- 1
- Na, ko nga kupu whakamutunga enei a Rawiri. He ki tenei na Rawiri tama a Hehe, he ki hoki na te tangata i whakaarahia ki runga, na ta te Atua o Hakopa i whakawahi ai, na te kai himene ahuareka a Iharaira;
- 2
- He kai whakapuaki ahau i te kupu a te Wairua o Ihowa: kei toku arero ano hoki tana korero.
- 3
- I korero mai te Atua o Iharaira, i mea mai te kamaka o Iharaira ki a au, Kia tika te kai whakatakoto tikanga mo nga tangata: me whakatakoto tikanga i runga i te wehi ki a Ihowa.
- 4
- A ka rite ki te maramatanga o te ata ina whiti te ra o te ata kahore nei he kapua; ki te tupu hou o te whenua i te mea ka whiti te ra i te maonga o te ua.
- 5
- Ahakoa e kore toku whare e pena i te aroaro o te Atua, heoi kua takoto tana kawenata, u tonu, ki a au, rite rawa nga aha katoa, mau rawa: heoi katoa hoki toku whakaoranga ko tenei, heoi katoa hoki taku e whakaahuareka ai: otiia kihai i meinga e ia kia tupu.
- 6
- Ko nga tamariki ia a Periara, ka rite katoa ratou ki nga tataramoa e aia atu ana, e kore nei e hopukia atu e te ringa.
- 7
- A, e whakatata atu te tangata, kia kapi i te rino, kia mau hoki ki te kakau o te tao: me tahu rawa ano hoki ki te ahi i taua wahi na ano.
- 8
- Ko nga ingoa enei o nga tangata marohirohi a Rawiri, Ko Iohepe-pahepete Takamoni, he tino rangatira ia; ko Arino Eteni ano ia. I ara ake tana tao ki nga rau e waru, patua iho e ia i te whakaekenga kotahi.
- 9
- I muri i a ia ko Ereatara tama a Roro Ahohi; ko ia tetahi o nga tangata marohirohi, o nga hoa tokotoru o Rawiri i ta ratou whakataranga ki nga Pirihitini i huihui mai ki reira ki te whawhai, i te mea kua riro nga tangata o Iharaira.
- 10
- Whakatika ana ia, a patua iho nga Pirihitini, a, ngenge noa tona ringa, piri noa tona ringa ki te hoari; a, nui atu te whakaoranga i whakaora ai a Ihowa i taua ra; a hoki mai ana te iwi ki muri i a ia, he hui kau i nga parakete.
- 11
- A, i muri i a ia ko Hamaha tama a Ake Harari. Na, te huihuinga mai o nga Pirihitini ki te taua, ki tetahi wahi oneone e kapi ana i nga pi; a, rere ana te iwi i te aroaro o nga Pirihitini.
- 12
- Heoi tu ana tera i waenganui o taua wahi, na, ka mau i a ia, patua iho e ia nga Pirihitini: na, nui atu te whakaoranga i whakaora ai a Ihowa.
- 13
- Na, ka haere atu etahi rangatira tokotoru, no te toru tekau, ki raro, a ka tae ki a Rawiri i te kotinga witi ki te ana o Aturama: a, i te noho tera te ope o nga Pirihitini i Raorao Repaima.
- 14
- Na, i roto a Rawiri i te pourewa i taua wa; i Pete-rehema ano hoki nga hoia pupuri a nga Pirihitini i taua wa na ano.
- 15
- Na, ka minamina a Rawiri, a ka mea, Aue, tē ai he tangata hei mea wai moku i roto i te puna i Pete-rehema, i tera i te kuwaha!
- 16
- Na, tika ana aua toa tokotoru na waenganui o te puni o nga Pirihitini, a, utuhia mai ana he wai i te puna o Pete-rehema, i tera i te kuwaha, a, tangohia mai ana e ratou, mauria ana ki a Rawiri: otiia kihai ia i pai ki te inu, na, ringitia ana e ia hei mea ki a Ihowa.
- 17
- A ka mea, Aue, kia meatia tenei e ahau, e Ihowa! ehara ianei tenei i te toto o nga tangata me i kotahi nei kua mate, i a ratou ra i haere? Na, kihai ia i pai ki te inu. Ko enei nga mahi a aua marohirohi tokotoru.
- 18
- Na, ko Apihai teina o Ioapa tama a Teruia te rangatira o nga tangata tokotoru. A, i ara ake ano tana tao ki nga rau e toru, patua iho e ia; i whai ingoa hoki ia i roto i te tokotoru.
- 19
- He teka ianei poua te kororia nui o te tokotoru? a meinga ana hei rangatira mo ratou, otiia kihai ia i uru ki te tokotoru tuatahi.
- 20
- Me Penaia ano hoki tama a Iehoiara, he tama na tetahi tangata toa, no Kapateere, he nui ana mahi; tokorua nga tangata o Moapa, koia ano kei te raiona, i patua e ia: i haere ano ia ki raro, a, patua ana e ia tetahi raiona i roto i te rua i te wa o te hukarere.
- 21
- Nana hoki tetahi Ihipiana i patu, he tangata ataahua: he tao ano hoki kei te ringa o taua Ihipiana; heoi haere ana ia ki raro ki a ia, he tokotoko hoki tana, na, tangohia mai ana e ia te tao i roto i te ringa o te Ihipiana, a, werohia ana ia ki tana tao ano.
- 22
- Na Penaia tama a Iehoiara enei mahi; i whai ingoa ano hoki ia i roto i nga marohirohi tokotoru.
- 23
- Nona te kororia nui o te toru tekau; otiia kihai i uru ki te tokotoru tuatahi. Na, meinga ana ia e Rawiri hei rangaatira mo ona takahoa.
- 24
- Ko Atahere teina o Ioapa tetahi o te toru tekau: ko Erehanana, tama a Roro o Pete-rehema.
- 25
- Ko Hamaha Harori; ko Erika Harori;
- 26
- Ko Herete Parati; ko Ira tama a Ikehe Tekoi;
- 27
- Ko Apietere Anetoti; ko Mepunai Huhati;
- 28
- Ko Taramono Ahohi: ko Maharai Netopati;
- 29
- Ko Herepe tama a Paana he Netopati; ko Itai tama a Ripai, no Kipea, no nga tamariki a Peniamine;
- 30
- Ko Penaia Piratoni; ko Hirai, no nga awaawa o Kaaha;
- 31
- Ko Api-arapono Arapati; ko Atamawete Parahumi;
- 32
- Ko Eriahapa Haaraponi, no nga tama a Iahene; ko Honatana;
- 33
- Ko Hamaha Harari; ko Ahiama tama a Harara Harari;
- 34
- Ko Eriperete tama a Ahahapai tama a te Maakati, ko Eriama tama a Ahitopere Kironi;
- 35
- Ko Heterai Karameri; ko Paarai Arapi;
- 36
- Ko Ikara tama a Natana o Topa; ko Pani Kari;
- 37
- Ko Tereke Amoni; ko Nahari Peeroti, ko te kai mau o nga patu a Ioapa tama a Teruia;
- 38
- Ko Ira, he Itiri ia; ko Karepa, he Itiri ia;
- 39
- Ko Uria Hiti; ki te huihuia, e toru tekau ma whitu.
Address: 
Phone: 
Email: