- 1
- Na, i te minita te tamaiti, a Hamuera, ki a Ihowa i te aroaro o Eri. A he taonga ngaro te kupu a Ihowa i aua ra; kahore he whakakitenga nui.
- 2
- Na, i taua wa, kei te takoto a Eri i tona wahi, kua timata ano hoki ona kanohi te atarua, kahore hoki i ata kite:
- 3
- Na, kahore ano te rama a te Atua kia pirau noa i roto i te temepara o Ihowa, i te wahi i tu ai te aaka o te Atua, a i te takoto ano a Hamuera;
- 4
- Na, ko te karangatanga mai a Ihowa ki a Hamuera; a ka mea tera, Tenei ahau.
- 5
- Na, ka rere ia ki a Eri, ka mea, Tenei ahau; i karanga ake na hoki koe ki a au. Na, ko te meatanga mai a tera, Kihai ahau i karanga atu; hoki atu ki te takoto. Na, haere ana ia, a takoto ana.
- 6
- Na, ka karanga ano hoki a Ihowa, E Hamuera. A ka whakatika a Hamuera, haere ana ki a Eri, ka mea, Tenei ahau; i karanga ake na hoki koe ki a au. Na, ko te meatanga mai a tera, Kihai ahau i karanga, e taku tamaiti: hoki atu ki te takoto.
- 7
- Na, kahore a Hamuera i mohio noa ki a Ihowa, kahore ano hoki te kupu a Ihowa i whakapuakina noatia ki a ia.
- 8
- Na, ka karanga ano a Ihowa i a Hamuera, ko te toru o nga karangatanga. A ka whakatika ia, ka haere ki a Eri, ka mea, Tenei ahau: i karanga ake na hoki koe ki a au. Katahi a Eri ka mohio ko Ihowa tera i karanga mai ra ki te tamaiti.
- 9
- Na, ko te meatanga mai a Eri ki a Hamuera, Haere ki te takoto: a ki te karanga ia ki a koe, katahi koe ka mea ake, Korero, e Ihowa; e whakarongo ana hoki to pononga. Na, haere ana a Hamuera, a takoto ana i tona wahi.
- 10
- Na, ko te haerenga mai a Ihowa, ka tu, ka karanga, ka pera me era karangatanga, E Hamuera, e Hamuera. Na, ko te meatanga ake a Hamuera, Korero; e whakarongo ana hoki to pononga.
- 11
- Katahi ka mea mai a Ihowa ki a Hamuera, Nana, ka mahia e ahau he mahi i roto i a Iharaira, e paorooro ai nga taringa e rua o te hunga katoa e rangona ai.
- 12
- Ko te rangi tena e puta ake ai i a au mo Eri nga mea katoa i korerotia e ahau mo tona whare: timata atu, oti tonu atu.
- 13
- Kua mea atu na hoki ahau ki a ia, ka whakawakia tona whare e ahau, a, ake ake, mo te kino e mohiotia ana e ia; mo ana tama i mea kia kangā raua, kihai ano hoki ia i pehi i a raua.
- 14
- Na, ko taku oati tenei mo te whare o Eri, E kore e tau te patunga tapu, te whakahere toto-kore ranei, hei whakamarietanga mo te kino o te whare o Eri, ake ake ake.
- 15
- Na, takoto tonu a Hamuera, a tae noa ki te ata, na wahia ana e ia nga tatau o te whare o Ihowa. A i wehi a Hamuera ki te whakaatu ki a Eri i te mea i whakakitea mai e te Atua ki a ia.
- 16
- Na, ko te karangatanga a Eri ki a Hamuera, ka mea, E Hamuera, e taku tamaiti, a ka mea tera, Tenei ahau.
- 17
- Na, ka mea mai ia, Tena koa te kupu i korerotia e ia ki a koe? Kaua ra e hunā ki a au: kia meatia tenei e te Atua ki a koe, etahi atu mea ano hoki, ki te hunā e koe i a au tetahi o nga kupu katoa i korerotia e ia ki a koe.
- 18
- Katahi ka korerotia nga kupu katoa e Hamuera ki a ia, kihai hoki i hunā tetahi mea i a ia. Na, ko te meatanga mai a tera, Nā Ihowa na hoki: mana e mea ta tona whakaaro i pai ai.
- 19
- Nawai a ka kaumatua a Hamuera, a noho ana a Ihowa ki a ia, kihai hoki tetahi o ana kupu i tukua e ia kia taka ki te whenua.
- 20
- A i mohio a Iharaira katoa, o Rana, a tae noa mai ki Peere-hepa kua whakapumautia a Hamuera hei poropiti ma Ihowa.
- 21
- A i puta mai ano a Ihowa i Hiro: i whakaatu nei hoki a Ihowa i a ia ki a Hamuera i Hiro, he mea korero mai na Ihowa.
Address: 
Phone: 
Email: