1st Thessalonians Chapter 2 - Paipera Tapu 1868 | Te Paipera Tapu 1868

1st Thessalonians Chapter 2 - Paipera Tapu 1868

1
E mātau nei ano koutou, e aku teina, ki to matou haerenga atu ki a koutou, ehara i te mea noa iho:
2
Heoi mate ana matou, tukinotia ana i Piripai, kua mohio na koutou, na, ka maia ano matou i roto i to tatou Atua ki te korero i te rongo pai o te Atua ki a koutou, puta ana te uaua.
3
Ta matou whakahauhau na hoki, ehara i te mea na te tinihanga, na te poke ranei, ehara ano hoki i te mea hangareka:
4
Engari ka tikangatia nei matou e te Atua kia tukua ki a matou te rongo pai, penei tonu ta matou korero; ehara i te mea kia whakamanawarekatia nga tāngata, engari te Atua, e whakamatautau nei i o tatou ngakau.
5
Kahore hoki matou kia anga ki te kupu whakapati, e mātau na ano hoki koutou, ki te ahua kau ranei hei mea taonga; ko te Atua te kai titiro mai:
6
Kihai ano matou i rapu kororia i nga tāngata, i a koutou ranei, i era atu ranei, i te mea e tika ana kia taimaha iho matou, no te mea he apotoro na te Karaiti;
7
Engari i ngawari matou i waenganui i a koutou, i rite ki te kai hiki e whakaahuru ana i ana tamariki ake:
8
Pera tonu to matou matenui ki a koutou, a ehara i te mea ko te rongo pai anake o te Atua ta matou i pai ai kia hoatu ki a koutou, engari ko o matou ake wairua, no te mea e arohaina ana koutou e matou.
9
E mahara ana hoki koutou, e aku teina, ki ta matou mahi, ki to matou mauiui: mahi ana matou i te po i te ao, kei taimaha ki tetahi o koutou, a kauwhautia ana e matou te rongo pai o te Atua ki a koutou.
10
Ko koutou nga kai titiro, ko te Atua hoki, ki te tapu ki te tika ki te hē kore o ta matou whakahaere ki a koutou e whakapono na:
11
E mātau ana ano koutou ki ta matou whakakau, whakamarie, kauwhau, ki tetahi ki tetahi o koutou, rite tonu ki ta te matua ki ana tamariki.
12
Kia tika ta koutou haere kia rite ki ta te Atua, nāna nei koutou i karanga ki tona rangatiratanga ki tona kororia.
13
Mo konei matou ka whakawhetai tonu nei ki te Atua, no te mea i to koutou tahuritanga ki te kupu a te Atua i rongo ra koutou ki a matou, ehara i te mea he tahuritanga no koutou ki te kupu tangata, engari ki te kupu a te Atua, ko ia pu na hoki ia, ko ia ano ia e mahi na i roto i a koutou i te hunga kua whakapono.
14
Kua rite ra hoki ta koutou, e aku teina, ki ta nga hahi a te Atua i Huria i roto i a Karaiti Ihu: o koutou matenga na hoki i nga tāngata o to koutou iwi ake kua rite ki o era i nga Hurai;
15
Na ratou nei hoki i whakamate te Ariki a Ihu, me o ratou ake poropiti, whakatoi ana ratou ki a matou; kahore hoki a ratou whakamanawareka ki te Atua, he hoa riri hoki ratou no nga tāngata katoa;
16
E arai mai ana i a matou kei korero ki nga tauiwi kia ora ai, he mea tenei e rite tonu ai te nui o o ratou hara; na, ka whakapaua rawatia te riri ki a ratou.
17
Ko matou ia, e aku teina, he iti nei te wahi kua wehea mai nei matou i a koutou, ko te kanohi, kahore te ngakau, hira rawa to matou takare kia kite i to koutou kanohi, nui atu te hiahia.
18
No reira te tuatahi te tuarua o a matou meatanga kia haere atu ki a koutou, ara oku nei o Paora, heoi na Hatana matou i whakaware.
19
He aha hoki ta matou e tumanako atu ai, e hari ai, he aha oti te karauna e whakamanamana ai matou? He teka ianei ko koutou i te aroaro o to tatou Ariki o Ihu Karaiti i tona taenga mai?
20
Ko koutou hoki to matou kororia, to matou whakaharinga.