- 1
- Te tikanga mo ta te tangata whakaaro ki a matou koia tenei, he kai mahi na te Karaiti, he tuari hoki mo nga mea ngaro a te Atua.
- 2
- Na, to nga tuari ano hoki e matenuitia ana koia tenei, kia kitea tetahi e pono ana.
- 3
- Ki a au ia he mea nohinohi rawa ta koutou kupu moku, ta te tangata kupu ranei moku; kahore nei hoki aku kupu moku ano:
- 4
- Kahore ano kia mau noa i a au tetahi aha aku; heoi e kore tenei e ai hei whakatika moku: te kai whakapuaki kupu hoki moku ko te Ariki.
- 5
- Na, kaua e whakawakia wawetia tetahi mea, kia tae mai ra ano te Ariki, a māna e whakamarama nga mea huna o te pouri, e whakakite hoki nga whakaaro o nga ngakau: ko reira whakamoemititia ai tetahi, tetahi e te Atua.
- 6
- He mea whakariro ke hoki enei mea naku, e aku teina, ki a maua ko Aporo he whakaaro ki a koutou; kia ai maua hei whakaako i a koutou kia kaua te whakaaro e neke ki runga ake i te mea kua oti te tuhituhi, kia kaua koutou e whakapehapeha, e hapai ake i tetahi ki runga ake i tetahi.
- 7
- Na wai hoki koe i rereke ai? ko tehea mea hoki āu ehara i te mea homai ki a koe? Na, he mea i homai nei ki a koe, he aha koe ka whakamanamana ai, me te mea kihai i homai ki a koe?
- 8
- Kua makona na koutou, kua hua o koutou taonga, i a matou ka motu ke mai nei e kingi ana koutou: koia ano te pai me i kingi tonu koutou, kia kingi tahi ai tatou.
- 9
- Ki taku whakaaro hoki kua waiho matou nga apotoro e te Atua mo muri rawa, ano he hunga mo te mate: kua meinga hoki matou hei matakitakinga ma te ao, ma nga anahera, ma nga tāngata.
- 10
- Ko matou he kuare mo ta te Karaiti, ko koutou ia he hunga whai whakaaro i roto i a te Karaiti; ko matou he ngoikore, ko koutou ia he hunga kaha; to koutou he kororia, to matou ia he honore-kore.
- 11
- Tūtuki tonu mai ki tenei wa nei ano to matou matenga i te kai, i te wai, kahore o matou kakahu, e kurua ana, kahore hoki o matou kāinga tumau;
- 12
- E mauiui ana matou, ko o matou ringaringa hei mahi: e taunutia ana, manaaki tonu matou; e whakatoia ana, whakaririka kau ana matou:
- 13
- Ka korerotia kinotia, ka whakamarie atu matou: kua meinga matou hei paru tahinga no te ao, hei parapara no nga mea katoa, taea noatia tenei ra.
- 14
- Kihai ahau i tuhituhi i enei mea kia whakama ai koutou, engari he whakatupato tenei naku i a koutou, ara i aku tamariki aroha.
- 15
- No te mea ahakoa ka tekau mano o koutou kai whakaako i roto i a te Karaiti, heoi kahore e tokomaha nga mātua; he uri hoki koutou noku, i roto i a Karaiti Ihu i runga i te rongo pai.
- 16
- Koia ahau ka tohe atu nei ki a koutou, kia rite ta koutou ki taku.
- 17
- Koia ka tonoa atu nei e au ki a koutou a Timoti, taku tamaiti aroha, tamaiti pono i roto i te Ariki, māna koutou e whakamahara ki oku ara i roto i a te Karaiti, ki taku e whakaako nei i nga wahi katoa i roto i nga hahi katoa.
- 18
- Na, e whakapehapeha ana etahi, e mea ana e kore au e haere atu ki a koutou.
- 19
- Otira meake au haere atu ki a koutou, ki te pai te Ariki; a ehara i te kupu, engari ko te kaha o te hunga e whakapehapeha ana, taku e titiro ai.
- 20
- No te mea ehara te rangatiratanga o te Atua i te kupu, engari he kaha.
- 21
- Ko tehea ta koutou e pai ai? kia haere atu ahau ki a koutou me te whiu, me te aroha ranei, me te wairua māhaki?
Address: 
Phone: 
Email: