- 1
- Na, i muri iho i te matenga o Ahapa ka whakakeke a Moapa ki a Iharaira.
- 2
- Na, kua taka a Ahatia i te taiepa ripekapeka i tona ruma i runga, i Hamaria, a ka turorotia. Katahi ia ka tono tangata, a ka mea ki a ratou, Tikina, uia atu ki a Paara-hepupa atua o Ekerono, e ora ranei ahau i tenei mate.
- 3
- Na, ko te korerotanga mai a te anahera a Ihowa ki a Iraia Tihipi, Whakatika, haere ki runga ki te whakatau i nga tangata a te kingi o Hamaria, ka mea atu ki a ratou, He kore rawa ianei no te Atua o Iharaira i haere ai koutou ki te ui ki a Paara-hepupa atua o Ekerono?
- 4
- Na, ko te kupu tenei a Ihowa, Te moenga i pikitia na e koe, e kore koe e heke iho i reira; engari ko te mate kau mou. Na, haere ana a Iraia.
- 5
- A, te hokinga mai o nga tangata ki a ia, ka mea ia ki a ratou, He aha koutou i hoki mai ai?
- 6
- Na, ko to ratou meatanga mai ki a ia, I haere mai tetahi tangata ki te whakatau i a matou, a ka mea ki a matou, Haere, hoki atu ki te kingi i tonoa mai ai koutou, ka mea atu ki a ia, Ko te kupu tenei a Ihowa, He kore rawa ianei no te Atua o Iharaira i tono tangata ai koe ki te ui ki a Paara-hepupa atua o Ekerono? Na, te moenga i pikitia na e koe, e kore koe e heke iho i reira; engari ko te mate kau mou.
- 7
- Katahi tera ka mea ki a ratou, Tena koa te ahua o taua tangata i haere mai ra ki te whakatau i a koutou, i korero mai ra i aua kupu ki a koutou?
- 8
- Na, ka mea ratou ki a ia, He tangata huruhuru, he whitiki hiako ano hoki te whitiki o tona hope. Na, ka mea ake ia, Ko Iraia Tihipi tera.
- 9
- Katahi ia ka unga mai i tetahi rangatira rima tekau me tana rima tekau. Na, haere mai ana ia ki a ia, a, i te noho tera i te tihi o te maunga. Na, ko tana meatanga atu ki a ia, E te tangata a te Atua, i mea mai te kingi, Heke iho.
- 10
- Na, ko te whakahokinga mai a Iraia, ka mea ki te rangatira rima tekau, Ki te mea he tangata ahau na te Atua, kia heke iho he ahi i runga i te rangi hei kai i a koutou ko o rima tekau. Na, heke iho ana he ahi i te rangi, pau ake ia me tana rima tekau.
- 11
- Na, ka ungā mai ano hoki e ia tetahi atu rangatira rima tekau me tana rima tekau. A ka oho mai tera, ka mea ki a ia, E te tangata a te Atua, ko te kupu tenei a te kingi, Hohoro te heke iho.
- 12
- Na, ka whakahokia atu e Iraia, a ka mea ki a ratou, Ki te mea he tangata ahau na te Atua, kia heke iho he ahi i te rangi hei kai i a koutou ko to rima tekau. Te hekenga iho o te ahi a te Atua i te rangi, pau ake ia me tana rima tekau.
- 13
- Na, ka ungā ano hoki e ia, ka tuatorutia he rangatira rima tekau, me tana rima tekau. Na, haere mai ana te tuatoru o nga rangatira rima tekau; ka tae, tukua ana nga turi ki raro ki te aroaro o Iraia, ka tangi mai ki a ia, ka mea ki a ia, E te tangata a te Atua, kia nui ki tau whakaaro iho toku wairua, me nga wairua ano hoki o enei pononga e rima tekau āu.
- 14
- Nana, i heke iho he ahi i te rangi, a, pau ake nga rangatira tokorua o nga rima tekau o mua me a raua rima tekau: na, kia nui toku wairua ki tau whakaaro.
- 15
- Na, ka mea te anahera a Ihowa ki a Iraia, Heke atu korua, kaua e wehi i a ia. Na, whakatika ana ia, heke tahi ana raua ki te kingi.
- 16
- Na, ka mea tera ki a ia, Ko te kupu tenei a Ihowa, Na, kua unga tangata nei koe ki te ui ki a Paara-hepupa atua o Ekerono; he kore rawa ianei no te Atua o Iharaira hei uinga atu mau i tana kupu? mo reira, te moenga i pikitia na e koe, e kore koe e heke iho i kona; engari ko te mate kau mou.
- 17
- Na, mate iho ia; i rite tonu te kupu a Ihowa i korerotia e Iraia; a ko Iehorama te kingi i muri i a ia, i te rua o nga tau o Iehorama tama a Iehohapata kingi o Hura; kahore hoki ana tama.
- 18
- Na, era atu meatanga a Ahatia i mea ai ia, kahore ianei i tuhituhia ki te pukapuka o nga meatanga o nga ra o nga kingi o Iharaira?
Address: 
Phone: 
Email: