- 1
- Tekau ma rua nga tau o Manahe i tona kingitanga ai, a, e rima tekau ma rima nga tau i kingi ai ia ki Hiruharama.
- 2
- A, he kino tana mahi ki te titiro a Ihowa, i rite ki nga mea whakarihariha a nga iwi i peia nei e Ihowa i te aroaro o nga tamariki a Iharaira.
- 3
- Hangā ana ano e ia nga wahi tiketike i wahia iho e tona pāpā, e Hetekia: whakaarahia ake ana e ia nga aata ki nga Paara, meatia ana e ia he ngahere; koropiko ana ia ki te ope katoa o te rangi, mahi ana ki a ratou.
- 4
- Hangā ana ano e ia etahi aata ki te whare o Ihowa, ki ta Ihowa i ki ra, Ko Hiruharama hei waihotanga mo toku ingoa, ake ake ake.
- 5
- Hangā ana ano e ia etahi aata ma te ope katoa o te rangi ki nga marae e rua o te whare o Ihowa.
- 6
- Meatia ana e ia ana tamariki kia tika na waenganui i te ahi i te raorao o te tama a Hinomo, rapua ana e ia he tohu i nga kapua, i nga nakahi; kei te makutu ano ia, kei te whai ki nga atua maori, ki nga mata maori: nui atu tana kino i mahi ai ki te titiro iho a Ihowa, hei whakapataritari mona.
- 7
- I whakaturia ano e ia te whakapakoko, te ahua i hangā e ia, ki te whare o te Atua, ki ta te Atua i ki ra ki a Rawiri raua ko tana tama ko Horomona, Hei tenei whare, hei Hiruharama i whiriwhiria nei e ahau i roto i nga iwi katoa o Iharaira ahau waiho ai i toku ingoa, a, ake ake ake.
- 8
- Heoi ano hoki aku whakanekehanga i te waewae o Iharaira i te whenua i whakaritea e ahau mo o koutou mātua; kia mau raia ratou ki te mahi i nga mea katoa i whakahaua e ahau ki a ratou, kia rite ki te ture katoa, ki nga tikanga, ki nga whakariteritenga i whakapuakina nei e Mohi.
- 9
- Heoi whakapeaua ketia ana e Manahe a Hura ratou ko nga tangata o Hiruharama kia nui atu ta ratou mahi kino i ta nga iwi i hunā nei e Ihowa i te aroaro o nga tamariki a Iharaira.
- 10
- I korero ano hoki a Ihowa ki a Manahe ratou ko tona iwi; heoi kihai ratou i whakarongo mai.
- 11
- Katahi ka kawea mai e Ihowa ki runga ki a ratou nga rangatira o te ope o te kingi o Ahiria; a ka mau i a ratou a Manahe i roto i nga tataramoa; herea iho e ratou ki nga mekameka, kawea atu ana ki Papurona.
- 12
- Na, i a ia i te he, ka inoi ia ki a Ihowa, ki tona Atua, ka whakaiti rawa i a ia i te aroaro o te Atua o ona mātua.
- 13
- Inoi ana ia ki a ia; a ka tahuri mai tera ki a ia, ka whakarongo hoki ki tana inoi. Na, ka whakahokia mai ia ki Hiruharama ki tona kingitanga, a ka mohio a Manahe ko Ihowa te Atua.
- 14
- I muri i tenei ka hangā e ia he taiepa i waho o te pa o Rawiri, i te taha ki te hauauru o Kihona, ki te awaawa, a tae noa ki te tomokanga atu i te kuwaha ika, ki Opere, a whawhe noa, hangā ana e ia kia tiketike whakaharahara. I whakanohoia ano e ia etahi rangatira taua ki nga pa taiepa katoa o Hura.
- 15
- Whakakahoretia atu ana ano e ia nga atua ke, me te whakapakoko i roto i te whare o Ihowa, me nga aata katoa ano hoki i hangā nei e ia ki te maunga o te whare o Ihowa, ki Hiruharama; akiritia atu ana e ia ki waho o te pa.
- 16
- I hangā ano e ia te aata o Ihowa; patua iho e ia ki runga nga whakahere whakamarietanga, nga whakawhetainga, a, ki atu ana ia ki a Hura kia mahi ki a Ihowa, ki te Atua o Iharaira.
- 17
- I patu whakahere ano ia te iwi i runga i nga wahi tiketike; otiia ki a Ihowa, ki to ratou Atua anake.
- 18
- Na, era atu meatanga a Manahe, me tana inoi ki tona Atua, me nga korero a nga matakite i korero nei ki a ia i runga i te ingoa o Ihowa Atua o Iharaira, nana, kei roto i nga pukapuka o nga kingi o Iharaira.
- 19
- Na, tana inoi, me ta te Atua tahuritanga ki a ia, me tona hara katoa, me tona he, me nga wahi i hangā ai e ia nga wahi tiketike, i whakaturia ai e ia nga ngahere, me nga whakapakoko i te mea kiano ia i whakaiti i a ia, nana, kei te tuhituhi i roto i nga korero a nga matakite.
- 20
- Na, kua moe a Manahe ki ona mātua, a, tanumia iho ki tona whare, a, ko tana tama ko Amono te kingi i muri i a ia.
- 21
- E rua tekau ma rua nga tau o Amono i tona kingitanga ai, a, e rua nga tau i kingi ai ia ki Hiruharama.
- 22
- A he kino tana mahi ki ta Ihowa titiro, i rite ki ta tona pāpā, ki ta Manahe i mea ai: i patu whakahere hoki a Amono ki nga whakapakoko katoa i hangā e tona pāpā, e Manahe, a mahi ana ki a ratou.
- 23
- Kihai hoki i whakaiti i a ia ki te aroaro o Ihowa, kihai i pera me tona pāpā me Manahe i whakaiti nei; heoi nui noa atu te he o Amono.
- 24
- Na, kua whakatupuria he hē mona e ana tangata; patua iho ia i roto i tona whare.
- 25
- A patua iho e te iwi o te whenua nga tangata katoa i whakatupuria ai te he mo Kingi Amono; a ka meinga e te iwi o te whenua tana tama a Hohia hei kingi i muri i a ia.
Address: 
Phone: 
Email: