Zephaniah Chapter 2 - Paipera Tapu 1868 | Te Paipera Tapu 1868

Zephaniah Chapter 2 - Paipera Tapu 1868

1
Huihui koutou, ae ra, huihui koutou, e te iwi kahore e matenuitia;
2
I te mea kiano i whanau te tikanga i whakatakotoria, a kiano te ra i pahemo atu ano he papapa, i te mea kiano i tae iho ki a koutou te muranga o ta Ihowa riri, i te mea kiano i tae ki a koutou te ra o ta Ihowa riri.
3
Rapua a Ihowa, e te hunga mahaki katoa o te whenua, e te hunga i mahia ai tana whakarite whakawa; rapua te tika, rapua te tikanga mahaki: me kahore koutou e ngaro atu i te ra o ta Ihowa riri.
4
No te mea tera a Kaha ka mahue, ka ururuatia ano hoki a Ahakerono: ka peia atu a Aharoro i te poutumarotanga, ka hutia atu ano hoki a Ekerono.
5
Aue te mate mo nga tangata i nga tahatika o te moana, mo te iwi o nga Kereti! ta Ihowa i korero ai, he hē mo koutou; E Kanaana, e te whenua o nga Pirihitini, ka whakangaromia ano koe e ahau, kahore he tangata hei noho.
6
Ka waiho ano hoki te tahatika o te moana hei kāinga, hei whare mo nga hepara, hei taiepa hipi.
7
Ka waiho ano te tahatika mo nga toenga o te whare o Hura; ka kai ratou ki reira, ka takoto ratou i te ahiahi i roto i nga whare o Ahakerono: no te mea ka tirotirohia ratou e Ihowa e to ratou Atua, a ka whakatahuritia atu e ia to ratou whakaraunga.
8
Kua rongo ahau i ta Moapa tawai, i te taunu ano hoki a nga tamariki a Amono, i ta ratou tawai ki toku iwi, i ta ratou whakanuinga i a ratou, he whakatetenga ki ta ratou rohe.
9
Mo reira e ora ana ahau, e ai ta Ihowa o nga mano, Atua o Iharaira, ka rite a Moapa ki Horoma, nga tamariki ano hoki a Amono ki Komora; hei tupuranga ongaonga, hei rua tote, hei ururua, a ake ake ake: ma nga toenga o toku iwi ratou e pahua, hei kāinga tupu ano hoki ratou mo nga morehu o oku tangata.
10
Hei utu tenei ki a ratou mo to ratou whakapehapeha, mo ta ratou tawai, mo ta ratou whakakake ki te iwi o Ihowa o nga mano.
11
Ka wehingia a Ihowa e ratou, no te mea ka hiroki i a ia nga atua katoa o te whenua; ka koropiko ano hoki nga tangata katoa ki a ia i tona wahi, i tona wahi, ara nga motu katoa o nga tauiwi.
12
Ko koutou ano hoki, e nga Etiopiana, ka werohia koutou ki taku hoari.
13
Ka whakamarokia atu ano tona ringa ki te nota, a ka whakangaromia a Ahiria e ia, ka meinga ano hoki a Ninewe hei ururua, kahore he wai, maroke rawa.
14
Ka tapapa ano hoki nga kahui i waenganui ona, nga kirehe katoa o nga tauiwi; te kawau ano hoki raua ko te matuku ka noho raua ki ona korupe, ka puaki to raua reo i nga matapihi, ka ururuatia nga kuwaha: no te mea ka takoto kau nga mea hita i a ia.
15
Ko te pa whakamanamana tenei i noho wehi-kore nei, i mea i roto i tona ngakau, Ko ahau tenei, kahore atu hoki, ko ahau anake: taukiri e, kua ururuatia, he tapapatanga no nga kirehe! te hunga katoa e tika ana na reira ka hi atu, o ratou ringaringa patupatu ana.