- 1
- A ka iti nei te haerenga atu o Rawiri i te tihi o te maunga, na, ko Tipa ko te tangata a Mepipohete kua tutaki ki a ia, me nga kaihe e rua, whakanoho rawa, e waha ana i etahi taro e rua nga rau, me etahi tautau karepe maroke kotahi rau, me etahi hua o te raumati kotahi rau, me tetahi ipu waina.
- 2
- Na, ka mea te kingi ki a Tipa, Hei aha enei mau? A ka mea a Tipa, Hei eke ma te whare a te kingi nga kaihe; hei kai ma nga tamariki te taro me nga hua raumati; a, hei inu te waina ma te hunga e ngenge ana i te koraha.
- 3
- Na, ko te meatanga mai a te kingi, A kei hea te tama a tou ariki? Ano ra ko Tipa ki te kingi, Kei Hiruharama tera e noho ana; i mea hoki, Ko aianei te whare o Iharaira whakahoki mai ai i te kingitanga o toku pāpā, ki a au.
- 4
- Katahi te kingi ka mea mai ki a Tipa, Nana, māu katoa nga mea a Mepipohete. Na, ko te meatanga atu a Tipa, Tenei ahau te piko atu nei; kia manakohia mai ahau e koe, e toku ariki, e te kingi.
- 5
- A, te taenga atu o Kingi Rawiri ki Pahurimi, na, ko te putanga mai o tetahi tangata i reira, no te hapu o te whare o Haora, tona ingoa ko Himei, he tama na Kera: haere mai ana ia me te kanga haere.
- 6
- A, epaina atu ana e ia ki te kohatu a Rawiri me nga tangata katoa a Kingi Rawiri; na, te iwi katoa, ratou ko nga toa katoa kei tona matau, kei tona maui.
- 7
- Ko te kupu hoki tenei a Himei i a ia e kanga ana, Puta mai, puta mai, e te tangata toto, e te tangata o Periara.
- 8
- Kua whakahokia mai e Ihowa ki a koe nga toto katoa o te whare o Haora; ko koe na hoki te kingi i muri i a ia; kua hoatu ano hoki e Ihowa te kingitanga ki te ringa o Apoharama, o to tama. Na, kei tou kino na ano koe, he tangata toto na hoki koe.
- 9
- Katahi ka mea a Apihai tama a Teruia ki te kingi, He aha tera kuri mate i kanga ai ki toku ariki, ki te kingi? tena, kia whiti atu ahau ki te pouto i tona upoko.
- 10
- Na, ko te meatanga mai a te kingi, Hei aha maku ta korua, e nga tama a Teruia? Mana ra e kanga; kua mea nei hoki a Ihowa ki a ia, Kangā a Rawiri. A, ma wai e mea, He aha koe i pena ai?
- 11
- I mea ano hoki a Rawiri ki a Apihai ratou ko ana tangata katoa, Nana, ko taku tamaiti i puta nei i roto i oku whekau te whai nei kia whakamatea ahau; na, tera noa ake aianei he mea ma tenei Peniamini. Tukua ia kia kanga; na Ihowa hoki i mea ki a ia.
- 12
- Tera pea a Ihowa e titiro mai ki toku matenga, e homai i te pai ki a au hei utu mo tana kanga i tenei ra.
- 13
- Na, haere ana a Rawiri ratou ko ana tangata i te huarahi; me te haere ano a Himei i te taha o te maunga i tona ritenga mai: haere ana me te kanga, me te epa mai i te kohatu ki tona ritenga mai, me te akiri ano i te puehu.
- 14
- Heoi haere ngenge mai ana te kingi, ratou ko tona nuinga, a, okioki ana ki reira.
- 15
- Na, haere mai ana a Apoharama ratou ko te iwi katoa, nga tangata a Iharaira ki Hiruharama; ko Ahitopere ano hoki tona hoa.
- 16
- A, te taenga mai o Huhai Araki, o te hoa o Rawiri, ki a Apoharama, na, ka mea a Huhai ki a Apoharama, Kia ora te kingi, kia ora te kingi!
- 17
- Na, ko te meatanga mai a Apoharama ki a Huhai, Ko tou aroha tena tou hoa? He aha koe tē haere tahi ai i tou hoa?
- 18
- Na, ka mea a Huhai ki a Apoharama, Kahore, engari ko ta Ihowa, ratou ko tenei iwi, ko nga tangata katoa o Iharaira e whiriwhiri ai, kei a ia he tikanga moku, me noho ano hoki ahau ki a ia.
- 19
- Na, tetahi, kia mahi ahau ki a wai? kaua ianei ahau e mahi ki te aroaro o tana tama? ka rite ki taku mahi ki te aroaro o tou pāpā taku ki tou aroaro.
- 20
- Na, ka mea a Apoharama ki a Ahitopere, Tena koa a koutou whakaaro, me aha tatou?
- 21
- Na, ko te meatanga mai a Ahitopere ki a Apoharama, Haere ki nga wahine iti a tou pāpā, i waiho nei e ia hei tiaki i te whare, a ka rongo a Iharaira katoa kua piro whakarihariha koe ki tou pāpā, na, ka kaha nga ringa o tou nuinga katoa.
- 22
- Na, whakaturia ana tetahi teneti e ratou mo Apoharama ki runga ki te tuanui; a, haere ana a Apoharama ki roto ki nga wahine iti a tona pāpā i te tirohanga a Iharaira katoa.
- 23
- Na, te whakaaro a Ahitopere i whakaaro ai ia i aua ra, me te mea e uia ana he tikanga ki ta te Atua kupu. Pera tonu nga whakaaro katoa a Ahitopere ki a Rawiri, ki a Apoharama ano hoki.
Address: 
Phone: 
Email: