- 1
- A i whakaritea ano e Hohia te kapenga ki Hiruharama hei mea ki a Ihowa; patua ana e ratou te kapenga i te tekau ma wha o nga ra o te marama tuatahi.
- 2
- I whakaturia ano e ia nga tohunga ki o ratou tiakanga, i whakatenatena ano hoki i a ratou ki nga mahi o te whare o Ihowa.
- 3
- I mea ano hoki ia ki nga Riwaiti, ki nga kai whakaako o Iharaira katoa, he hunga hoki i tapu ki a Ihowa, Whakatakotoria te aaka tapu ki te whare i hangā e Horomona tama a Rawiri, kingi o Iharaira: e kore e waiho hei pikaunga ma o koutou pokohiwi; me mahi koutou aianei ki a Ihowa, ki to koutou Atua, ki tona iwi ano hoki, ki a Iharaira.
- 4
- Kia ata rite koutou, tenei whare, tenei whare o o koutou mātua, i o koutou wehenga ano, kia rite ki te mea i tuhituhia e Rawiri kingi o Iharaira, ki te mea ano hoki i tuhituhia e tana tamaiti e Horomona.
- 5
- Me tu hoki koutou ki te wahi tapu; kia rite ano nga wehenga o nga whare o nga mātua o o koutou tuakana, teina, o nga tamariki o te iwi, me te wehenga ano o nga whare o nga Riwaiti.
- 6
- Ka patu ai i te kapenga, ka whakatapu ai i a koutou, ka whakapai ano hoki i o koutou tuakana, teina, kia rite ai ta ratou mahi ki ta Ihowa kupu i whakapuakina e Mohi.
- 7
- A, i homai ano e Hohia ki te iwi, etahi reme, etahi kuao koati no roto i te kahui, enei katoa mo nga kapenga, hei mea ma te hunga katoa i reira: e toru tekau mano te maha, e toru mano nga puru. No nga taonga enei o te kingi,
- 8
- A, i hihiko ano ona rangatira ki te homai ki te iwi, ki nga tohunga, ki nga Riwaiti; ko nga rangatira o te whare o te Atua, ko Hirikia, ko Hakaraia, ko Tehiere, homai ana e enei ki nga tohunga, o etahi kararehe hei mea kapenga, e rua mano e ono rau, a e toru rau nga puru.
- 9
- Ko ona teina ano hoki ko Konania, ko Hemaia, ko Netaneere, me nga rangatira ano o nga Riwaiti, me Hahapia, ratou ko Teiere, ko Iotapara, homai ana e ratou ki nga Riwaiti hei mea kapenga, e rima mano o etahi kararehe, a, e rima rau nga puru.
- 10
- Na, kua rite nga mea mo te mahi, kua tu ano hoki nga tohunga ki o ratou turanga, me nga Riwaiti ano, tenei wehenga, tenei wehenga o ratou, hei whakarite mo ta te kingi i whakahau ai.
- 11
- Katahi ka patua e ratou te kapenga, tauhiuhia atu ana nga toto e nga ringa o nga tohunga; a, na nga Riwaiti i tihore.
- 12
- I tangohia atu ano hoki e ratou nga tahunga tinana, kia hoatu ai he mea e ratou ki nga wehenga o nga whare o nga mātua o te iwi, hei whakahere ki a Ihowa, kia rite ai ki te mea i tuhituhia ki te pukapuka a Mohi: pena ana ano ratou ki nga kau.
- 13
- A, tunua ana e ratou te kapenga ki te ahi, rite tonu ta ratou ki te tikanga. Ko era atu mea tapu ia i kohuatia e ratou ki nga kohua, ki nga pāta, ki nga hopane, a, hohoro tonu te tuwha ma te iwi katoa.
- 14
- A, muri iho ka takā e ratou ma ratou ko nga tohunga; i runga tonu hoki nga tohunga nga tama a Arona i te whakaeke i nga tahunga tinana, i te ngako, a po noa; no reira ko nga Riwaiti hei taka ma ratou tahi ko nga tohunga ko nga tama a Arona.
- 15
- I to ratou turanga ano nga kai waiata, nga tamariki a Ahapa, ko ta Rawiri hoki ia i whakahau ai, ratou ko Ahapa, ko Hemana, ko Ierutunu matakite o te kingi. Na, nga kai tiaki kuwaha i tenei kuwaha, i tenei kuwaha ratou; kihai hoki i ahei kia mahue ta ratou mahi; a ko o ratou tuakana, ko nga Riwaiti hei taka ma ratou.
- 16
- Na, oti ake te mahi katoa ki a Ihowa i taua rangi ano, ara, te whakarite i te kapenga, me te whakaeke ano i nga tahunga tinana ki runga ki te aata a Ihowa, te pera ano me ta Kingi Hohia i whakahau ai.
- 17
- Na, ka whakaritea te kapenga e nga tamariki a Iharaira i kitea ki reira i taua wa, me te hakari taro rewena-kore, e whitu nga ra.
- 18
- Kahore hoki he kapenga hei rite mo tera i meatia i roto i a Iharaira, no nga rangi ano o Hamuera poropiti: kahore hoki he kapenga i meatia e nga kingi katoa o Iharaira hei rite mo ta Hohia i mea ai, ratou ko nga tohunga, ko nga Riwaiti, ko Hura katoa, ratou ko te hunga o Iharaira i reira, me nga tangata ano o Hiruharama.
- 19
- No te tekau ma waru o nga tau o te kingitanga o Hohia i meatia ai tenei kapenga.
- 20
- I muri i tenei katoa, i te mea ka oti i a Hohia te temepara te whakapai, ka haere mai a Neko kingi o Ihipa ki te tatau ki Karakemihi i te taha o Uparati, a, puta mai ana a Hohia ki te tu i a ia.
- 21
- Katahi tera ka tono tangata mai ki a ia, hei mea mai, Ko te aha ta taua, e te kingi o Hura? ehara taku inaianei i te mea ki a koe; engari ki te whare ka whawhaitia nei e ahau; kua mea nei hoki te Atua ki a au kia hohoro taku. Kei pokanoa koe ki ta te Atua; kei a au hoki ia, kei whakangaro ia i a koe.
- 22
- Heoi kihai te mata o Hohia i tahuri atu i a ia. Whakaahua ke ana ia i a ia ano, he mea kia whawhai raua; kihai ano hoki i whakarongo ki nga kupu a Neko, he mea no roto mai i te mangai o te Atua; a, haere ana ki te whawhai ki te raorao i Mekiro.
- 23
- Katahi ka kopere mai nga kai kopere ki a Kingi Hohia. A ka mea te kingi ki ana tangata, Kawea atu ahau; he nui rawa hoki toku tūnga.
- 24
- Na, ka tangohia ia e ana tangata i runga i te hariata, a, utaina atu ana ki runga ki te tuarua o ana hariata, kawea atu ana e ratou ki Hiruharama, a, mate iho ia: na, tanumia ana ia i roto i nga urupa o ona mātua. A, tangihia ana a Hohia e Hura katoa ratou ko Hiruharama.
- 25
- A, i waiatatia ano e Heremaia he apakura mo Hohia; i korerotia ana hoki a Hohia e nga kai waiata, e nga tane, e nga wahine, i a ratou apakura, a taea noatia tenei ra; waiho iho ano hoki e ratou hei tikanga ma Iharaira. Nana, kei roto na i nga tangi whakaoriori.
- 26
- Na, era atu meatanga a Hohia, me ana mahi atawhai, he mea i rite tonu ki nga mea i tuhituhia ki te ture a Ihowa,
- 27
- Ana meatanga, o mua, o muri, nana, kei te tuhituhi i roto i te pukapuka o nga kingi o Iharaira, o Hura.
Address: 
Phone: 
Email: