1st Corinthians Chapter 6 - Paipera Tapu 1868 | Te Paipera Tapu 1868

1st Corinthians Chapter 6 - Paipera Tapu 1868

1
Ki te mea he totohe ta tetahi o koutou ki tetahi, e whai ngakau ranei ia ki te whakawa ki te aroaro o te hunga hē, a kauaka ki te aroaro o te hunga tapu?
2
Kahore oti koutou i mātau ma te hunga tapu e whakawa te ao? a ki te riro ma koutou e whakawa te ao, e kore ranei koutou e tau hei whakarite i nga whakawakanga nohinohi rawa?
3
Kahore koutou i mātau ko tatou hei whakarite whakawa mo nga anahera? a kauaka oti nga mea o tenei ao?
4
Ki te mea he whakawakanga a koutou ki nga mea o tenei ao, whakanohoia te hunga ingoa iti o te hahi hei whakarite.
5
Tenei korero aku he mea kia whakama ai koutou. He pono koia ranei kahore rawa kia kotahi he tangata whakaaro i roto i a koutou, hei whakarite ina whakawa ona teina i a raua?
6
Heoi kei te whakawa te tuakana i te teina, i te aroaro ano hoki o te hunga whakapono kore?
7
Na, hē rawa ta koutou na, ara ta koutou whakawa i tetahi i tetahi. He aha te whakaririka kau ai ina ahatia koutou? he aha hoki tē tangohia noatia atu ai a koutou mea?
8
Heoi e mahi hē ana koutou e tango ana i ta tera, a he tuakana ano koutou he teina.
9
Kahore oti koutou e mātau, e kore te hunga whakahaere hē e whiwhi ki te rangatiratanga o te Atua? Kei tinihangatia koutou; e kore te hunga moepuku, e kore te hunga karakia ki nga whakapakoko, e kore te hunga puremu, a kore te hunga whakawahine te hunga ranei e mea ana i te tāne hei wahine,
10
E kore te hunga tahae, e kore te hunga apo, e kore te hunga whakahaurangi i a ratou, e kore te hunga taunu, e kore te hunga hao taonga, e whiwhi ki te rangatiratanga o te Atua.
11
He pera ano hoki etahi o koutou i mua: otira kua horoia koutou, kua whakatapua koutou, kua whakatikaia runga i te ingoa o te Ariki o Ihu, he meatanga hoki na te Wairua o to tatou Atua.
12
Tika tonu nga mea katoa hei meatanga maku, otira e kore e pai nga mea katoa: tika tonu nga mea katoa maku, otira e kore e waiho e au tetahi mea hei rangatira moku.
13
Ko nga kai ma te kopu, a ko te kopu mo nga kai: heoi ka ngaro tenei i te Atua me era ano hoki. Na, ehara rawa te tinana hei mea mo te moepuku, engari ma te Ariki, a ko te Ariki hei Ariki mo te tinana.
14
Na, na te Atua i ara ai te Ariki, whaihoki māna tatou ka ara ai, ara ma tona kaha.
15
Kahore oti koutou i mātau, he wahi no te Karaiti o koutou tinana? kia tangohia koia e ahau nga wahi o te Karaiti, a, waiho iho hei wahi mo te wahine puremu? Kahore rapea!
16
Kahore koutou i mātau, ki te honoa tetahi ki te wahine puremu, kotahi ano te tinana? e ki ana hoki ia, Hei kikokiko kotahi raua tokorua.
17
Otiia ki te honoa tetahi ki te Ariki, kotahi tonu te wairua.
18
Rere atu ra i te moepuku. No waho o te tinana nga hara katoa e hara ai te tangata; te tangata ia e puremu ana, e hara ana ia ki tona ake tinana.
19
Kahore koutou i mātau, he whare to koutou tinana no te Wairua Tapu i roto na i a koutou, i homai nei e te Atua, a ehara i te mea no koutou ake koutou?
20
Kua oti hoki koutou te hoko ki te utu: na, whakakororiatia te Atua ki o koutou tinana, ki o koutou wairua; na te Atua hoki ena.