- 1
- Na, e haere tahi ana a Pita raua ko Hoani ki te temepara i te haora inoi i te iwa o nga haora.
- 2
- Na, ka kawea mai tetahi tangata, he kopa no te kopu mai ano o tona whaea, he mea whakatakoto na ratou i nga ra katoa ki te kuwaha o te temepara i karangatia nei ko Ataahua, ki te tono mea māna i te hunga e tomo atu ana ki te temepara;
- 3
- A, tona kitenga i a Pita raua ko Hoani, meake tomo atu ki te temepara, ka tono ia ki tetahi mea māna.
- 4
- Na, ka titiro matatau mai a Pita raua ko Hoani ki a ia, a ka mea, Titiro mai ki a maua.
- 5
- Na, ka tatari ake ia ki a raua, hua noa, ka riro mai tetahi mea a raua māna.
- 6
- Ano ra ko Pita, Kahore aku hiriwa aku koura; na, taku nei, me hoatu tenei e ahau ki a koe: Whakatika i runga i te ingoa o Ihu Karaiti o Nahareta, haere.
- 7
- Na, ko tana hopukanga atu i tona ringa matau, kei te whakaara: na, kaha tonu iho ona waewae me nga pona.
- 8
- Heoi, tana mokowhitinga ake, tu ana, haere ana, tomo tahi ana me raua ki roto ki te temepara, haere ana, tupeke ana, whakamoemiti ana ki te Atua.
- 9
- A ka kite te iwi katoa i a ia e haere ana, e whakamoemiti ana ki te Atua:
- 10
- A ka mahara, ko ia ano tera i noho ki te tono mea māna ki te tatau Ataahua o te temepara: na, ka ohorere ratou, ka miharo ki taua mea i pa ki a ia.
- 11
- A, i te kopa i whakaorangia nei e pupuri ana i a Pita raua ko Hoani, ka oma mai te iwi katoa ki a ratou ki te whakamahau i karangatia nei ko ta Horomona, rahi rawa te miharo.
- 12
- A, te kitenga o Pita, ka mea atu ki te iwi, E nga tāngata o Iharaira, he aha ta koutou e miharo ki tenei? he aha hoki koutou ka titiro pu mai ai ki a maua, me te mea he mana no maua ake he ngakau karakia ranei i meatia ai tenei kia haere?
- 13
- Na te Atua o Aperahama, o Ihaka, o Hakopa, na te Atua o o tatou mātua, i whakakororia tana Tama a Ihu; ta koutou i tuku na, i whakakahore na i te aroaro o Pirato, i a ia ra i mea kia tukua ia kia haere.
- 14
- Heoi whakakahoretia ana e koutou te Mea Tapu, te Mea Tika, a inoia ana ko te tangata kohuru kia tukua ki a koutou;
- 15
- A patua ana e koutou te take o te ora; na, kua whakaarahia nei ia e te Atua i te mate; a ko te kai whakaatu ano matou.
- 16
- A na tona ingoa na te whakapono hoki ki tona ingoa i whakakaha tenei tangata, e kite nei e mātau nei koutou; ae, ko te whakapono ki a ia te mea nāna i hoatu tenei tino oranga ki a ia, i te aroaro o koutou katoa.
- 17
- Na, e aku teina, e mahara ana ahau, na te kuare tena mahi a koutou, a o koutou rangatira hoki.
- 18
- Heoi, nga mea a te Atua i whakakitea mai i mua, e nga mangai o ana poropiti katoa, mo te Karaiti kia whakamamaetia, kua rite enei i a ia.
- 19
- Na, ripeneta ra koutou, tahuri hoki, kia murua ai o koutou hara, ina tae mai nga wa o te taanga manawa i te aroaro o te Ariki,
- 20
- A ka tonoa e ia a Ihu Karaiti, i kauwhautia nei ki a koutou i mua:
- 21
- Na, ka takoto nei te tikanga kia noho ia ki te rangi, kia tae mai ra ano nga wa o te whakahokinga o nga mea katoa, o ta te Atua i korerotia e nga mangai o ana poropiti tapu katoa, o te timatanga iho ra ano o te ao.
- 22
- I mea ra hoki a Mohi ki nga tupuna, Ma te Ariki ma to koutou Atua e whakaara ake he poropiti mo koutou, i roto i o koutou teina, he penei ano me ahau te ahua; ko ia ta koutou e whakarongo ai i nga mea katoa e mea ai ia ki a koutou.
- 23
- A tera nga wairua katoa e kore e whakarongo ki taua poropiti, ka whakamatea rawatia i roto i te iwi.
- 24
- Na, nga poropiti katoa o Hamuera iho ano, me o muri nei, te hunga katoa i korero, i poropititia ano hoki enei ra e ratou.
- 25
- Ko koutou nga tamariki a nga poropiti, o te kawenata ano hoki i whakatakotoria mai e te Atua ki o tatou tupuna, i a ia i mea ki a Aperahama, Ma tou uri ka manaakitia ai nga hapu katoa o te ao.
- 26
- Ka oti nei tana Tamaiti a Ihu te whakaara e te Atua, ka mātua tonoa mai nei ia e ia ki a koutou, hei manaaki i a koutou, hei whakatahuri i tenei tangata i tenei tangata i o koutou hara.
Address: 
Phone: 
Email: