- 1
- Katahi te kingi ka unga tangata atu, a, huihuia mai ana e ratou nga kaumatua katoa o Hura, o Hiruharama, ki a ia.
- 2
- Na, haere ana te kingi ki te whare o Ihowa, ratou tahi ko nga tangata katoa o Hura, ko nga tangata katoa ano hoki o Hiruharama, me nga tohunga, me nga poropiti, me te iwi katoa, te iti, te rahi. Katahi ka korerotia e ia ki o ratou taringa nga kupu katoa o te pukapuka o te kawenata i kitea nei ki te whare o Ihowa.
- 3
- Na, tu ana te kingi ki te taha o te pou, a, whakaritea ana e ia he kawenata ki te aroaro o Ihowa, ara, kia whakapaua tona ngakau, tona wairua, ki te whai ki a Ihowa, ki te pupuri i ana whakahaunga, i ana whakaaturanga, i ana tikanga, ki te whakamana ano i nga kupu o tenei kawenata kua tuhituhia nei ki tenei pukapuka. Tu tonu ano hoki te iwi katoa ki te kawenata.
- 4
- Katahi te kingi ka whakahau atu ki te tino tohunga ki a Hirikia ratou ko nga tohunga tuarua, ko nga kai tiaki o te kuwaha, kia whakaputaina mai ki waho o te temepara o Ihowa nga oko katoa i hangā ma Paara, mo te ngahere, ma te ope katoa o te rangi. Na, tahuna ana aua mea e ia ki waho o Hiruharama ki nga mara i Kitirono, kawea ana nga pungarehu ki Pete-ere.
- 5
- I whakakahoretia ano hoki e ia nga tohunga whakapakoko i whakaritea e nga kingi o Hura hei tahu whakakakara ki runga ki nga wahi tiketike, ki nga pa o Hura, ki nga taha ano hoki o Hiruharama, ratou ko nga kai tahu whakakakara ki a Paara, ki te ra, ki te marama, ki nga whetu, ki te ope katoa ano hoki o te rangi.
- 6
- I kawea mai ano e ia te ngahere i roto i te whare o Ihowa ki waho o Hiruharama ki Awa Kitirono, tahuna ana e ia ki Awa Kitirono, tukia ana kia ririki, ano he puehu, makā ana te puehu o taua mea ki runga ki nga tanumanga o nga tamariki a te iwi.
- 7
- Wahia iho ano hoki e ia nga whare o te hunga whaka-horoma i te taha o te whare o Ihowa, i te wahi i whatu ai nga wahine i nga pa mo te ngahere.
- 8
- I whakaputaina mai ano hoki e ia nga tohunga katoa i roto i nga pa o Hura, whakapokea iho nga wahi tiketike i tahu whakakakara ai nga tohunga, no Kepa, a tae noa ki Peere-hepa. Wahia iho ano hoki e ia nga wahi tiketike o nga keti, era i te kuwaha o te keti o Hohua kawana o te pa, i to te tangata taha maui i te keti o te pa.
- 9
- Kihai ia nga tohunga o nga wahi tiketike i haere ki te aata o Ihowa i Hiruharama; engari i kai ratou i te taro rewena-kore i roto i o ratou teina.
- 10
- I whakapokea ano a Topete e ia, tera i te raorao o nga tamariki a Hinomo; kei mea tetahi tangata kia tika tana tamaiti, tana tamahine ranei, na waenganui i te ahi hei mea ki a Moreke.
- 11
- I whakakahoretia ano e ia nga hoiho i homai e nga kingi o Hura hei mea ki te ra, i te tomokanga atu o te whare o Ihowa, i te ruma o Natana-mereke o te unaka, i nga wahi o waho. Tahuna ana hoki e ia nga hariata o te ra ki te ahi.
- 12
- Na, nga aata ano hoki i te tuanui o to runga ruma a Ahata, era i hangā nei e nga kingi o Hura, me nga aata i hangā e Manehe ki nga marae e rua o te whare o Ihowa, pakarua ana e te kingi, wahia iho i reira, makā ana te puehu o aua mea ki Awa Kitirono.
- 13
- Me nga wahi tiketike ano hoki, era i te ritenga mai o Hiruharama i te taha ki matau o te Maunga Whakangaromanga, i hangā nei e Horomona kingi o Iharaira ma Ahatorete, ma te mea whakarihariha a nga Haironi, ma Kemoho ma te mea whakarihariha a nga Moapi, ma Mirikomo ma te mea whakarihariha a nga tamariki a Amona, whakapokea iho era e te kingi.
- 14
- Wawahia ana hoki e ia nga pou, tuakina ana nga ngahere, whakakiia ana o ratou wahi ki nga wheua tangata.
- 15
- Me te aata ano hoki i Pete-ere, te wahi tiketike i hangā nei e Ieropoama tama a Nepata i mea nei i a Iharaira kia hara, ko taua aata, me te wahi tiketike ano hoki, wawahia iho e ia; tahuna atu ana te wahi tiketike, tukia ana kia ririki, ano he puehu: i tahuna ano hoki e ia te ngahere.
- 16
- A, te tahuritanga atu o Hohia, ka kite i nga tanumanga i reira i te maunga. Katahi ia ka unga tangata atu ki te tiki i nga wheua i roto i nga tanumanga. Na, tahuna ana e ia ki runga ki te aata, whakapokea iho, hei whakaritenga mo te kupu a Ihowa i korerotia e te tangata a te Atua, i korero nei i enei kupu.
- 17
- Na, ko tana meatanga ake, He aha tenei tohu ka kite nei au? Ano ra ko nga tangata o te pa ki a ia, Ko te tanumanga tenei o te tangata a te Atua i haere mai i Hura, a korerotia ana e ia enei mea kua meatia nei e koe ki te aata i Pete-ere.
