- 1
- Na, he roa te pakanga a te whare o Haora ki te whare o Rawiri: a ka kake haere a Rawiri; ko te whare ia o Haora i ngoi-kore haere.
- 2
- A, i whanau etahi tamariki ma Rawiri ki Heperona: ko Amanono tana matamua, na Ahinoama Ietereeri;
- 3
- Ko Kireapa ano hoki tāna tuarua, na Apikaira wahine a Napara Karameri; a, ko Apoharama te tuatoru, he tama na Maaka tamahine a Taramai kingi o Kehuru;
- 4
- Na, ko Aronia te tuawha, he tama na Hakiti; a, ko Hepatia te tuarima, he tama na Apitara;
- 5
- A, ko Itireama te tuaono, na Ekera wahine a Rawiri. I whanau enei a Rawiri ki Heperona.
- 6
- A, i te mea e whawhai ana te whare o Haora ki te whare o Rawiri, na, ka whakanui a Apanere i te kaha mona, ara, mo te whare o Haora.
- 7
- Na, he wahine iti ta Haora i mua, ko Ritipa te ingoa, he tamahine na Aia: na, ko te meatanga mai a Ihi-pohete ki a Apanere, He aha koe i haere ai ki roto ki te wahine a toku pāpā?
- 8
- Na, mura rawa te riri a Apanere i nga kupu a Ihi-pohete, a ka mea ia, He upoko kuri koia ahau i kino nei ki a Hura, a he atawhai nei taku hanga i tenei ra ki te whare o Haora o tou pāpā, ki ona teina, ki ona whanaunga, kihai ano hoki i tuku i a koe ki te ringaringa o Rawiri, i uta ai koe inaianei i te he ki runga ki a au mo tenei wahine?
- 9
- Kia meatia tenei e te Atua ki a Apanere, me etahi atu mea ano hoki, engari ko ta Ihowa i oati ai mo Rawiri, ko taku tena e mea ai ki a ia.
- 10
- Ka whakawhitia atu hoki te kingitanga i te whare o Haora, a, ka whakapumautia te torona o Rawiri i roto i a Iharaira, i roto ano hoki i a Hura, o Rana mai ano, a Peere-hepa atu ana.
- 11
- Heoi kihai i taea e ia te whakahoki kupu atu ki a Apanere, i te wehi i a ia.
- 12
- Katahi a Apanere ka unga tangata atu ki a Rawiri, he mea nāna ake, hei ki atu, No wai te whenua? hei mea hoki, Whakaritea tau kawenata ki a au, a ka huihuia atu toku ringa ki a koe kia meinga ai a Iharaira katoa kia anga ki a koe.
- 13
- Na, ko te meatanga mai a tera, E pai ana, Me whakarite kawenata ahau ki a koe: kotahi ano ia taku mea e tono ai ahau i a koe, ara, E kore koe e kite i toku mata, ki te kahore e kawea mai e koe a Mikara te tamahine a Haora, ina haere mai koe kia kite i toku mata.
- 14
- A, i unga tangata ano a Rawiri ki a Ihi-pohete tama a Haora, hei mea atu, Homai taku wahine a Mikara i taumautia e ahau maku ki nga kiri matamata kotahi rau o nga Pirihitini.
- 15
- Na, ka unga tangata atu a Ihi-pohete ki te tango mai i a ia i tona tahu i a Paratiere tama a Raihi.
- 16
- A, i haere tahi mai ano tona tahu i a ia, me te tangi haere ano i muri i a ia, a tae noa ki Pahurimi. Na, ka mea a Apanere ki a ia, Haere koe, e hoki. A, hoki ana ia.
- 17
- Na, ka korero a Apanere ki nga kaumatua o Iharaira, ka mea, I rapu koutou i a Rawiri i mua ake nei hei kingi mo koutou.
- 18
- Na, tena ra; ko ta Ihowa korero hoki tenei mo Rawiri, I ki ia, Ko te ringa o Rawiri o taku pononga taku hei whakaora mo toku iwi mo Iharaira i roto i te ringa o nga Pirihitini, i roto ano hoki i te ringa o o ratou hoa riri katoa.
- 19
- A, i korero ano a Apanere ki nga taringa o Peniamine; i haere ano hoki a Apanere, a korerotia ana e ia ki nga taringa o Rawiri i Heperona nga mea katoa e pai ana ki te titiro iho a Iharaira, ki te titiro iho ano hoki o te whare katoa o Peniamine.
- 20
- Na, ka haere a Apanere ki a Rawiri ki Heperona, e rua tekau hoki nga tangata ona hoa. A, tukua ana e Rawiri he hakari ma Apanere ratou ko ona hoa.
- 21
- Na, ko te meatanga mai a Apanere ki a Rawiri, Ka whakatika ahau, ka haere, ka huihui mai i a Iharaira katoa ki toku ariki ki te kingi; a, ma ratou e whakarite kawenata ki a koe, a hei kingi koe mo nga mea katoa e hiahia ai tou wairua. Na, tukua atu ana a Apanere e Rawiri, a haere marie ana ia.
- 22
- Na, ko te haerenga mai o nga tangata a Rawiri ratou ko Ioapa i te whai taua, he nui ano hoki nga taonga i kawea mai e ratou: ko Apanere ia kahore i a Rawiri i Heperona; i tukua atu hoki ia, a haere marie ana.
- 23
- A, te taenga mai o Ioapa ratou ko tana ope katoa, na, ka korerotia te korero ki a Ioapa, I haere mai a Apanere tama a Nere ki te kingi; a, tukua atu ana e ia, a, haere marie ana ia.
- 24
- Na, ka haere mai a Ioapa ki te kingi, a ka mea, He mahi aha tenei au? Nana, i haere mai a Apanere ki a koe: na te aha ia i tukua atu nei e koe, a haere noa atu ana?
- 25
- E mohio ana koe ki a Apanere tama a Nere; i haere mai ia ki te tinihanga i a koe, kia mohio ai ia ki to haerenga atu, ki to haerenga mai, kia mohio ai hoki ki nga mea katoa e mea ai koe.
- 26
- Na, ka puta mai a Ioapa ki waho i te aroaro o Rawiri, a unga tangata atu ana ia ki te whai i a Apanere, a whakahokia mai ana ia e ratou i te puna i Hiraha; ko Rawiri ia kihai i mohio.
- 27
- A, te hokinga mai o Apanere ki Heperona, i a ia ano i te kuwaha, ka kawea e Ioapa ki tahaki; i mea kia ata korero ai ia ki a ia. Na, patua ana ia i reira i te tuarima o nga rara, mate rawa mo nga toto hoki o Atahere o tona teina.
- 28
- A, te rongonga o Rawiri i muri iho, ka mea, Kahore he hara oku, o toku kingitanga, i nga toto o Apanere tama a Nere i te aroaro o Ihowa, a, ake, ake, ake.
- 29
- Kia u iho ki runga ki te mātenga o Ioapa, ki runga hoki i te whare katoa o tona pāpā: kaua hoki e whakamutua i roto i te whare o Ioapa te mate rere, te repera, te pupuri tokotoko, te hinga i te hoari, me te kore taro.
- 30
- Heoi patua iho a Apanere e Ioapa raua ko Apihai ko tona teina hei utu mo to raua teina, mo Atahere, i whakamatea nei e ia ki Kipeono i te tatauranga.
- 31
- Na, ka mea a Rawiri ki a Ioapa ratou ko tona nuinga katoa, Haea o koutou kakaku, whitikiria hoki he kakahu taratara ki a koutou, ka tangi ai ki a Apanere. A, i haere ano a kingi Rawiri i muri i te amo.
- 32
- Na, tanumia ana e ratou a Apanere ki Heperona, a ka puaki te reo o te kingi, tangi ana ia ki te tanumanga o Apanere; i tangi ano hoki te iwi katoa.
- 33
- Katahi ka waiata apakura te kingi ki a Apanere, ka mea, Rite tonu ki te matenga o te wairangi, te matenga o Apanere.
- 34
- Kihai ou ringa i herea, kihai ano hoki ou waewae i paiherea ki nga rahiri: rite tonu tou hinganga ki te hinganga o te tangata i te aroaro o nga tamariki a te kino. I tangi ano hoki te iwi katoa ki a ia.
- 35
- Na, ka haere mai te iwi katoa ki te mea i a Rawiri kia kai i te kai i te mea e awatea ana ano. Na, ka oati a Rawiri, ka mea, Kia meatia mai tenei e te Atua ki a au, me etahi atu mea ano hoki, ki te pa ahau ki te taro, ki tetahi atu mea ranei, i te mea kahore ano i to noa te ra.
- 36
- Na, ka mohio mai te iwi katoa, a pai tonu ki ta ratou titiro mai; i pera tonu ano me nga mea katoa i meatia e te kingi, he pai kau ki te titiro mai a te iwi katoa:
- 37
- Na, ka matau te iwi katoa ratou ko Iharaira katoa i taua rangi ehara i te kingi nana i mea kia whakamatea a Apanere tama a Nere.
- 38
- I mea hoki te kingi ki ana tangata, Kahore ianei koutou i matau, he rangatira, he tangata nui, kua hinga nei i roto i a Iharaira?
- 39
- Ko au ia, ahakoa i whakawahia hei kingi, e kaha-kore ana inaianei, a, e kaha rawa ana i a au enei tangata, nga tama a Teruia. Ka rite ki tona kino ta Ihowa utu ki te kai mahi o te kino.
Address: 
Phone: 
Email: