Acts Chapter 24 - Paipera Tapu 1868 | Te Paipera Tapu 1868

Acts Chapter 24 - Paipera Tapu 1868

1
Na, ka pahure nga ra e rima, ka haere atu a Anania te tohunga nui ratou ko nga kaumatua, ko tetahi kai korero, ko Tereturu, whakakite ai i nga hē o Paora ki te kawana.
2
A ka oti ia te karanga, ka timata a Tereturu te whakawa, ka mea, Nau i hua ai te rangimarie ki a matou, he whakaaro hoki nau i pai ai nga mea i meatia ki tenei iwi,
3
Nui atu ta matou whakawhetainga mo aua mea ka riro mai nei i a matou, i nga wa katoa i nga wahi katoa, e Pirika, e te tangata pai rawa.
4
Otiia e kore e nui atu taku whakawarenga i a koe; tena, he ngawari nei hoki koe, whakarangona mai ta matou kupu kotahi nei.
5
I mau hoki tenei tangata, ano he mate kino, e whakaoho ana i nga Hurai katoa o te ao, ko ia hoki te tino take o te titorehanga ki ta nga Nahareti:
6
I mea ano hoki ia kia whakanoatia te temepara: na, ka hopu matou i a ia, a ka mea kia meatia ki a ia ta to matou ture i whakatakoto ai.
7
Na, ka puta mai a Raihia te rangatira mano, rupahu noa iho, tangohia ake ia i o matou ringaringa,
8
A ungā ana e ia ona kai whakawa kia haere mai ki a koe: mau e ui atu ki a ia, kia rongo ai koe ki enei mea katoa e whakawakia nei ia e matou.
9
A i whakaae ano nga Hurai, i mea, Koia ano tena.
10
Na, ko te whakahokinga mai a Paora, i ta te kawana tungoutanga atu ki a ia kia korero, E mohio ana ahau, ka maha ou tau e whakawa nei koe i tenei iwi, koia i pai ai toku ngakau ki te tohe i te tika o aku mea:
11
E takoto kau ana hoki hei mohiotanga mau, kahore i maha ake i te tekau ma rua nga ra oku i haere mai nei ki Hiruharama ki te karakia.
12
Kihai ano hoki ahau i mau i a ratou i roto i te temepara e korero ana ki tetahi tangata, e whakamea ana ranei i te mano kia tutū, kahore i nga whare karakia, kahore ano hoki i te pa:
13
E kore ano hoki e taea e ratou te whakairi ki a au nga mea e whakawakia nei ahau e ratou.
14
Otira me whaki atu tenei e ahau ki a koe, ko ta ratou ritenga e ki nei he titorehanga, ko taku tena e karakia nei ahau ki te Atua o oku mātua, e whakapono ana hoki ahau ki nga mea katoa kua oti te tuhituhi i roto i te ture, i ta nga poropiti:
15
E tumanako atu ana ki ta te Atua, ki ta ratou ake ano hoki e whakaae nei, ara tenei ake ka ara mai nga tāngata mate, nga tāngata tika nga tāngata hē.
16
Tenei ano hoki taku e whai nei, kia hara kore tonu toku hinengaro i te aroaro o te Atua, o nga tāngata.
17
Na, muri iho i nga tau e maha, ka tae mai ahau ki te kawe mai i nga mea atawhai rawa-kore ki toku iwi, me nga whakahere.
18
No reira ahau i kitea ai e etahi Hurai o Ahia, e purea ana i roto i te temepara, kahore he huihui, kahore he ngangau.
19
Ko te tikanga ra kia haere mai ratou ki a koe ki te whakawa, ki te mea he mea ta ratou moku.
20
Ma enei ake ano ranei e korero, me i kitea e ratou he hē toku, i a au ano e tu ana i te runanga,
21
Ko taua kupu kotahi pea i karanga ai ahau, i a au e tu ana i roto i a ratou, Ko te aranga mai o te hunga mate te mea e whakawakia nei ahau e koutou i naianei.
22
Heoi ka rongo a Pirika ki enei mea ka ungā atu ratou, he nui atu hoki no tona mohio ki taua ritenga, ka mea ia, Ka haere mai a Raihia te rangatira mano, ka tino rapu ai ahau ki te tikanga o a koutou mea.
23
Na, ka mea ia ki te keneturio kia tiakina a Paora, kia waiho noa ano ia, kia kaua e riria ona hoa ina mahi ki a ia, ina haere mai ki a ia.
24
Na, muri iho i etahi ra ka tae mai a Pirika raua ko tana wahine ko Ruruhira, he Hurai, ka mea ia kia tikina a Paora, a ka whakarongo ki a ia ki te whakapono ki a te Karaiti.
25
A i a ia e korero ana ki nga mea o te tika, ki te hiahia kia pehia, ki te whakawakanga amua, ka wiri a Pirika, ka mea, Haere aianei; kia watea ahau, ka karangatia koe e ahau.
26
Tohu noa hoki ka hoatu ki a ia he moni e Paora kia tukua ai ia: koia i hono ai te tiki i a ia, te korero ki a ia.
27
Na, muri iho i nga tau e rua ka riro mai a Porohia Petuha hei whakakapi mo Pirika i te kawanatanga: a ka mea a Pirika kia manawarekatia nga Hurai, na, ka waiho e ia a Paora kia here ana.