1st John Chapter 5 - Paipera Tapu 1868 | Te Paipera Tapu 1868

1st John Chapter 5 - Paipera Tapu 1868

1
Nga tāngata katoa e whakapono ana ko Ihu te Karaiti, kua whanau i te Atua: nga tāngata katoa ano hoki e aroha ana ki te Pāpā, e aroha ana ano ki tona whanau.
2
Ma konei tatou ka mātau ai e aroha ana tatou ki nga tamariki a te Atua, ma te mea ka aroha tatou ki te Atua, a ka pupuri i ana ture.
3
Ko te aroha hoki tenei ki te Atua, kia pupuri tatou i ana ture: ehara hoki ana ture i te mea taimaha.
4
Nga mea katoa hoki kua whanau i te Atua e kaha ana i te ao: a ko te wikitoria tenei e taea ai te ao, ko to tatou whakapono.
5
Ko wai i kaha i te ao? ehara ianei te tangata e whakapono ana ko Ihu te Tama a te Atua?
6
Ko ia tenei i haere mai nei i runga i te wai i te toto, ko Ihu te Karaiti; ehara i te mea i runga i te wai anake, engari i runga i te wai i te toto. Ko te Wairua hoki te kai whakaatu, he pono hoki te Wairua.
7
Tokotoru hoki nga kai whakaatu i te rangi, ko te Matua, ko te Kupu, ko te Wairua Tapu: a kotahi ano enei tokotoru.
8
A tokotoru nga kai whakaatu i te whenua, ko te Wairua, ko te wai, ko te toto: a kotahi ano ta ratou tokotoru.
9
Ki te whakaae atu tatou ki ta nga tāngata whakaatu, he nui ke ta te Atua whakaatu: ko ta te Atua whakaatu hoki tenei, i whakaaturia mai e ia mo tana Tama.
10
Te tangata e whakapono ana ki te Tama a te Atua, he whakaaturanga ano tana kei roto i a ia: te tangata e kore e whakapono ki te Atua, kua meinga ia he kai korero teka; no te mea kahore ia i whakapono ki te whakaaturanga i whakaaturia mai nei e te Atua mo tana Tama.
11
A ko te whakaaturanga tenei, ara kua homai e te Atua ki a tatou te oranga tonutanga, kei roto ano i tana Tama tenei oranga.
12
Te tangata kei a ia te Tamaiti, kei a ia ano te oranga; te tangata kahore nei i a ia te Tama a te Atua, kahore i a ia te oranga.
13
I tuhituhia atu ai e ahau enei mea ki a koutou e whakapono nei ki te ingoa o te Tama a te Atua; kia mātau ai koutou kei a koutou te oranga tonutanga, kia whakapono ai hoki koutou ki te ingoa o te Tama a te Atua.
14
Ko to tatou maiatanga ano tenei ki a ia, na, ki te inoia e tatou tetahi mea i a ia, tana i pai ai, ka whakarongo mai ia ki a tatou:
15
A ki te mea ka mātau tatou e whakarongo ana ia ki ā tatou mea e inoi ai tatou, ka mātau ano kei a tatou ano nga mea i inoia e tatou i a ia.
16
Ki te mea ka kite tetahi i tona teina e hara ana, haunga te hara e mate ai ia, me inoi ia, a e homai he oranga ki a ia mo te hunga ehara nei to ratou i te hara e mate ai ratou. Tera ano te hara e mate ai: e kore ahau e mea kia inoi ia mo tera.
17
He hara nga hē katoa: tenei ano tetahi hara ehara nei i te mea e mate ai.
18
E mātau ana tatou, na, nga tāngata katoa kua whanau i te Atua kahore e hara; engari ka tiaki te tangata kua whanau i te Atua i a ia ano, e kore hoki te wairua kino e pa atu ki a ia.
19
Ka mātau nei tatou no te Atua tatou, a kei te takoto te ao katoa i roto i te kino.
20
Na, e mātau ana ano tatou kua haere mai te Tama a te Atua, a kua homai e ia ki a tatou he matauranga, kia mohio ai tatou ki a ia ki te Mea Pono; kei roto ano hoki tatou i a ia i te Mea Pono, ara i tana Tama i a Ihu Karaiti. Ko te Atua pono tenei, me te oranga tonutanga.
21
E aku tamariki nonohi, kia tupato koutou ki nga whakapakoko. Amine.