- 1
- Na, ka meinga a Horomona hei hunaonga ki a Parao kingi o Ihipa: i tangohia hoki e ia te tamahine a Parao mana, kawea ana ki te pa o Rawiri, kia oti ra ano te whare mona te hanga, me te whare mo Ihowa, me te taiepa o Hiruharama a tawhio noa.
- 2
- Otiia i patu whakahere ano te iwi i runga i nga wahi tiketike; kiano hoki i hangā noatia te whare mo te ingoa o Ihowa, a tae noa ki aua ra.
- 3
- Na, i aroha ano a Horomona ki a Ihowa, i haere i runga i nga tikanga a tona pāpā a Rawiri: otiia i patu whakahere ano ia, i tahu whakakara ki runga ki nga wahi tiketike.
- 4
- Na, ka haere te kingi ki Kipeono ki te patu whakahere ki reira, ko te tino wahi tiketike hoki ia. Kotahi mano nga tahunga tinana i whakaekea e Horomona ki runga ki taua aata.
- 5
- I puta mai a Ihowa ki a Horomona ki Kipeono, he mea moemoea i te po, a ka mea te Atua, Inoi mai ko te aha kia hoatu e ahau ki a koe.
- 6
- Na, ko te meatanga atu a Horomona, Nui atu te aroha i whakaputaina e koe ki to pononga ki a Rawiri ki toku pāpā, i a ia e haere ana i tou aroaro i runga i te pono, i te tapu, i te ngakau e tika ana ki a koe; i rongoatia ano hoki e koe tenei aroha nui mona, i a koe i hoatu nei i tetahi tamaiti ki a ia hei noho ki runga ki tona torona, hei penei ano me tenei inaianei.
- 7
- Na, kua meinga nei to pononga e koe, e Ihowa, e toku Atua, hei kingi i muri i a Rawiri i toku pāpā, a, he tamariki rawa ahau; kahore e mohio ki te haere atu, ki te haere mai.
- 8
- Na, kei waenganui tenei to pononga i tou iwi i whiriwhiria e koe, he iwi nui, e kore e taea te tatau, te tuhituhi ranei, i te tini.
- 9
- Na, homai ki to pononga he ngakau e mahara ana ki te whakahaere tikanga ki tou iwi, ki te wehe i te pai, i te kino: ko wai hoki e ahei te whakahaere tikanga mo tenei iwi nui ou?
- 10
- A, pai tonu taua kupu ki te whakaaro iho a te Ariki; no Horomona i tono ki tenei mea.
- 11
- Na, ko te meatanga a te Atua ki a ia, Na, kua tono nei koe ki tenei mea mau, a kihai i tono kia maha nga rangi mou, kihai ano hoki i tono ki te taonga mou, kihai i tono kia whakamatea ou hoa riri; heoi tonoa ana e koe he mohio ki te whakarongo atu ki nga whakawakanga.
- 12
- Na, me mea e ahau tau i korero mai na. Nana, ka hoatu e ahau he ngakau mahara, he ngakau mohio ki a koe; a, kahore he rite mou i mua i a koe; e kore ano hoki e ara ake he rite mou i muri i a koe.
- 13
- Ka hoatu ano hoki e ahau ki a koe au kihai na i tono mai ai, te taonga, te kororia; a, kahore he tangata i roto i nga kingi hei rite mou i ou ra katoa.
- 14
- Ki te haere ano hoki koe i oku ara, ki te rongo ki aku tikanga ki aku whakahaunga, ki te pera me te haere o tou pāpā o Rawiri, na, ka whakaroaina ano e ahau ou ra.
- 15
- A, te marangatanga ake o Horomona, na, he moe! Na, haere mai ana ia ki Hiruharama, ka tu ki mua i te aaka o te kawenata a Ihowa, whakaekea ana e ia he tahunga tinana; i tukua ano hoki e ia he whakamarietanga, i tuku ano hoki ia i te hakari ma ana tangata katoa.
- 16
- Na, ko te haerenga mai o nga wahine tokorua, he hunga puremu, ki te kingi, tu ana i tona aroaro.
- 17
- Na, ka mea te wahine tuatahi, E toku ariki, kotahi ano te whare i noho ai maua ko tenei wahine, a, whanau ana ahau; i roto i te whare ano ia.
- 18
- A, i te toru o nga ra o toku whanautanga, ka whanau ano hoki tenei wahine: i reira tahi ano maua, kahore he tangata ke i a maua i roto i te whare; ko maua tokorua anake i roto i te whare.
- 19
- Na, ko te matenga o te tamaiti a tenei wahine i te po; (i takotoria hoki e ia,)
- 20
- Na, whakatika ana ia i waenganui po, ka tango i taku tamaiti i toku taha; i te moe hoki to pononga, a, hikitia ana ki tona uma, whakatakotoria iho hoki e ia tana tamaiti mate ki toku uma.
- 21
- A, taku marangatanga ake i te ata ki te whakangote i taku tamaiti, na, kua mate: a ka ata tirohia iho e ahau i te ata, na, ehara ia i te tamaiti naku, i whanau nei i a au.
- 22
- Na, ko te meatanga mai a tetahi wahine, Kahore, engari naku te tamaiti ora, nau hoki te tamaiti mate; a ka mea tenei, Kahore, engari nau te tamaiti mate, naku hoki te tamaiti ora. Na, korero ana raua i te aroaro o te kingi.
- 23
- Ano ra ko te kingi, E mea ana tenei, Naku tenei tamaiti ora, a nau te tamaiti mate, a e mea ana tenei, Kahore, engari nau te tamaiti mate, naku hoki te tamaiti ora.
- 24
- Na, ka mea te kingi, Tikina atu he hoari maku, a ka kawea mai e ratou he hoari ki te aroaro o te kingi.
- 25
- Katahi te kingi ka ki atu, Tapahia te tamaiti ora kia rua, ka hoatu i tetahi hawhe ki tetahi wahine, i tetahi hawhe ki tetahi wahine.
- 26
- Na, ko te kianga mai a te wahine, nāna nei te tamaiti ora, ki te kingi: he okaka tonu hoki no tona puku aroha ki tana tamaiti, i ki atu ia, Aue, e toku ariki, hoatu te potiki ora ki a ia; kaua rawa hoki e whakamatea. Ko ta tetahi ia, Kauaka maku, kauaka mana; tapahia.
- 27
- Na, ko te whakahokinga mai a te kingi, ka mea, Hoatu te potiki ora ki a ia, kaua rawa e whakamatea: ko tona whaea ia.
- 28
- A, te rongonga o Iharaira katoa ki te whakaritenga whakawa i whakarite ai te kingi, na, wehi ana ratou i te aroaro o te kingi: i kite hoki ratou kei roto i a ia to te Atua mohio ki te whakarite whakawa.
Address: 
Phone: 
Email: