- 1
- Te tangata he maha nei nga riringa i tona he, a ka whakapakeke i tona kaki, e kore e aha ka whatiia ia, tē taea te rongoa.
- 2
- Ka whakanuia te hunga tika, ka koa te iwi; ka kingi te tangata kino, ka aue te iwi.
- 3
- Te tangata e pai ana ki te whakaaro nui, ka koa tona pāpā; te hoa ia o nga wahine puremu, he maumau taonga tana.
- 4
- Ma te whakarite whakawa a te kingi e mau ai te whenua, ka he ia i te tangata e tango ana i nga mea homai noa.
- 5
- Te tangata e whakapati ana ki tona hoa, he whakatakoto tana i te kupenga mo ona waewae.
- 6
- Ka ai te he o te tangata kino hei rore; te tangata tika ia he waiata tana, he koa.
- 7
- Te tangata tika, e maharatia ana e ia te whakawa a nga rawa-kore; te tangata kino, kahore ana meatanga ake kia mohiotia e ia.
- 8
- Ma nga tangata whakahi ka mahangatia ai te pa, ta te hunga whakaaro nui ia, he whakatahuri atu i te riri.
- 9
- Ki te totohe te tangata whakaaro nui ki te tangata whakaaro-kore, ahakoa rupahu, ahakoa kata, kahore he mutunga.
- 10
- Te hunga whakaheke toto, e mauahara ana ratou ki te tangata i te ngakau tapatahi: te hunga tika ia ka whai ratou kia whakaorangia.
- 11
- E whakaputaina mai ana e te wairangi tona ngakau katoa; ta te whakaaro nui ia he pehi mo a muri.
- 12
- Te rangatira e whakaaro ana ki nga korero teka, he kino katoa ana tangata.
- 13
- E tutakitaki ana te rawa-kore raua ko te tangata tinihanga ki a raua; ko Ihowa te kai whakamārama o nga kanohi o raua tokorua.
- 14
- Te kingi, he pono nei tana whakarite whakawa mo nga rawa-kore, ka whakapumautia tona torona, a ake, ake, ake.
- 15
- Te whiu, te riri i te he, he mea homai era i te whakaaro nui: tera ko te tamaiti i waiho noa ka whakama i a ia tona whaea.
- 16
- Ka tokomaha te hunga kino, ka nui te he: ka kite ia te hunga tika i to ratou takanga.
- 17
- Riria te he o to tamaiti, a ka ai hei whakaokioki i a koe; he ahuareka ano hoki nga mea e homai e ia ki tou wairua.
- 18
- Ki te kahore he whakakitenga, ka he te iwi; te kai pupuri ia o te ture, ka hari ia.
- 19
- Ehara te kupu i te mea hei riri mo te he o te pononga; e matau ana hoki ia, a e kore e whakahokia mai te kupu.
- 20
- Ka kite ranei koe i te tangata e porangi ana ki te korero? Ki ta te whakaaro ka rahi ake ta te wairangi mahi i tana.
- 21
- Ki te mea he whakatarapi nga tikanga i whakatupuria ai te pononga i tona tamarikitanga, i tona mutunga iho ka waiho ia hei tamaiti tupu.
- 22
- He whakaoho whawhai ta te tangata riri; he nui hoki te he o te tangata aritarita.
- 23
- Ka whakaititia iho te tangata e te whakapehapeha; ka tautokona ake ia te wairua whakakake-kore e te honore.
- 24
- Ki te uru te tangata ki ta te tahae, e kino ana ia ki tona wairua; e rongo ana ia i te kanga, heoi kahore e whakaaturia e ia.
- 25
- Ka ai te wehi tangata hei rore: te tangata ia e whakawhirinaki ana ki a Ihowa ka whakanekehia ake.
- 26
- He tokomaha e whai ana kia paingia mai e te rangatira; na Ihowa ia te whakarite whakawa mo te tangata.
- 27
- He mea whakarihariha ki te hunga tika te tangata whakahaere he; he mea whakarihariha ano hoki ki te tangata kino te tangata e tika ana tona ara.
Address: 
Phone: 
Email: