Acts Chapter 22 - Paipera Tapu 1868 | Te Paipera Tapu 1868

Acts Chapter 22 - Paipera Tapu 1868

1
E hoa ma, e aku tuakana, e aku mātua, whakarongo ki tenei korero aku ki a koutou.
2
(A ka rongo ratou ko te reo Hiperu tana i korero ai ki a ratou, na, mutu rawa te kiki: a ka mea ia,)
3
He tangata ano ahau no nga Hurai, i whanau ki Tarahu o Kirikia, i whakatupuria i roto i tenei pa ki nga waewae o Kamariere, i ata whakaakona ki te tino tikanga o te ture a nga mātua, i uaua ano ahau mo te Atua, i pena me koutou katoa i naianei.
4
A whakatoia ana e ahau nga tāngata o tenei tikanga, a mate noa; herea ana e ahau nga tāngata, nga wāhine, a tukua ana ki nga whare herehere.
5
Ma te tohunga nui ratou ko nga kaumatua katoa e whakatika tenei aku: i riro mai hoki i a au a ratou pukapuka ki nga teina, a haere ana ahau ki Ramahiku kia herea kia arahina te hunga ano hoki o reira ki Hiruharama kia whakamamaetia.
6
I a au ano e haere ana, a ka whakatata ki Ramahiku i te poutumarotanga, ka whiti whakarere mai ki a au he māramatanga nui no te rangi.
7
A hinga ana ahau ki te whenua, ka rangona he reo e mea mai ana ki a au, E Haora, e Haora, he aha tau e whakatoi nei i a au?
8
Na, ka whakahokia atu e ahau, Ko wai koe, e te Ariki? Ka mea mai ia ki a au, Ko Ihu ahau o Nahareta, e whakatoia nei e koe.
9
I kite ano oku hoa i te māramatanga, a wehi ana; otira kihai i rongo i te reo ona i korero mai ki a au.
10
Ka mea atu ahau, Me aha ahau, e te Ariki? Ka mea mai te Ariki ki a au, Whakatika, haere ki Ramahiku; a ka korerotia ki a koe ki reira nga mea katoa kua whakaritea kia meinga e koe.
11
Ano ra kahore ahau i kite, na te kororia hoki o taua māramatanga, ka arahina a ringaringatia e aku hoa haere, ka tae atu ki Ramahiku.
12
Na, ko tetahi tangata ko Anania, he tangata karakia, i rite tonu nei ki ta te ture ana mahi, e korerotia paitia ana e nga Hurai katoa e noho ana i reira,
13
Haere mai ana ia ki a au, a tu ana, ka mea mai ki a au, E taku teina, e Haora, titiro ake. A i taua haora ano ka titiro atu ahau ki a ia.
14
I mea mai ano ia, Na te Atua o o tatou mātua koe i whiriwhiri, kia mātau ki tana e pai ai, kia kite i a te Tika, kia rongo hoki i te reo o tona mangai.
15
No te mea ko koe hei kai whakaatu māna ki nga tāngata katoa, mo nga mea i kite ai, i rongo ai koe.
16
Na, he aha tau e whakaroa nei? whakatika, kia iriiria koe, kia horoia ou hara, me te karanga ano ki te ingoa o te Ariki.
17
A, taku hokinga mai ki Hiruharama, i a au e inoi ana i roto i te temepara, ka puta mai te ngakau matakite ki a au;
18
A ka kite ahau i a ia e mea mai ana ki a au, E ahua, kia hohoro te haere atu i Hiruharama: e kore hoki ratou e tango i to korero moku.
19
Na, ko taku meatanga atu, E te Ariki, e mahara ana ratou, he kai herehere ahau, he kai whiu i roto i nga whare karakia, i te hunga i whakapono ki a koe:
20
A i te whakahekenga o nga toto o tou kai whakaatu o Tepene, i reira ahau e tu ana, e whakaae ana ki tona whakamatenga, e tiaki ana hoki i nga kakahu o ona kai whakamate.
21
Na, ko tana meatanga mai ki a au, Haere: ka ungā hoki koe e ahau ki tawhiti ki nga tauiwi.
22
A whakarongo ana ratou ki a ia taea noatia tenei kupu, na, ka hamama ratou, ka mea, Whakamatea atu te koroke nei i runga i te whenua: e kore hoki e pai kia ora ia.
23
Heoi i a ratou e karanga ana, e rukeruke ana i o ratou kakahu, e akiri ana i te puehu ki te rangi,
24
Ka ki atu te rangatira kia kawea ia ki te pa, ka mea kia whiua ia, kia uia; kia mātau ai ia ki te mea i penei ai ratou te karanga ki a ia.
25
A i a ratou e here ana i a ia ki nga here, ka mea a Paora ki te keneturio e tu ana i reira, He mea tika ranei kia whiua e koutou te tangata o Roma, i te mea kahore ano i mau noa tona hē?
26
Na, te rongonga o te keneturio, ka haere atu, ka korero ki te rangatira mano, ka mea, Kia tupato ki tau e mea ai: no Roma hoki te tangata nei.
27
Na, ka haere mai te rangatira mano, ka mea ki a ia, Korero mai ki a au, no Roma koe? Ka mea ia, Ae.
28
Na, ka whakahokia mai e te rangatira mano, He nui te utu i hokona ai e ahau tenei tangatawhenuatanga. Ka mea atu a Paora, He tangata whenua ra ahau no taku whanautanga.
29
Na, whakarerea tonutia iho ia e te hunga e mea ana ki te ui ki a ia: i mataku ano te rangatira mano, i tona rongonga ai no Roma ia, mona hoki i herea.
30
I te aonga ake ka mea ia kia mātau ki te tikanga, ki te mea i whakawakia ai ia e nga Hurai, a ka wewete i ona here, ka mea kia haere mai nga tohunga nui, me to ratou runanga katoa, a arahina iho ana a Paora, whakaturia ana ki to ratou aroaro.