3rd John Chapter 1 - Paipera Tapu 1868 | Te Paipera Tapu 1868

3rd John Chapter 1 - Paipera Tapu 1868

1
Na te kaumatua ki a Kaiu, ki te hoa aroha ki taku e aroha atu nei i runga i te pono.
2
E te hoa aroha, nui atu i nga mea katoa taku inoi kia kake koe ki te pai, kia ora, kia pera ano me tou wairua kua kake ki te pai.
3
Hari pu hoki ahau ki nga teina i haere mai nei, i whakaatu i te pono i roto i a koe, ara, tou haere i runga i te pono.
4
Kahore aku hari e nui atu ana i enei, ara kia rongo ahau e haere ana aku tamariki i runga i te pono.
5
E te hoa aroha, pono tonu tau mahi e mea na koe mo nga teina, mo nga tāngata iwi ke ano hoki;
6
E whakaatu na i tou aroha i te aroaro o te hahi: na, ki te rite ki ta te Atua tau kawenga i a ratou, ka pai to mahi:
7
He whakaaro hoki ki tona ingoa i haere atu ai ratou, kihai ano i riro i a ratou tetahi mea a nga tauiwi.
8
Koia i tika ai kia whakamanuhiri tatou i nga tāngata penei, kia ai hoki tatou hei hoa mahi mo te pono.
9
I tuhituhi atu ahau ki te hahi: otira kahore matou e manakohia mai e Rioterepi, tana hoki e pai ai ko ia kia meinga hei tuatahi mo ratou.
10
Mo konei ki te haere atu ahau, ka mahara ahau ki ana mahi e mea nei ia, ki te kino o ana kupu i a ia e hāmemememe mai nei mo matou; kahore hoki tana i mutu i konei, kahore ia e manako ki nga teina, a ki te pai etahi, e riria ana e ia, e peia ana i roto i te hahi.
11
E te hoa aroha, kaua e arumia te kino, engari te pai. Te tangata e mahi pai ana, no te Atua ia: tena ko te kai mahi i te kino, kahore ia kia kite i te Atua.
12
E korerotia paitia ana a Rimitiriu e te katoa, e te pono ano hoki: hei kai whakaatu ano hoki matou; e mohio ana ano koutou he mea pono ta matou whakaaturanga.
13
He maha nga mea hei tuhituhinga atu maku, otira e kore ahau e pai kia tuhituhi atu ki a koe ki te mangumangu ki te pene:
14
E mea ana hoki ahau tera ahau e kite wawe i a koe, a e korero taua he mangai he mangai. Kia tau te rangimarie ki a koe. Tenei nga hoa aroha te oha atu nei ki a koe. Oha atu ki nga hoa aroha me te whakahua ano i te ingoa o tera o tera.