- 1
- Na, i te wha rau i te waru tekau nga tau o te putanga mai o nga tamariki a Iharaira i te whenua o Ihipa, i te wha o nga tau o te kingitanga o Horomona ki a Iharaira, i a Marama Tiwhi, ara, i te rua o nga marama, ka timata ia te hanga i te whare o Ihowa.
- 2
- Na, te whare i hangā nei e Kingi Horomona ma Ihowa, e ono tekau whatianga tona roa, e rua tekau tona whanui, a, e toru tekau whatianga tona tiketike.
- 3
- Na, te whakamahau i mua i te temepara o te whare, e rua tekau whatianga tona roa, rite tonu ano ki te whanui o te whare, kotahi tekau whatianga tona whanui i mua mai i te whare.
- 4
- I hangā ano hoki etahi matapihi kuiti mo te whare.
- 5
- I hangā ano hoki e ia etahi ruma ki te taha o te whare ki tetahi taha, ki tetahi taha, ki nga taha o te whare a whawhe noa, ki o te temepara, ki o te ahurewa: na, hangā ana e ia nga ruma, a whawhe noa.
- 6
- E rima whatianga te whanui o to Taro ruma, e ono whatianga te whanui o to waenga, a e whitu whatianga te whanui o te tuatoru: i whakapiritia hoki e ia etahi pokohiwi ki waho o te whare, a taka noa; kei whakaukia nga kurupae ki nga taha o te whare.
- 7
- Na, te whare, i tona hanganga, he mea hanga ki te kohatu kua oti noa ake te whakapai, taihoa e kawe mai: kahore ano hoki he hama, he toki ranei, tetahi mea rino ranei i rangona ki te whare i tona hanganga ai.
- 8
- I te taha ki matau o te whare te tatau o te waenga paparanga ruma: he mea awhiowhio ano hoki te arawhata i piki ai ratou ki te waenga paparanga, a roto i te waenga ki te tuatoru.
- 9
- Heoi hangā ana e ia te whare, a oti ake; he hita ano hoki nga kurupae me nga papa i hipokina ai e ia te whare.
- 10
- Na, hangā, ana e ia nga ruma ki nga taha katoa o te whare; e rima nga whatianga te tiketike; he hita nga rakau i mau ai aua ruma ki te whare.
- 11
- Na, ko te putanga mai o te kupu a Ihowa ki a Horomona; i mea ia,
- 12
- Tenei whare ka hangā nei e koe, ki te haere koe i runga i aku tikanga, a ka mahi i aku whakaritenga, ka mau hoki ki aku whakahaunga katoa, a ka haere i runga i enei, katahi ka whakapumautia e ahau taku kupu ki a koe, taku i korero ai ki tou pāpā ki a Rawiri.
- 13
- A ka noho ahau i waenganui i nga tamariki a Iharaira; e kore ano hoki e whakarere i toku iwi i a Iharaira.
- 14
- Na, hangā ana e Horomona te whare, a, oti ake.
- 15
- I hangā ano hoki e ia nga taha o roto o te whare ki nga papa hita, no raro ake, a tae noa ki nga papa hipoki: na, whakapiritia iho e ia a roto ki te rakau, a, wharikitia ana a raro ki nga papa kauri.
- 16
- A, e rua tekau nga whatianga o nga taha o te whare i hangā e ia ki nga papa hita, o raro, o nga taha ano hoki: i hangā hoki e ia a roto o taua whare, ara, te ahurewa, te wahi tino tapu.
- 17
- Na, e wha tekau nga whatianga o te whare, ara, o te temepara i te taha ki mua.
- 18
- A, he mea whakairo te hita o te whare, ara, o to roto he rapupuku, he puawai kohera: he hita katoa, kahore he kohatu i kitea.
- 19
- Na, i whakapaia ano e ia te ahurewa i te whare i roto atu, ki reira tu ai te aaka o te kawenata a Ihowa.
- 20
- Na, e rua tekau whatianga te roa o mua o te ahurewa, e rua tekau whatianga te whanui, a, e rua tekau whatianga te tiketike; i whakakikoruatia ano e ia ki te koura para-kore, i whakakikoruatia ano hoki te aata hita.
- 21
- Heoi whakakikoruatia ana a roto o te whare e Horomona ki te koura para-kore: i hangā ano e ia he patu ki te taha o nga mekameka koura ki mua o te ahurewa, whakakikoruatia iho ki te koura.
- 22
- I whakakikoruatia ano e ia te whare katoa ki te koura, a oti noa te whare katoa: i whakakikoruatia katoatia ano hoki e ia te aata, tera i te taha o te ahurewa, ki te koura.
- 23
- A, e rua nga kerupima i hangā e ia mo roto i te ahurewa, he oriwa te rakau; kotahi tekau whatianga te tiketike.
- 24
- A e rima whatianga tetahi parirau o te kerupa kotahi, e rima hoki whatianga tetahi parirau o taua kerupa; te pito o tetahi parirau, a, tae noa ki te pito o tetahi, tekau nga whatianga.
- 25
- A, kotahi tekau whatianga te rua o nga kerupima: kotahi tonu te roa, kotahi tonu te ahua o nga kerupima e rua.
- 26
- Tekau nga whatianga te tiketike o tetahi o nga kerupima: i pera tonu ano te rua o nga kerupima.
- 27
- A, whakanohoia ana e ia nga kerupima ki to roto whare; i roha mai nga parirau o nga kerupima, a, pa ana te parirau o tetahi ki tetahi taha, pa ana te parirau o tetahi ki tetahi taha; me te pa ano o raua parirau ki a raua i waenganui o te whare.
- 28
- I whakakikoruatia ano hoki e ia nga kerupima ki te koura.
- 29
- He mea tuhi ano nana nga taha katoa o te whare, a tawhio noa, he kerupima nga mea i tuhia iho, he nikau, he puawai kohera, ki roto, ki waho.
- 30
- I whakakikoruatia ano hoki e ia nga papa o raro o te whare ki te koura, o roto, o waho.
- 31
- A, he oriwa te rakau i hangā ai e ia nga tatau mo te kuwaha o te ahurewa; kotahi o nga wahi e rima o te pātu i riro i te korupe i nga pou.
- 32
- He oriwa ano hoki te rakau o nga tatau e rua; tuhia iho hoki e ia; he kerupima nga mea i tuhia, he nikau, he puawai kohera, whakakikoruatia ana e ia ki te koura; i meatia iho ano hoki e ia nga kerupima me nga nikau ki te koura.
- 33
- Pera tonu tana hanganga i nga pou mo te tatau o te temepara, he oriwa te rakau; te matotoru, ko te wha o nga wahi o te pātu.
- 34
- A, he kauri te rakau o nga tatau e rua, he mea whakakopa nga taha e rua o tetahi tatau, a, he mea whakakopa nga taha e rua o tetahi tatau.
- 35
- I tuhia ano hoki e ia he kerupima ki aua mea, he nikau, he puawai kohera, a, whakakikoruatia iho ki te koura, he mea whakanoho iho ki runga ki te whakairo.
- 36
- I hangā ano hoki e ia to roto marae, e toru nga rarangi o te kohatu tarai; me te rarangi kurupae, he hita.
- 37
- No te wha o nga tau i whakatakotoria ai te turanga o te whare a Ihowa: ko Tiwhi te marama.
- 38
- A, no te tekau ma tahi o nga tau, no Marama Puru, ara, no te waru o nga marama i oti ai nga aha katoa o te whare, ara, nga mea katoa i whakaritea mona. E whitu nga tau i hangā ai e ia taua whare.
Address: 
Phone: 
Email: