- 1
- Na, i muri i tenei ka mate a Nahaha te kingi o nga tamariki a Amona, a, ko tana tama te kingi i muri i a ia.
- 2
- Katahi ka mea a Rawiri, Ka patu taku aroha ki a Hanunu tama a Nahaha; i puta mai hoki te aroha o tona pāpā ki a au. Na, ka ungā e Rawiri etahi tangata ki te whakamarie i a ia mo tona pāpā. Na, kua tae mai nga tangata a Rawiri ki te whenua o nga tamariki a Amona ki a Hanunu ki te whakamarie i a ia.
- 3
- Na, ka mea mai nga rangatira o nga tamariki a Amona ki a Hanunu, Ki tau whakaaro he whakahonore na Rawiri i tou pāpā i tonoa mai ai e ia nga kai whakamarie ki a koe? he teka ianei he titiro, he whakangaro, he tutei i te whenua te mea i haere mai ai ana tangata ki a koe?
- 4
- Na, ka mau a Hanunu ki nga tangata a Rawiri, heua ana ratou e ia, tapahia ana hoki e ia o ratou kakahu ki waenga, i te ritenga iho o o ratou papa, a, tonoa atu ana ratou.
- 5
- Na ka haere mai etahi, ka korero ki a Rawiri i te meatanga ki aua tangata. Na, ka tono tangata ia ki te whakatau i a ratou; he nui hoki te whakama o aua tangata. I mea ano te kingi, Hei Heriko koutou noho ai, kia tupu ano o koutou pahau, ko reira hoki mai ai.
- 6
- A, te kitenga o nga tamariki a Amona e piro ana ratou ki a Rawiri. Na, ka homai e Hanunu ratou ko nga tamariki a Amona etahi taranata hiriwa kotahi mano kia kawea mai hei utu hariata, kai eke hoiho, i Mehopotamia, i Hiria-maaka, i Topa.
- 7
- Na, e toru tekau ma rua nga mano hariata i utua e ratou, me te kingi ano hoki o Maaka ratou ko ana tangata; a, haere mai ana ratou, noho ana ki mua i Merepa. A, i huihui mai ano nga tamariki a Amona i o ratou pa, haere mai ana ki te whawhai.
- 8
- Te rongonga o Rawiri, na ka tonoa e ia a Ioapa ratou ko te ope katoa, ara nga tangata marohirohi.
- 9
- Na, ka puta mai nga tamariki a Amona ki waho, a, whakatakotoria ana o ratou ngohi ki te kuwaha o te pa. Na, nga kingi i haere mai nei, he mea motu ke ratou i te parae.
- 10
- A, te kitenga o Ioapa e akina ana a mua, a muri ona e te hoa riri, ka whiriwhiria e ia etahi i roto i te hunga whiriwhiri katoa o Iharaira, a, whakaritea ana e ia hei tu i nga Hiriani:
- 11
- Ko te nuinga atu hoki o te iwi i tukua e ia ki te ringaringa o Apihai, o tona teina, a ka whakatikaia ratou e ratou hei tu i nga tamariki a Amona.
- 12
- I mea ano ia, Ki te kaha nga Hiriani i a au, me awhina mai ahau e koe; a, ki te kaha nga tamariki a Amona i a koe, me awhina atu koe e ahau.
- 13
- Kia maia, kia maia tatou; me whakaaro ki to tatou iwi, ki nga pa o to tatou Atua, a, ma Ihowa e mea te mea e pai ana ki tana titiro iho.
- 14
- A, te whakatatanga o Ioapa ratou ko tona nuinga ki te whawhai ki nga Hiriani, na, rere ana ratou i tona aroaro.
- 15
- A, te kitenga o nga tamariki a Amona kua rere nga Hiriana, na, ka rere ano ratou i te aroaro o tona teina, o Apihai, a, haere ana ki roto ki te pa. Na, haere mai ana a Ioapa ki Hiruharama.
- 16
- A, te kitenga o nga Hiriani kua patua ratou e Iharaira, ka tono tangata atu ratou ki te tiki i nga Hiriani i tera taha o te awa: a, ko Topaka rangatira o te ope a Hararetere i haere mai i mua i a ratou.
- 17
- A, ka korerotia ki a Rawiri, na, ka huihuia e ia a Iharaira katoa, a, whiti ana ki tera taha o Horano, whakaekea mai ana ratou e ia, whakatikaia ana e ia nga ngohi hei tu i a ratou. Na, ka oti nga ngohi te whakatika e Rawiri hei tu i nga Hiriani, a whawhai ana ratou ki a ia.
- 18
- Na, ka rere nga Hiriani i te aroaro o Iharaira, a, patua iho o nga Hiriani e Rawiri e whitu mano nga tangata o nga hariata, e wha tekau mano ano hoki nga tangata haere i raro; i patua ano hoki e ia a Topaka te rangatira ope.
- 19
- A, te kitenga o nga tangata a Hararetere kua patua ratou e Iharaira, na, ka houhia e ratou te rongo ki a Rawiri, a ka meinga hei tangata māna: kihai hoki nga Hiriani i pai ki te awhina i nga tamariki a Amona i muri iho.
Address: 
Phone: 
Email: