2nd Samuel Chapter 20 - Paipera Tapu 1868 | Te Paipera Tapu 1868

2nd Samuel Chapter 20 - Paipera Tapu 1868

1
Na, i reira tetahi tangata o Periara, tona ingoa ko Hepa, he tama na Pikiri, no Peniamine: na, whakatangihia ana e ia te tētere, a ka mea, Kahore o tatou wahi i roto i a Rawiri, kahore ano hoki he wahi tūturu mo tatou i roto i te tama a Hehe. Ki o koutou teneti, e tera, e tera o Iharaira!
2
Na, ka takiritia mai nga tangata katoa o Iharaira i te whai i a Rawiri; kei te whai i a Hepa tama a Pikiri: ko nga tangata ia o Hura i piri ki to ratou kingi, o Horano mai ano a Hiruharama atu ana.
3
Na, haere ana a Rawiri ki tona whare ki Hiruharama; a ka mau te kingi ki nga wahine kotahi tekau, ki nga wahine iti i waiho nei e ia hei tiaki i te whare, a whakanohoia ana ki roto ki te whare kia tiakina, atawhaitia iho ratou e ia; otiia kihai ia i haere ki roto ki a ratou. Na, tutakina atu ana ratou, he noho pouaru, a, taea noatia te ra i mate ai ratou.
4
Na, ka mea te kingi ki a Amaha, Huihuia mai nga tangata o Hura ki a au i roto i enei rangi e toru, kia tu ano hoki koe ki konei.
5
Na, haere ana a Amaha ki te huihui i a Hura: otiia i roa atu i te wa i whakaritea ki a ia.
6
Katahi a Rawiri ka mea ki a Apihai, Akuanei rahi atu te kino a Hepa tama a Pikiri ki a tatou i ta Apoharama. Tangohia e koe nga tangata a tou ariki, ka whai i a ia; kei tupono atu ki nga pa taiepa, a ka ora atu i o tatou kanohi.
7
Na, haere atu ana nga tangata a Ioapa i muri i a ia, me nga Kereti, ratou ko nga Pereti, ko te hunga marohirohi katoa: haere atu ana ratou i roto i Hiruharama ki te whai i a Hepa i te tama a Pikiri.
8
I a ratou i te kohatu nui i Kipeono, ka haere mai a Amaha ki to ratou aroaro. Na, te kakahu i kakahuria e Ioapa, he mea whitiki, a i waho ake he whitiki ano, me tetahi hoari, he mea whakamau ki tona hope, i roto ano i tona pukoro; a, i a ia e haere ana, ka marere.
9
Na, ka mea a Ioapa ki a Amaha, Kei te ora ranei koe, e toku teina? Na, ka mau te ringa matau o Ioapa ki te kumikumi o Amaha, he mea kia kihi ai i a ia.
10
Kihai hoki a Amaha i mahara iho ki te hoari i te ringa o Ioapa. Na, werohia mai ana ia i te rima o nga rara, a ka maringi ona whekau ki te whenua, kihai ano hoki i tuaruatia te patu a tera; na, ka mate. Katahi ka whai a Ioapa raua ko tona teina ko Apihai i a Hepa i te tama a Pikiri.
11
A, i tu ano ki tona taha tetahi o nga tangata a Ioapa, i mea, Te tangata e pai ana ki a Ioapa, me nga tangata a Rawiri, hei tuara koutou mo Ioapa.
12
Heoi oke ana tera a Amaha i roto i nga toto i waenganui o te huarahi. A ka kite taua tangata e tu ana te iwi katoa, na, ka nekehia atu a Amaha e ia i te huarahi ki te parae, hipokina iho ki te kakahu, i tona kitenga e tu ana te hunga katoa i haere mai ki tona takotoranga.
13
Ka oti ia te neke atu i te huarahi na, haere ana nga tangata katoa i muri i a Ioapa, ki te whai i a Hepa tama a Pikiri.
14
Na, haereerea ana e ia nga iwi katoa o Iharaira, ki Apere, ara, ki Petemaaka, ki nga Peri katoa ano hoki: na, ka huihui ratou, a, haere ana ano ratou i muri i a ia.
15
Na, haere mai ana ratou, whakapaea ana ia ki Apere-petemaaka, a haupuria ana e ratou he pukepuke hei tatauranga atu ki te pa: na, kua tu tera ki roto i te pekerangi. Na, kei te aki te nuinga katoa o Ioapa i te taiepa kia hinga.
16
Katahi ka karanga mai tetahi wahine mohio i roto i te pa, Whakarongo mai, whakarongo mai, Tena, ki atu ki a Ioapa, Whakatata mai ki konei, kia korero atu ai ahau ki a koe.
17
Na, ka whakatata atu ia ki a ia, ka mea te wahine, Ko koe ianei a Ioapa? Ka mea mai tera, Tenei au. Na, ko te kianga atu a tera ki a ia, Whakarongo mai ki nga kupu a to pononga. Ka whakahokia mai e ia, E whakarongo atu nei ahau.
18
Katahi ia ka korero atu, ka mea, i korero nui ano ratou i te timatanga, i mea, Tera ratou ka ui mai ki Apere, a ka whakaotia e ratou.
19
He ata noho, he pono ahau i roto i a Iharaira. E whai ana koe kia whakangaromia he pa, he whaea hoki no Iharaira: he aha ka horomia ai e koe te wahi tupu o Ihowa?
20
Na, ko te whakahokinga mai a Ioapa; i mea ia, Hore rawa, hore rawa; e kore e horomia, e kore e hunā e ahau.
21
Kahore aku pera, engari he tangata tera no Maunga Eperaima, tona ingoa ko Hepa tama a Pikiri, kua ara mai tona ringa ki te kingi, ki a Rawiri: homai tona kotahi e koutou, a ka haere atu ahau i te pa. Katahi taua wahine, ka ki atu ki a Ioapa, Nana, me akiri atu tona upoko i runga i te taiepa.
22
Na, haere ana taua wahine, me tana whakaaro mohio, ki te iwi katoa; a, poutoa ana e ratou te upoko o Hepa tama a Pikiri, makā atu ana ki a Ioapa. Katahi ia ka whakatangi i te tētere, whakarerea ana e ratou te pa, pakaru noa atu ana ki tona teneti, ki tona teneti. A, hoki ana a Ioapa ki Hiruharama ki te kingi.
23
Na, ko Ioapa te rangatira o te ope katoa o Iharaira, a, ko Penaia tama a Iehoiara te rangatira o nga Kereti ratou ko nga Pereti:
24
Ko Arorama te rangatira takoha: ko Iehohapata tama a Ahiruru te kai whakamaharahara.
25
Ko Hewha ano hoki te kai tuhituhi, a, ko Haroko raua ko Apiatara nga tohunga.
26
He tangata nui ano hoki na Rawiri a Ira Hairi.