- 1
- I ona ra ka haere mai a Nepukaneha kingi o Papurona; a, meinga ana a Iehoiakimi hei pononga māna, e toru nga tau. Katahi tera ka tahuri, a, whakakeke ana ki a ia.
- 2
- Na, i ngare mai a Ihowa i nga ope o nga Karari ki a ia, me nga ope o nga Hiriani, me nga ope o nga Moapi, me nga ope o nga tamariki a Amona: heoi ngarea mai ana ratou e ia ki Hura hei huna mo reira, i rite ai te kupu a Ihowa i korerotia e ana pononga, e nga poropiti.
- 3
- He pono na te kupu a Ihowa i pa ai tenei ki a Hura, hei neke atu i a ratou i tona aroaro mo nga hara o Manahe, ara, mo ana mea katoa i mea ai ia.
- 4
- Mo te toto hara-kore ano hoki i whakahekea e ia, i kapi hoki i a ia a Hiruharama i te toto hara-kore, a kihai a Ihowa i pai kia whakarerea noatia tenei.
- 5
- Na, era atu meatanga a Iehoiakimi me ana mea katoa i mea ai ia, kihai ianei i tuhituhia ki te pukapuka o nga meatanga o nga ra o nga kingi o Hura?
- 6
- Na, kua moe a Iehoiakimi ki ona mātua, a, ko Iehoiakini ko tana tama hei kingi i muri i a ia.
- 7
- Na, heoi ano haerenga atu o te kingi o Ihipa i tona whenua; kua riro hoki i te kingi o Papurona nga wahi katoa o te kingi o Ihipa no te awa ra ano o Ihipa tae noa ki Awa Uparati.
- 8
- Kotahi tekau ma waru nga tau o Iehoiakini i tona kingitanga ai, a, e toru nga marama i kingi ai ia ki Hiruharama. Na, te ingoa o tona whaea ko Nehuhuta, he tamahine na Erenatana o Hiruharama.
- 9
- A, i kino tana mahi ki te titiro a Ihowa, i rite ki nga mea katoa i mea ai tona pāpā.
- 10
- I taua wa ka whakaekea a Hiruharama e nga tangata a Nepukaneha kingi o Papurona, a, whakapaea ana te pa.
- 11
- Na, ka haere mai a Nepukaneha kingi o Papurona ki te pa, a, whakapaea ana a reira e ana tangata.
- 12
- Na, ka puta mai a Iehoiakini kingi o Hura ki te kingi o Papurona, a ia, tona whaea, ana tangata, ana rangatira, ana unaka. Na, ka mau ia i te kingi o Papurona i te waru o nga tau o tona kingitanga.
- 13
- Na, tangohia atu ana e tera i reira nga taonga katoa o te whare o Ihowa, me nga taonga o te whare o te kingi; tapatapahia ana hoki e ia nga oko koura katoa i hangā e Horomona kingi o Iharaira mo te temepara o Ihowa, pera ana ano ia me ta Ihowa i korero ai.
- 14
- Whakahekea katoatia atu ana hoki e ia a Hiruharama katoa, nga rangatira katoa, me nga tangata marohirohi katoa, tekau nga mano o nga pārau, me nga kai mahi katoa, me nga parakemete; kihai tetahi i mahue, heoi ano ko te hunga rawa-kore o te whenua.
- 15
- I whakahekea atu ano e ia a Iehoiakini ki Papurona me te whaea ano hoki o te kingi, ratou ko nga wahine a te kingi, ko ana unaka, ko te hunga nunui o te whenua. Whakahekea atu ana ratou e ia i Hiruharama hei pārau ki Papurona.
- 16
- Me nga tangata toa ano hoki, e whitu nga mano, nga kai mahi, nga parakemete, kotahi mano, te hunga marohirohi katoa e pai ana hei whawhai: kawea ana ratou e te kingi o Papurona hei pārau ki Papurona.
- 17
- Na, ko Matania teina o tona pāpā ka meinga hei kingi i muri i a ia e te kingi o Papurona, whakawhitia ketia hoki e ia tona ingoa ko Terekia.
- 18
- E rua tekau ma tahi nga tau o Terekia i tona kingitanga ai; a, kotahi tekau ma tahi nga tau i kingi ai ia ki Hiruharama. Na, te ingoa o tona whaea ko Hamutara, he tamahine na Heremaia o Ripina.
- 19
- A, i kino tona mahi ki te titiro a Ihowa; i rite ki nga mea katoa i mea ai a Iehoiakimi.
- 20
- No reira i a Ihowa ka riri nei, ka puta te aitua ki Hiruharama ki a Hura, a, makā noatia atu ratou i tona aroaro; whakakeke ana a Terekia ki te kingi o Papurona.
Address: 
Phone: 
Email: