- 1
- (Ki te tino kai whakatangi Hohanimi. Na Rawiri.) Whakaorangia ahau e te Atua, ka tae mai hoki nga wai ki roto ki toku wairua.
- 2
- Ka tapoko ahau ki te oru hohonu, ki te wahi kahore nei he tūnga: kua tae ahau ki nga wai hohonu, ngaro iho ahau i nga waipuke.
- 3
- Kua ruwha nei ahau i taku tangihanga; kua maroke toku korokoro: pakoko kau oku kanohi i a au e tatari atu nei ki toku Atua.
- 4
- Tini ke i nga makawe o toku mātenga te hunga e kino noa mai ana ki a au: he kaha rawa te hunga e mauahara noa mai ana ki a au, e mea nei kia whakamatea ahau; utua ana e ahau i reira nga mea kihai i tangohia e ahau.
- 5
- E te Atua, e matau ana koe ki toku kuwaretanga; kahore hoki toku hara e ngaro ki a koe.
- 6
- E te Ariki, e Ihowa o nga mano, kaua te hunga e tatari ana ki a koe, e tukua kia whakama i a au: e te Atua o Iharaira, kei numinumi kau i a au te hunga e rapu ana ki a koe.
- 7
- Mou hoki ahau i waiho ai hei tawainga: ngaro iho toku mata i te whakama.
- 8
- Kua tangata-ketia ahau ki oku hoa ake: hei tangata noa atu ano ahau ki nga tamariki a toku whaea.
- 9
- Ka pau hoki ahau i te aroha ki to whare; kua tau iho ano ki a au nga tawainga a te hunga e tawai ana ki a koe.
- 10
- I a au i tangi, i whakatiki i toku wairua, na, hei tawainga tena moku.
- 11
- I kakahu hoki ahau i te kakahu taratara moku, i waiho ano hei whakatauki ma ratou.
- 12
- Kei te korero kino moku te hunga e noho ana i te kuwaha: hei waiatatanga ano ahau ma te hunga haurangi waina.
- 13
- Ko ahau ia, ki a koe taku inoi, e Ihowa, i te wa e manakohia ai: whakahokia mai he kupu ki a au, e te Atua, i runga i te nui o tou aroha, o te pono o tau whakaoranga.
- 14
- Whakaorangia ahau i roto i te oru, kaua ahau e tukua kia tapoko: kia ora ahau i te hunga e kino mai ana ki a au, i nga wai hohonu ano hoki.
- 15
- Kei whakangaromia ahau e te waipuke, kei horomia ano ahau e te rire; kei kopia ano te waha o te poka ki runga i a au.
- 16
- E Ihowa whakahokia mai he kupu ki a au; e pai ana hoki tou atawhai: tahuri mai ki a au, kia rite ki te nui o o arohatanga.
- 17
- A kaua e hunā tou mata ki to pononga; e pouri ana hoki ahau: hohoro te whakahoki kupu mai ki a au.
- 18
- Whakatata mai ki toku wairua, hokona: whakaorangia ahau, e mahi nei oku hoa riri.
- 19
- E matau ana koe ki toku tawainga, ki toku whakama, me toku numinumitanga: kei to aroaro oku hoa riri katoa.
- 20
- Maru noa toku ngakau i te tawainga; a pouri noa iho ahau: i titiro ahau ki tetahi hei aroha mai, a kore ake; ki nga kai whakamarie hoki, a kihai i kitea e ahau.
- 21
- I homai e ratou he au hei kai maku: i taku mate-waitanga ano i whakainumia ahau e ratou ki te winika.
- 22
- Kia whakatupu mahanga ta ratou tepara i to ratou aroaro: hei rore hoki i to ratou wa e kake ai.
- 23
- Kia whakapouritia o ratou kanohi, kei kite ratou: kia wiri tonu hoki o ratou hope.
- 24
- Kia pakaru atu to riri ki a ratou, kia mau hoki ratou i to arita, i to weriweri.
- 25
- Kia ururuatia to ratou nohoanga: kaua tetahi e noho ki o ratou teneti.
- 26
- Mo ratou i tukino i te tangata i whiua nei e koe; a korerotia ana e ratou nga mea whakamamae mo te hunga i werohia e koe.
- 27
- Tapiritia atu he kino ki runga ki ta ratou kino; kaua hoki ratou e tukua kia tomo atu ki tou tika.
- 28
- Kia murua atu ratou i te pukapuka o te ora, kaua ano hoki e tuhituhia ki roto ki te hunga tika.
- 29
- Ko au ia e rawa-kore ana, e pouri ana; kia whakateiteitia ake ahau, e te Atua, e tau whakaoranga.
- 30
- Ka whakamoemiti taku waiata ki te ingoa o te Atua, ka whakanui ano taku whakawhetainga i a ia.
- 31
- Pai rawa tenei ki a Ihowa i te puru, i te kau, i te mea whai haona, whai maikuku.
- 32
- E kite te hunga mahaki, a ka hari: ka ora ano o koutou ngakau, e te hunga e rapu nei i te Atua.
- 33
- No te mea ka rongo mai a Ihowa ki te hunga rawa-kore, e kore ano e whakahawea ki ona herehere.
- 34
- Kia whakamoemiti te rangi me te whenua ki a ia, nga moana, me nga mea katoa e tere ana i roto.
- 35
- No te mea tera e whakaorangia e te Atua a Hiona, ka hangā ano e ia nga pa o Hura; a ka noho ratou ki reira, ka riro mai hoki a reira i a ratou.
- 36
- Ka nohoia ano hoki a reira e nga uri o ana pononga: hei kāinga tupu ano hoki a reira mo te hunga e aroha ana ki tona ingoa.
Address: 
Phone: 
Email: