- 1
- Taku e hiahia nei kia ata hanga mai koutou ki a au, ara, kia iti nei ta wahi, i a au e wairangi nei: ae ra, kia ata hanga mai ano ki a au.
- 2
- Nui atu hoki toku ngakau ki a koutou he ngakau no te Atua: kua oti hoki koutou te taumau e ahau ma te tane kotahi, kia tapaea atu hei wahina hē-kore ki a te Karaiti.
- 3
- E wehi ana ia ahau, kei pera me Iwi i whakawaia e te tinihanga o te nakahi, kei heke atu a koutou whakaaro ki te hē, kei mahue te tapatahitanga o te ngakau ki a te Karaiti.
- 4
- Ki te tae atu te tangata, me te kauwhau i tetahi Ihu e rere ke ana i ta matou i kauwhau ai, ki te whiwhi ranei koutou ki tetahi wairua ke atu i ta koutou i whiwhi na, ki tetahi rongo pai ranei e rere ke ana i ta koutou i whakaae ai, e tika ano kia ata hanga koutou ki a ia.
- 5
- Ki a au hoki kahore rawa ahau i hoki iho i nga tino apotoro.
- 6
- Na, ahakoa tangata ware ahau ki te korero, kahore ia ki te matauranga; heoi i nga mea katoa kua tino kitea matou i roto i a koutou.
- 7
- I hara oti ahau i a au i whakaiti ra i a au kia kake ai koutou, i kauwhau utu-kore ra i te rongo pai o te Atua ki a koutou?
- 8
- I pahuatia e ahau era atu hahi, i tango utu ahau i a ratou, kia minita ai ahau ki a koutou.
- 9
- A i a au ano i kona i a koutou, a i kore tetahi mea maku, kahore ahau i taimaha ki tetahi: na nga teina hoki i haere atu i Makeronia i whakawhiwhi mai ahau ki nga mea i kore i ahau: i nga mea katoa hoki i pupuri ahau i a au ke taimaha iho ki a koutou, ina, ka pupuri ano ahau.
- 10
- Kei ahau te pono o te Karaiti, e kore tenei whakamanamana aku e araia e tetahi i nga wahi o Akaia.
- 11
- Na te aha? na te mea koia kahore oku aroha ki a koutou? e mātau ana te Atua.
- 12
- Na, taku e mea nei, e meinga ano e ahau, kia motuhia atu ai e ahau te take a te hunga e hiahia ana ki te take; kia kitea ai ratou i runga i ta ratou e whakamanamana nei e rite tahi ana ano ki a matou nei.
- 13
- He apotoro teka hoki nga pera, he kai mahi tinihanga, e whakaahua ke ana i a ratou kia rite ki nga apotoro o te Karaiti.
- 14
- Ehara ano hoki tenei i te mea whakamiharo; e whakaahua ke ana hoki a Hatana i a ia kia rite ki te anahera o te māramatanga.
- 15
- A, ehara i te mea nui ki te whakaahua ke ano hoki ana minita i a ratou kia rite ki nga minita o te tika; na, to ratou whakamutunga e rite ki a ratou mahi.
- 16
- Me ki atu ano e ahau, Kaua tetahi e mea he wairangi ahau; a, ahakoa pena, heoi tahuri mai ki a au ki te wairangi kia whakamanamana ai ano ahau, he mea iti nei.
- 17
- Taku e korero nei, ehara i te korero i runga i ta te Ariki, engari me te mea i runga i te wairangitanga, i tenei whakamanamana ka kaha nei.
- 18
- Na, he tokomaha e whakamanamana nei i runga i to te kikokiko, ka whakamanamana ano ahau.
- 19
- Pai tonu hoki ki a koutou, ki te hunga whakaaro, te ata hanga ki te hunga wairangi.
- 20
- Ka ata hanga hoki koutou ki te whakataurekareka tetahi i a koutou, ki te pau a koutou mea i tetahi, ki te tangohia ta koutou e tetahi, ki te whakakake tetahi, ki te pahiatia to koutou mata e tetahi.
- 21
- He kupu tenei naku mo te honore-koretanga, ara ko matou he ngoikore. Na, ki te maia tetahi ki tetahi mea, (he kupu wairangi nei taku,) ka maia ano hoki ahau.
- 22
- He Hiperu ratou? ahau ano hoki. No Iharaira ratou? ahau ano hoki. He whanau ratou no Aperahama? ahau ano hoki.
- 23
- He minita ratou na te Karaiti? (He korero porangi taku nei,) tera atu ano taku; hira atu oku mauiuitanga, nui noa atu oku whiunga, maha noa atu oku meatanga ki roto ki nga whare herehere, maha atu oku mate.
- 24
- E rima nga wa i whiua ai ahau e nga Hurai; i te wa kotahi, kotahi pānga o te whiu i mahue o te wha tekau.
- 25
- E toru oku whiunga ki te rakau, kotahi toku akinga ki te kohatu, e toru oku tahuritanga i te kaipuke, kotahi oku po kotahi oku ra i te rire;
- 26
- Nga haereerenga, maha tonu nga oranga noatanga i nga awa, nga oranga noatanga i nga kai pahua, nga oranga noatanga i oku whanaunga, nga oranga noatanga i nga tauiwi, nga oranga noatanga i te pa, nga oranga noatanga i koraha, nga oranga noatanga i te moana, nga oranga noatanga i nga teina teka;
- 27
- Mauiui ana, ngenge ana, he maha nga mataaratanga, nga matekaitanga, nga matewaitanga, he maha nga wa i noho puku ai, i matao ai, i kore ai he kakahu.
- 28
- Hei tapiri mo nga mea o waho, ko te mea e whakaeke nei i a au i tenei ra i tenei ra, ko te manukanukatanga ki nga hahi katoa.
- 29
- Ko wai te ngoikore ana, a kahore ahau e ngoikore? ko wai kua tūtuki te waewae, a kahore ahau e pawerawera?
- 30
- Ki te mea ka takoto te tikanga kia whakamanamana, me whakamanamana ahau ki toku ngoikoretanga.
- 31
- E mātau ana te Atua te Matua o to tatou Ariki o Ihu Karaiti, ko ia nei te whakapaingia ana ake tonu atu, kahore aku teka.
- 32
- I Ramahiku e tiakina ana e ta kingi Areta kawana te pa o nga tāngata o Ramahiku, he mea kia hopukina ai ahau:
- 33
- Heoi tukua iho ana ahau i roto i te kete, ra te matapihi ra te taiepa kohatu, a mawhiti atu ana i roto i ona ringaringa.
Address: 
Phone: 
Email: