- 1
- A, i mea ano nga tamariki a nga poropiti ki a Eriha, Nana, te wahi e noho nei matou i tou aroaro he kuiti rawa mo tatou.
- 2
- Tena, kia haere tatou ki Horano, a, kia tangohia mai i reira he kurupae e tenei tangata, e tenei tangata o tatou, ka hanga ai i tetahi wahi ki reira hei nohoanga mo tatou. Ano ra ko ia, Haere.
- 3
- Na, ko te meatanga ake a tetahi, Tena, whakaae mai kia haere koe i o pononga. Ano ra ko ia, Me haere ano ahau.
- 4
- Na, haere tahi ana ratou. Te taenga atu ki Horano; kei te tapatapahi rakau.
- 5
- Heoi e tua ana tetahi i te kurupae, ko te mareretanga atu o te toki ki te wai. Na, ka karanga mai ia ka mea, Aue, e toku ariki! he toki na te tangata.
- 6
- Na, ko te meatanga mai o te tangata a te Atua, Tena koa te wahi i marere atu ai te toki? Na, whakakitea mai ana e ratou taua wahi. Na, tapahia ana e ia tetahi rakau, a makā atu ana ki reira. Na, kua mānu taua rino.
- 7
- Katahi ia ka mea atu, Tangohia ake ki a koe. Na, ka totoro atu tona ringa, a tangohia mai ana e ia.
- 8
- Na, ka whawhai te kingi o Hiria ki a Iharaira, A ka whakatakoto whakaaro ki ana tangata, ka mea, Te wahi hei puni moku, kei mea.
- 9
- Na, ka tono tangata atu te tangata a te Atua ki te kingi o Iharaira hei ki atu, Kia tupato kei tika koe na taua wahi: kua haere mai hoki nga Hiriani ki raro ki reira.
- 10
- Katahi te kingi o Iharaira, ka unga tangata atu ki taua wahi i ki ai te tangata a te Atua ki a ia, i whakatupato ai ia i a ia. Na, ko tana whakaoranga i a ia i reira: ehara ano hoki i te mea he whakaoranga tuatahi, tuarua.
- 11
- Na, poheua noa iho te ngakau o te kingi o Hiria i tenei mea, a ka karanga ia ki ana tangata, ka mea ki a ratou. E kore ianei koutou e whakaatu mai ki a au ko wai o tatou e mea ana ki te kingi o Iharaira?
- 12
- Na, ko te meatanga mai a tetahi o ana tangata, Kahore, e toku ariki, e te kingi; engari ko Eriha te poropiti o Iharaira, hei whakaatu ki te kingi o Iharaira i nga kupu e korero ai koe i tou whare moenga.
- 13
- Na, ko ta tera meatanga atu, Tikina, tirohia, kei hea ia, a ka unga tangata atu ahau ki te tiki i a ia. Na, ka whakaatu mai tetahi ki a ia; ka mea, Nana, kei Rotana.
- 14
- Na, tonoa atu ana e ia etahi hoiho, etahi hariata ki reira, he nui te ope. A, haere po mai ana ratou, karapotia ana e ratou te pa.
- 15
- Na, te marangatanga o te kai mahi o te tangata a te Atua i te ata, te putanga atu ki waho, na, he taua e karapoti ana i te pa! me nga hoiho me nga hariata. Na ka mea mai tana tangata ki a ia, Aue, e taku ariki, me aha tatou?
- 16
- Ano ra ko ia, Kaua e wehi. Hira ake hoki o tatou hoa i o ratou hoa.
- 17
- Na, ka inoi a Eriha, a ka mea, E Ihowa, kia titiro ona kanohi, kia kite ai ia. Na, whakatirohia ana nga kanohi o taua taitamariki, a ka kite ia, na, kapi tonu te maunga i nga hoiho, i nga hariata ahi i nga taha katoa o Eriha.
- 18
- Na, to ratou haerenga mai ki raro ki a ia, ka inoi a Eriha ki a Ihowa, a ka mea, Tera ra, patua tenei iwi ki te matapotanga. Na, patua ana ratou e ia ki te matapotanga, pera tonu ia me ta Eriha i ki ai.
- 19
- Na, ko te meatanga atu a Eriha ki a ratou. Ehara tenei i te huarahi, ehara ano hoki tenei i te pa, Haere mai tatou, a maku koutou e arahi atu ki ta koutou tangata e rapu nei. Heoi arahina atu ana ratou e ia ki Hamaria.
- 20
- A, te taenga atu ki Hamaria, ka mea a Eriha, E Ihowa, whakatirohia nga kanohi o enei, kia kite ai ratou. Na, whakatirohia ana e Ihowa o ratou kanohi, a ka kite ratou. Na, ko waenganui pu o Hamaria.
- 21
- Na, ka mea te kingi o Iharaira ki a Eriha i tona kitenga i a ratou, Kia patua e au, e toku pāpā? kia patua e au?
- 22
- Ano ra ko ia, Kei patua e koe. E patua ranei e koe au i hopu ai ki to hoari, ki to kopere? Whakatakotoria he taro, he wai ki to ratou aroaro, a, kia kai ratou, kia inu, kia hoki ano hoki ki to ratou ariki.
- 23
- Na, takā ana e ia he kai ma ratou, he nui; a, kai ana ratou, inu ana. Katahi ka tukua atu ratou e ia, a, haere ana ratou ki to ratou ariki. Na, heoi ano haerenga mai o nga taua a nga Hiriani ki te whenua o Iharaira.
- 24
- Na, muri iho i tenei ka huihuia, e Pene-harara kingi o Hiria tana ope katoa, a haere ana, whakapaea ana a Hamaria.
- 25
- Na, nui atu te mate-kai o Hamaria. Nana, whakapaea ana a reira e ratou, a, te utu mo te upoko kaihe, e waru tekau nga hiriwa, na, te paru kukupa e ki ai te kapa, kia kotahi o ona wahi e wha, e rima nga hiriwa.
- 26
- Na, e tika atu ana te kingi o Iharaira na te taiepa, a ka karanga mai tetahi wahine ki a ia, ka mea, Whakaorangia, e te ariki, e te kingi.
- 27
- Ano ra, ko ia, Ka kore nei a Ihowa e whakaora i a koe, kei hea he mea maku hei whakaora i a koe? kei te patunga witi ranei? kei te poka waina ranei?
- 28
- I mea ano te kingi ki a ia, He mate aha tou? Ano ra ko ia, I mea mai tenei wahine ki a au, Homai to tamaiti hei kai ma taua aianei, a, ko taku tamaiti hei kai ma taua apopo.
- 29
- Na, kohuatia ana e maua taku tamaiti, kainga ana e maua; na, ko taku meatanga atu ki a ia i te aonga ake, Homai to tamaiti hei kai ma taua. Na, hunā ana e ia tana tamaiti.
- 30
- Te rongonga o te kingi i nga kupu a taua wahine, haea ana e ia ona kakahu, a, i a ia e haere atu ana i runga i te taiepa, ka kite te iwi, na, he kakahu taratara tena kei roto atu kei tona kiri.
- 31
- Na, ko tana meatanga ake, Kia meatia mai tenei ki a au e te Atua, me tetahi atu mea ano hoki, ki te u te mātenga o Eriha tama a Hapata ki runga ki a ia aianei.
- 32
- Na, kei te noho tera a Eriha i roto i tona whare, ratou tahi ko nga kaumatua e noho ana. Na, kua ungā mai e tera te tangata i tona aroaro. Kiano te karere i tae noa mai ki a ia, ka mea ia ki nga kaumatua, Kia kite koutou kua unga tangata mai tenei tama a te kai kohuru ki te tango i toku upoko. Kia mohio koutou; e tae mai te karere, tutakina te tatau; kia u te pupuri i a ia ki te tatau. He teka ianei kei muri i a ia te tapuae o nga waewae o tona ariki.
- 33
- I a ia ano e korero ana ki a ratou, na, ko te karere i haere mai ki a ia. Ano ra ko ia, Nana, na Ihowa tenei kino; ko te aha ake taku e tatari atu ai i a Ihowa?
Address: 
Phone: 
Email: