2nd Chronicles Chapter 14 - Paipera Tapu 1868 | Te Paipera Tapu 1868

2nd Chronicles Chapter 14 - Paipera Tapu 1868

1
Na, kua moe a Apia ki ona mātua, a, tanumia iho ki te pa o Rawiri. Na, ko Aha ko tana tama te kingi i muri i a ia. I ona ra i ata takoto te whenua, kotahi tekau nga tau.
2
Na, he pai, he tika, nga mahi a Aha ki te titiro a Ihowa, a tona Atua.
3
I whakakahoretia hoki e ia nga aata o nga atua ke, me nga wahi tiketike: i wawahia hoki e ia nga pou karakiatanga; tuakina ana e ia nga ngahere.
4
I mea ano ia ki a Hura kia rapu ratou i a Ihowa i te Atua o o ratou mātua, kia mahia ano hoki te ture me te whakahaunga.
5
I whakakahoretia atu ano hoki e ia i roto i nga pa katoa o Hura nga wahi tiketike, me nga whakapakoko: a, i ata takoto te kingitanga i tona aroaro.
6
I hangā ano e ia etahi pa taiepa ki Hura; i ata takoto hoki te whenua, kahore hoki ona whawhai, i aua tau; na Ihowa hoki ia i mea kia whai tānga manawa.
7
Koia ia i mea ai ki a Hura, Tatou ka hanga i enei pa, i te taiepa hoki, a taka noa, i nga pourewa, i nga tatau, i nga tutaki, i te mea kei to tatou nei aroaro te whenua: i rapua hoki e tatou a Ihowa to tatou Atua; rapua ana ia e tatou, na, kua meinga nei e ia kia ta o tatou manawa i tetahi taha, i tetahi taha. Na, hangā ana e ratou, a oti pai ana ta ratou.
8
Na, he hoia ano ā Aha, he hunga hapai i te whakangungu rakau, i te matia; o Hura, e toru rau nga mano; o Peniamine, he hunga hapai i te pukupuku, he hunga kukume kopere, e rua rau e waru tekau nga mano; he hunga marohirohi enei katoa, he toa.
9
Na, ko te haerenga mai o Tera o Etiopia ki a ratou, tana ope kotahi mano nga mano, e toru rau nga hariata. Haere mai ana ia ki Mareha.
10
Katahi ka puta mai a Aha ki te tu i a ia, a, whakatakotoria ana e raua a raua ngohi ki Raorao Tepata, ki Mareha.
11
Na, ko te karangatanga a Aha ki a Ihowa, ki tona Atua; i mea ia, E Ihowa, he mea noa iho ki a koe te piki turanga, ahakoa nui, ahakoa he hunga kahore he kaha. Awhinatia mai matou e Ihowa, e to matou Atua; ko koe hoki to matou okiokinga atu; nou hoki te ingoa i haere mai ai matou ki tenei huihuinga tangata. E Ihowa, ko koe to matou Atua; kei pehia tau e te tangata.
12
Na, patua iho nga Etiopiana e Ihowa i te aroaro o Aha, i te aroaro ano hoki o Hura. Na, rere ana nga Etiopiana.
13
Na, ka whaia ratou e Aha ratou ko ana tangata, a tae noa ki Kerara. Na, kua hinga nga Etiopiana, kahore hoki he whakaoranga ake mo ratou; i whati hoki ratou i te aroaro o Ihowa, i te aroaro ano hoki o tana ope; a, nui atu nga taonga parakete i riro mai i a ratou.
14
Patua iho ano hoki e ratou nga pa katoa i Kerara i tetahi taha, i tetahi taha; i runga hoki i a ratou te wehi o Ihowa. Pahuatia ana e ratou nga pa katoa; he nui whakaharahara hoki te taonga i roto.
15
I patua ano hoki e ratou nga teneti o nga kararehe; tangohia ana e ratou nga hipi, me nga kamera, tona tini; a hoki ana ki Hiruharama.