- 1
- Na, i te hahi i Anatioka etahi poropiti, me nga kai whakaako: ko Panapa, ratou ko Himeona i karangatia nei ko Nikera, ko Rukia no Hairini, ko Manaena i noho tahi nei i a Herora tetaraki, ko Haora.
- 2
- A, i a ratou e karakia ana ki te Ariki, e noho puku ana, ka mea te Wairua Tapu, Motuhia mai ki a au a Panapa raua ko Haora ki te mahi i karangatia ai raua e ahau.
- 3
- Na, ka noho puku ratou, ka inoi, ka popoki iho o ratou ringaringa ki runga ki a raua, a tonoa ana kia haere.
- 4
- Na, ka tonoa nei raua e te Wairua Tapu, ka haere ki Herukia; a rere atu ana i reira ki Kaiperu.
- 5
- Na, i a raua i Harami, ka kauwhautia e raua te kupu a te Atua i roto i nga whare karakia o nga Hurai: i a raua ano hoki a Hoani hei kai mahi.
- 6
- A, to ratou putanga atu ki tera taha o te motu ki Papaho, ka kitea tetahi kai makutu, he poropiti teka, he Hurai, ko Paraihu te ingoa:
- 7
- I te tino kawana i a Herekiu Paora ia e noho ana; he tangata whakaaro; a karangatia ana e ia a Panapa raua ko Haora, i hiahia kia rongo i te kupu a te Atua.
- 8
- Otira i tautohe ki a raua a Erima te tangata makutu, (ko te whakamaoritanga hoki tenei a tona ingoa,) i mea kia tahuri ke te tino kawana i te whakapono.
- 9
- Na, te tino tirohanga putanga ki a ia a Haora, (ara a Paora,) kī tonu i te Wairua Tapu,
- 10
- Ka mea, Kī tonu koe i te tinihanga, i nga tini mahi pokanoa; tama a te rewera, hoa riri o nga mahi tika katoa! e kore ianei e mutu to whakaputa ke i nga ara tika a te Ariki?
- 11
- Na, aianei pa ai te ringa o te Ariki ki a koe, ka matapotia koe, e kore e kite i te ra i tetahi wa. Na, taka tonu iho ki a ia he kohu me te pouri; a haereere noa ia ki te rapu kai arahi.
- 12
- A, te kitenga o te tino kawana i taua meatanga, ka whakapono, i miharo hoki ki te ako a te Ariki.
- 13
- Na, ka rere atu a Paora ratou ko ona hoa i Papaho, ka u ki Pereka i Pamapuria: a whakarere ana a Hoani i a raua, hoki ana ki Hiruharama.
- 14
- Ko raua ia haere atu ana i Pereka, tae tonu atu ki Anatioka i Pihiria, a tomo atu ana ki te whare karakia i te ra hapati, noho ana,
- 15
- A ka mutu te korerotanga o te ture me nga poropiti, ka tono tangata mai nga rangatira o te whare karakia ki a raua, ka mea, E hoa ma, e nga tuakana, ki te mea he kupu whakaako ta korua ki te hunga nei, korerotia.
- 16
- Na, ka tu a Paora ki runga, ka tawhiri tona ringaringa, ka mea, E nga tāngata o Iharaira, e te hunga e wehi ana ki te Atua, whakarongo mai.
- 17
- Na te Atua o tenei iwi o Iharaira i whiriwhiri o tatou mātua, a whakanuia ana e ia tenei iwi, i a ratou e noho manene ana i te whenua o Ihipa, a i runga tonu te ringa i arahina mai ai ratou e ia i reira.
- 18
- Na, tata tonu ki te wha tekau nga tau i atawhaitia ai ratou e ia i te koraha.
- 19
- A ka whitu nga iwi ka ngaro i a ia ki te whenua o Kanaana, ka wehewehea e ia ki te rota to ratou whenua mo ratou.
- 20
- A, muri iho i enei mea, i te mea ka tata ki nga tau e wha rau e rima tekau, ka hoatu e ia he kai whakarite whakawa, taea noatia a Hamuera poropiti.
- 21
- Katahi ratou ka mea ki tetahi kingi: a hoatu ana e te Atua ki a ratou a Haora, tama a Kihi, he tangata no te pu o Peniamine, a e wha tekau nga tau.
- 22
- A ka oti ia te whakataka, ka whakaarahia ake a Rawiri hei kingi mo ratou; i whakaaturia hoki ia e ia, i korerotia, Kua kitea e ahau a Rawiri tama a Hehe, he tangata e whakaaetia ana e toku ngakau; ka meatia e ia nga mea katoa e pai ai ahau.
- 23
- He uri no tenei tangata, he Kai whakaora mo Iharaira, a Ihu i whakaarahia nei e te Atua, ko tana hoki tena i korero ai i mua:
- 24
- No mua tata ano hoki i tona haerenga mai, te kauwhautanga a Hoani i te iriiri ripeneta, ki te iwi katoa o Iharaira.
- 25
- A ka tutuki a Hoani ki tona tutukitanga, ka mea ia, Ko wai koia ahau ta koutou whakaaro? ehara ra ahau i a ia, engari tera te haere mai ana tetahi i muri i a au, ko ona hu e kore ahau e tau hei wewete.
- 26
- E hoa ma, e aku tuakana, e nga tamariki o te kawei o Aperahama, e te hunga i roto i a koutou e wehi ana ki te Atua, kua homai te kupu o tenei oranga kia whakapuakina ki a koutou.
- 27
- Kihai te hunga e noho ana i Hiruharama, me o ratou rangatira, i mohio ki a ia, ki nga reo ano hoki o nga poropiti e korerotia ana i nga hapati katoa. Na, kua rite i a ratou aua reo, i a ratou i tuku i a ia kia whakamatea.
- 28
- Ahakoa kihai i kitea e ratou he mea e mate ai ia, ka tohe ratou ki a Pirato kia whakamatea ia.
- 29
- Ano ka rite katoa i a ratou nga mea i tuhituhia mona, tangohia iho ana ia i te rakau, whakatakotoria ana ki roto ki te urupa.
- 30
- Heoi na te Atua ia i whakaara ake i te mate:
- 31
- A he maha nga ra i kitea ai ia e te hunga i haere tahi i a ia i Kariri ki Hiruharama, ko ratou hoki hei kai whakaatu mona ki te iwi.
- 32
- Na, he kauwhau tenei na maua i te rongo pai ki a koutou, i te mea i korerotia i mua ki nga mātua,
- 33
- Kua mana tenei i te Atua, hei mea ma tatou, ma a ratou tamariki, i a ia i whakaara nei i a Ihu; ko te mea hoki tena i tuhituhia i te rua o nga waiata, Ko koe taku Tama, no naianei koe i whakatupuria ai e ahau.
- 34
- Ko tana korero ano tenei mona i whakaarahia nei e ia i te mate, tē hoki ano ki te pirau i muri iho, Ka hoatu e ahau ki a koutou nga mea tapu nga mea pono o Rawiri.
- 35
- Koia hoki ia i mea ai i tetahi atu waiata, E kore koe e tuku i tou Mea Tapu kia kite i te pirau.
- 36
- Ko Rawiri hoki i mahi i ta te Atua i pai ai i tona whakatupuranga ano, a moe iho, whakatakotoria ana ki ona mātua, kite ana i te pirau.
- 37
- Ko tenei ia i whakaarahia ake nei e te Atua, kihai ia i kite i te pirau.
- 38
- Na, kia mohio koutou, e hoa ma, e aku tuakana, na tenei tangata te murunga hara e kauwhautia nei ki a koutou;
- 39
- A māna nga tangata katoa, e whakapono ana, ka whakatikaia ai i nga mea katoa, e kore nei koutou e whakatikaia i runga i ta Mohi ture.
- 40
- Na, kia mahara, kei pa ki a koutou te mea i korerotia e nga poropiti;
- 41
- Titiro mai, e te hunga whakahawea, ka miharo ai, a whakangaromia iho: ka mahia hoki e ahau he mahi i o koutou ra, he mahi e kore e whakaponohia e koutou, ahakoa whakapuakina e te tangata ki a koutou.
- 42
- A ka puta mai nga Hurai i roto i te whare karakia, ka tohe nga tauiwi kia kauwhautia ano aua kupu ki a ratou, i to muri iho hapati.
- 43
- Heoi ka pakarukaru te huihui, he tokomaha nga Hurai me nga porohiraiti karakia i aru i a Paora raua ko Panapa: a ka korero raua ki a ratou, ka ako kia mau tonu ratou ki te aroha noa o te Atua.
- 44
- Na, i to muri iho hapati, ka huihui mai te pa, me te mea ko ratou katoa, ki te whakarongo ki te kupu a te Atua.
- 45
- A, te kitenga o nga Hurai i nga mano, ka kī ratou i te hae, ka whakakahore ki nga mea i korerotia e Paora, ka whakateka, ka kohukohu.
- 46
- Katahi a Paora raua ko Panapa ka korero maia atu, ka mea, I takoto te tikanga kia mātua korerotia te kupu a te Atua ki a koutou: na, ka peia nei e koutou, ka whakaaro koutou e kore e pai te oranga tonutanga mo koutou, na, ka tahuri atu nei maua ki nga tauiwi.
- 47
- I penei hoki te ako mai a te Ariki ki a matou, Kua waiho koe e ahau hei mārama ki nga tauiwi, kia ai koe hei oranga puta noa i nga pito o te whenua.
- 48
- Na, te rongonga o nga tauiwi, ka hari, ka whakakororia i te kupu a te Ariki: a ka whakapono te hunga i rite mo te oranga tonutanga.
- 49
- A paku ana te kupu a te Ariki puta noa i taua whenua.
- 50
- Otira i whakaohokia nga wāhine karakia e nga Hurai, me nga wāhine rangatira, me nga tāngata nunui o te pa, a ara ana i a ratou te whakatoinga mo Paora raua ko Panapa, peia ana raua i o ratou wahi.
- 51
- Heoi ruia atu ana e raua te puehu o o raua waewae ki a ratou, a haere ana ki Ikoniuma.
- 52
- Na, kī tonu nga akonga i te hari, i te Wairua Tapu.
Address: 
Phone: 
Email: