tou tuakana i te ra i mate ai koe: engari rawa te hoa i tata i te tuakana i tawhiti.
11
E taku tamaiti, kia nui ou whakaaro, a ka koa toku ngakau, ka whakahoki kupu ano hoki ahau ki te hunga e tawai ana ki a au.
12
Te tangata tupato, ka kitea atu e ia te he, a piri ana; nga kuare, haere tonu atu, mamae tonu atu.
13
Tangohia te kakahu o te kai whakakapi mo te tangata ke; tona taunaha ano hoki mo ta te wahine ke.
14
Te tangata e maranga ana i te atatu, he nui ano tona reo ki te manaaki i tona hoa, ka kiia tana he kanga.
15
He maturuturu e puputu tonu ana i te rangi ua, he wahine ngangare, rite tonu raua.
16
Ka taea ia te huna, ka hunā ano te hau, me te hinu ano i tona ringa matau e whakaatu nei i a ia.
17
Ko te rino hei whakakoi mo te rino, me te tangata ano hoki hei whakakoi i te mate o tona hoa.
18
Te kai tiaki o te piki, ka kai ano ia i ona hua: ka whakahonoretia ano hoki te tangata e whakaaro ana ki tona rangatira.
19
I te wai e rite ana te kanohi ki te kanohi; ka pena ano to te tangata ngakau ki to te tangata.
20
Te reinga, te whakangaromanga, e kore e makona; e kore ano nga kanohi o te tangata e makona.
21
Mo te hiriwa ko te oko tahu para, mo te koura ko te oumu; mo te tangata ko te mangai e whakamoemiti ana ki a ia.
22
Ahakoa i tukia e koe te whakaaro-kore ki te tuki ki te kumete, i roto i te witi, e kore tona whakaaro-kore e riro.
23
Kia ata mohiotia e koe te ahua o o hipi; anga atu tou ngakau ki nga kahui;
24
E kore hoki nga taonga e mau tonu; e tuturu tonu ianei te karauna, a tera whakatupuranga tera whakatupuranga?
25
Ka puta te tarutaru, e kitea ana te tupu hou, a e kohikohia ana nga otaota o nga maunga:
26
Hei mea kakahu mou nga reme, a hei utu nga koati mo te mara;
27
Ka nui ano te waiu koati hei kai mau, hei kai ma to whare, hei oranga ano hoki mo o kotiro.