2nd Chronicles Chapter 30 - Paipera Tapu 1868 | Te Paipera Tapu 1868

2nd Chronicles Chapter 30 - Paipera Tapu 1868

1
Katahi a Hetekia ka tono tangata atu ki a Iharaira katoa raua ko Hura; i tuhituhia ano e ia he pukapuka ki a Eperaima raua ko Manahe kia haere mai ki te whare o Ihowa ki Hiruharama, kia whakaritea te kapenga a Ihowa Atua o Iharaira.
2
Kua oti hoki te whakaaro te whakatakoto e te kingi, ratou ko ona rangatira, ko te whakaminenga katoa i Hiruharama, kia whakaritea te kapenga, i te rua o nga marama.
3
Kihai hoki i ahei te whakarite i taua wa, no te mea kiano i ata rite te whakatapu o nga tohunga; kiano hoki te iwi i huihui ki Hiruharama.
4
A, tika tonu taua mea ki te titiro a te kingi, ki te titiro ano hoki a te whakaminenga katoa.
5
Na, ka whakatakotoria e ratou te korero kia karangatia nuitia puta noa i a Iharaira katoa, i Peere-hepa atu, a tae noa ki Rana, kia haere mai ratou ki te whakarite i te kapenga a Ihowa Atua o Iharaira ki Hiruharama: nonamata riro ra ano hoki te korenga o ta ratou whakaritenga i te mea i tuhituhia.
6
Na, haere ana nga kai kawe i nga pukapuka a te kingi ratou ko ana rangatira puta noa i a Iharaira raua ko Hura, pera ana ratou me ta te kingi i whakahau ai; hei ki atu, E nga tamariki a Iharaira, hoki mai ki a Ihowa ki te Atua o Aperahama, o Ihaka, o Iharaira, a ka hoki mai ia ki nga morehu o koutou i mawhiti mai nei i roto i te ringa o nga kingi o Ahiria.
7
Kaua hoki koutou e rite ki o koutou mātua, ki o koutou tuakana, teina, i hē nei ki a Ihowa, ki te Atua o o ratou mātua; na, tukua atu ana ratou e ia ki te whakangaromanga; koia ano tena ka kitea na e koutou.
8
Na, kaua e whakapakeketia o koutou kaki, kei rite ki o koutou mātua. Tukua mai te ringa ki a Ihowa; haere mai ki tona wahi tapu i whakatapua nei e ia mo ake tonu atu: e mahi ki a Ihowa, ki to koutou Atua, a ka tahuri atu i a koutou tana riri e mura nei.
9
Ki te tahuri hoki koutou ki a Ihowa, ka tohungia o koutou tuakana, teina, me a koutou tamariki e nga tangata nana ratou i whakarau, a ka hoki mai ratou ki tenei whenua; he atawhai hoki, he mahi tohu ta Ihowa, ta to koutou Atua; e kore hoki tona mata e tahuri atu i a koutou, ki te hoki mai koutou ki a ia.
10
Na, haere atu ana nga kai kawe pukapuka i tenei pa ki tenei pa puta noa i te whenua o Eperaima, o Manahe, a tae noa ki Hepuruna. Heoi kataina iho ratou, tawaia iho.
11
Otiia i whakaiti ano etahi tangata o Ahera, o Manahe, o Hepuruna, i a ratou, a haere mai ana ki Hiruharama.
12
I runga ano hoki i a Hura te ringa o te Atua hei homai i te ngakau kotahi ki a ratou, e mahi ai ratou i ta te kingi ratou ko nga rangatira i whakahau ai, ara, i ta Ihowa i ki ai.
13
Na, he nui te iwi i huihui mai ki Hiruharama ki te whakarite i te hakari o te taro rewena-kore i te rua o nga marama, nui whakaharahara te whakaminenga.
14
Na, whakatika ana ratou, a, tangohia atu ana e ratou nga aata i Hiruharama, tangohia atu ana ano e ratou nga aata tahu whakakakara, a, makā atu ana ki Awa Kitirono.
15
Katahi ka patua e ratou te kapenga i te tekau ma wha o te rua o nga marama. A, i whakama ano nga tohunga ratou ko nga Riwaiti, a, whakatapua ana ratou e ratou ano, kawea mai ana e ratou etahi tahunga tinana ki te whare o Ihowa.
16
A, tu ana ratou i to ratou turanga, i te wahi i whakaritea mo ratou, he mea i rite tonu ki te ture a Mohi, a ta te Atua tangata: ko nga tohunga hei tauhi i nga toto, ko nga Riwaiti hei homai.
17
He tokomaha hoki i roto i te whakaminenga kihai nei i whakatapu i a ratou: na, ko nga Riwaiti hei patu i nga kapenga ma te hunga katoa kihai i pure, hei whakatapu i a ratou ki a Ihowa.
18
He tokomaha hoki o te iwi, ara, he tokomaha no Eperaima, no Manahe, no Ihakara, no Hepuruna, kihai i pure i a ratou, heoi kai ana ratou i te kapenga, he mea kihai i rite ki ta te tuhituhi. Otiia i inoi a Hetekia mo ratou, i mea, Ma Ihowa, (he pai nei hoki ia,) e muru te hē o nga tangata katoa.
19
E whakapai ana i o ratou ngakau ki te rapu i te Atua, i a Ihowa, i te Atua o o ratou mātua, ko te purenga ia o te wahi tapu kahore ano kia rite noa i a ratou.
20
Na, ka whakarongo mai a Ihowa ki a Hetekia, a whakaorangia ana e ia te iwi.
21
Heoi whakaritea ana e nga tamariki a Iharaira i kitea ki Hiruharama te hakari taro rewena-kore, e whitu nga ra, nui atu te koa; whakamoemititia ana a Ihowa e nga Riwaiti ratou ko nga tohunga i tenei ra, i tenei ra, i runga i nga mea tangi nui, he mea ki a Ihowa.
22
A, i whakamarie ano a Hetekia i nga ngakau o nga Riwaiti katoa i whakaako nei i te matauranga pai ki a Ihowa, a kai ana ratou i te kai o taua hakari, e whitu nga ra, patua ana e ratou nga patunga tapu, nga whakamarietanga, whaki ana ratou ki a Ihowa, ki te Atua o o ratou mātua.
23
Katahi ka whakatakotoria te whakaaro e te whakaminenga katoa, kia whakaritea etahi atu ra e whitu. Na, koa ana ratou i a ratou e whakarite ana i aua rangi e whitu.
24
I homai hoki e Hetekia ki te whakaminenga etahi puru kotahi mano, etahi hipi e whitu nga mano; a, i homai ano e nga rangatira ki te whakaminenga etahi puru kotahi mano, etahi hipi tekau nga mano. He tokomaha ano hoki nga tohunga i whakatapu i a ratou.
25
Na, koa tonu te whakaminenga katoa o Hura, ratou ko nga tohunga, ko nga Riwaiti, ko te whakaminenga katoa ano hoki i haere mai nei i a Iharaira me nga manene i haere mai nei i te whenua o Iharaira, ki Hura noho ai.
26
Na, he nui te koa o Hiruharama, no te mea no nga rangi ano o Horomona tama a Rawiri kingi o Iharaira kahore he penei me tenei i Hiruharama.
27
Na, whakatika ana nga tohunga, ko nga Riwaiti, a, manaakitia ana e ratou te iwi. A, i rangona mai ano to ratou reo, i tae atu ano hoki ta ratou inoi ki tona nohoanga tapu ki te rangi.