- 18
- Katahi ia ka mea atu, Waiho tera, Kei whakakorikoria ona wheua e tetahi tangata. Na, kapea ana e ratou ona wheua me nga wheua o te poropiti i haere mai i Hamaria.
- 19
- Na, nga whare katoa ano hoki o nga wahi tiketike, era i nga pa o Hamaria i hangā e nga kingi o Iharaira hei whakapataritari i a Ihowa, whakakahoretia ana e Hohia; rite tonu tana i mea ai ki aua whare ki nga mea katoa i mea ai ia ki Pete-ere.
- 20
- I patua ano e ia nga tohunga katoa o nga wahi tiketike o reira ki runga ki nga aata, tahuna ana hoki nga wheua tangata ki runga ki aua aata, a, hoki ana ki Hiruharama.
- 21
- Katahi te kingi ka whakahau ki te iwi katoa, ka mea, Mahia te kapenga hei mea ki a Ihowa ki to koutou Atua; kia rite ki te mea i tuhituhia ki te pukapuka, o tenei kawenata;
- 22
- He pono kahore he rite mo tena mahinga i te kapenga o nga rangi ra ano i nga kai whakarite whakawa i whakarite whakawa mo Iharaira, o nga rangi katoa ano hoki i nga kingi o Iharaira, i nga kingi ano o Hura.
- 23
- Engari tenei i te tekau ma waru o nga tau o Kingi Hohia, tenei kapenga i mahia nei ki a Ihowa ki Hiruharama.
- 24
- Na, te hunga i whai ki nga atua maori, ki nga mata maori, ki nga terapimi, ki nga whakapakoko, ki nga mea whakarihariha katoa i kitea ki te whenua o Hura ki Hiruharama, whakakahoretia iho e Hohia, hei whakamana mo nga kupu o te ture i tuhituhia ki te pukapuka i kitea e Hirikia tohunga ki te whare o Ihowa.
- 25
- Na, kahore he kingi i mua i a ia hei rite mona te whakapau o tona ngakau, o tona wairua, o tona kaha, ki te tahuri atu ki a Ihowa ki te whakarite i te ture katoa a Mohi; kahore ano hoki kia whakatika tetahi rite mona i muri i a ia.
- 26
- Heoi kihai ano a Ihowa i tahuri atu i te muranga o tana riri nui i mura ai tana riri ki a Hura, mo nga whakapataritaringa katoa i whakapataritari ai a Manahe i a ia.
- 27
- Na, ko te meatanga a Ihowa, Me neke atu ano hoki a Hura e ahau i toku aroaro, me pera ano me ahau i neke atu i a Iharaira; ka whakaparahako ano hoki ahau ki tenei pa ki Hiruharama i whiriwhiria nei e ahau, me te whare i ki ra ahau, Me waiho toku ingoa ki konei.
- 28
- Na, era atu meatanga a Hohia me ana mahi katoa, kihai ianei i tuhituhia ki te pukapuka o nga meatanga o nga ra o nga kingi o Hura.
- 29
- I ona ra ka haere atu a Paraoneko kingi o Ihipa ki te kingi o Ahiria ki Awa Uparati. Na, haere mai ana a Kingi Hohia ki te whakatau i a ia. Whakamatea iho ia e tera ki Mekiro i tona kitenga i a ia.
- 30
- Katahi ana tangata ka uta i tona tinana ki runga ki te hariata i Mekiro, a, kawea ana ia ki Hiruharama, tanumia iho e ratou ki tona tanumanga. Na, ka mau te iwi o tera whenua ki a Iehoahata ki te tama a Hohia, a, whakawahia ana ia e ratou, meinga ana hei kingi i muri i tona pāpā.
- 31
- E rua tekau ma toru nga tau o Iehoahata i tona kingitanga ai; a, e toru nga marama i kingi ai ia ki Hiruharama. Na, te ingoa o tona whaea, ko Hamutara, he tamahine na Heremaia o Ripina.
- 32
- A, he kino tana mahi ki te titiro a Ihowa; rite tonu ki nga mea katoa i mea ai ona mātua.
- 33
- Heoi herea ana ia e Parao-neko ki Ripira ki te whenua o Hamata, kia kaua ia e kingi ki Hiruharama, whakaritea ana hoki e ia he takoha ki te whenua, kotahi rau taranata hiriwa, kotahi taranata koura.
- 34
- Katahi a Parao-neko ka mea i a Eriakimi tama a Hohia hei kingi i muri i tona pāpā i a Hohia; whakawhitia ketia ake ano hoki e ia tona ingoa ko Iehoiakimi; ko Iehoahata ia tangohia ana e ia, kawea ana ki Ihipa; mate atu ki reira.
- 35
- Na, ka hoatu te hiriwa me te koura e Iehoiakimi ki a Parao. Takohatia ana hoki e ia te whenua, he mea kia hoatu ai e ia te moni i kiia mai e Parao. Tohea ana e ia te hiriwa me te koura ki te iwi o te whenua, te takoha a tenei, a tenei, hei mea hoatu mana ki a Parao-neko.
- 36
- E rua tekau ma rima nga tau o Iehoiakimi i tona kingitanga ai. Kotahi tekau ma tahi nga tau i kingi ai ia ki Hiruharama, na, te ingoa o tona whaea ko Tepura, he tamahine na Peraia o Ruma.
- 37
- He kino ano hoki tana mahi ki te titiro iho a Ihowa, i rite ki nga mea katoa i mea ai ona mātua.
Address: 
Phone: 
Email: