- 1
- Na, te minitatanga ki te hunga tapu, he mea noa ake taku tuhituhi ki a koutou:
- 2
- E mohio ana hoki ahau ki to koutou ngakau hihiko, i whakamanamanangia ai koutou e ahau ki nga Makeroni, ara ko ta Akaia kua rite noa ake i tera tau ra ano; a he tokomaha i oho i to koutou ngakaunuitanga.
- 3
- Heoi kua tonoa nei e ahau nga teina, kei whakakahoretia tenei wahi o taku whakamanamananga ki ta koutou mahi; kia rite ai ta koutou, kia pera ai me taku i mea atu ai:
- 4
- Kei haere atu etahi o nga Makeroni hei hoa moku, a ka rokohanga atu kahore ano kia rite noa ta koutou, na, ko te whakama mo matou, (tē mea matou, mo koutou,) i tenei whakamanamana e kaha nei.
- 5
- Koia ahau i mea ai ko te tikanga tenei kia whakahaua nga teina, kia haere ko ratou ki mua ki a koutou, kia rite wawe ai i a ratou tenei manaakitanga a koutou, i korerotia nei i mua, ko tenei kia rite, kia tuā manaakitanga ai, kei rite ki te mea e manawapatia ana.
- 6
- Ko taku ia tenei, He torutoru a tetahi i rui ai, he torutoru ano ana e kokoti ai; a he maha nga mea i ruia e tetahi, he maha ano ana e kokoti ai.
- 7
- Kia rite ano ki ta tenei ki ta tenei i whakaaro ai i roto i tona ngakau; kaua e tuā pouri, kaua e tuā whakauaua: ko ta te Atua hoki e aroha ai, he tangata e hoatu ana i runga i te ngakau mārama.
- 8
- E taea ana hoki e te Atua te mea kia hira nga aroha noa katoa ki a koutou; a ka ranea rawa na o koutou taonga i nga mea katoa i nga wa katoa, kia hira ano a koutou mahi pai katoa:
- 9
- (Kia rite ai ki te mea i tuhituhia, Kua titaritaria; kua hoatu e ia ki te hunga rawakore: e pumau tonu ana tona tika ake ake.
- 10
- Na, ma te kai whakawhiwhi i te kai rui ki te purapura, e whakawhiwhi koutou ki te taro hei kai, māna e whakamaha ta koutou e whakato ai, e whakanui ano nga hua o to koutou tika;)
- 11
- Kia whakawhiwhia koutou ki nga taonga katoa mo nga mahi ohaoha katoa, e puta ai i a matou he whakawhetai ki te Atua.
- 12
- Na tenei mahi hoki e minitatia nei i whiwhi ai te hunga tapu ki nga mea i kore i a ratou; na tenei ano hoki i maha noa atu ai nga whakawhetai ki te Atua;
- 13
- I tenei mahi ka tirohia nei e ratou, a ka whakakororia ratou i te Atua mo koutou kua whakaae nei, kua ngohengohe ki te rongo pai o te Karaiti, mo to koutou ohaoha ki te tuwha mea mo ratou, mo te katoa:
- 14
- I a ratou ano e inoi ana mo koutou, me te hiahia ano ratou ki a koutou, he whakaaro hoki ki te aroha noa o te Atua ka nui rawa nei ki a koutou.
- 15
- Me whakawhetai ki te Atua mo tana mea homai noa e kore nei e taea te korero.
Address: 
Phone: 
Email: