Acts Chapter 5 - Paipera Tapu 1868 | Te Paipera Tapu 1868

Acts Chapter 5 - Paipera Tapu 1868

1
Na, ka hokona he kāinga e tetahi tangata, ko Anania te ingoa, raua ko Hapaira ko tana wahine;
2
A wehea ketia atu ana e ia tetahi wahi o te utu, me te mohio ano tana wahine, ka mauria mai tetahi wahi, a whakatakotoria ana ki nga waewae o nga apotoro.
3
Na, ko te meatanga mai a Pita, E Anania, na te aha i whakakiia ai tou ngakau e Hatana kia teka koe ki te Wairua Tapu, a kia wehea atu tetahi wahi o te utu o te kāinga?
4
He teka ianei nou ake i te mea kahore ano i riro, a ka oti te hoko, i a koe ano te tikanga mo te pehea mo te pehea? na te aha tenei mea i whakaaroa ai i roto i tou ngakau? kihai koe i teka ki te tangata, engari ki te Atua.
5
A, te rongonga o Anania i enei kupu, hinga ana, mate rawa: a he nui te wehi i tau ki te hunga katoa i rongo i enei mea.
6
Na, ka whakatika nga taitamariki, takai ana i a ia, maua atu ana ki waho, tanumia ana.
7
A ka tata te takiwa ki te toru o nga haora, ka tomo mai ano hoki tana wahine, kihai i mohio ki taua meatanga.
8
Na, ko te meatanga atu a Pita ki a ia, Korero mai ki a au, ko nga utu tera i hokoa ai e korua te kāinga? Ka mea mai ia, Ae, koia tena.
9
Ka mea atu a Pita ki a ia, He aha korua i whakangakau-tahi ai ki te whakamatautau i te Wairua o te Ariki? Nana, kei te kuwaha nga waewae o te hunga i tanumia ai to tāne, a ma ratou koe e kawe ki waho.
10
Na, hinga tonu iho ia ki ona waewae, mate rawa: a, te haerenga mai o nga taitamariki, rokohanga mai kua mate, na, kawea ana ki waho, tanumia ana ki te taha o tana tāne.
11
A nui atu te wehi o te hahi katoa, o te hunga katoa ano hoki i rangona ai enei mea.
12
A no nga apotoro nga ringaringa i meinga ai nga tohu maha, me nga mea whakamiharo, i roto i te iwi; (a i noho ano ratou katoa ki te whakamahau o Horomona, kotahi ano hoki te ngakau.
13
Kihai hoki tetahi o era atu i maia te uru ki roto ki a ratou: a whakanuia ana ratou e te iwi.
14
A nui atu te hunga whakapono i honoa ki te Ariki, tona tini o te tāne o te wāhine.)
15
I mauria atu ano hoki e ratou nga turoro ki nga ara, he mea whakatakoto ki runga ki nga moenga ki nga whariki, kia taumarumaru iho ai ko te atarangi kau o Pita ki tetahi o ratou, i a ia e haere ana.
16
A he tokomaha i huihui mai ki Hiruharama i roto i nga pa o tetahi taha o tetahi taha, me te mau mai ano i nga turoro, i te hunga ano hoki e whakatoia ana e nga wairua poke: a whakaorangia katoatia ana ratou.
17
Me i reira ka whakatika te tohunga nui, ratou ko ona hoa katoa, (te titorehanga ki nga Haruki,) kī tonu i te riri,
18
Ka pa o ratou ringaringa ki nga apotoro, a makā ana e ratou ki te whare herehere nui.
19
Otira na tetahi anahera o te Ariki i uaki nga tatau o te whare herehere i te po; arahina ana ratou e ia ki waho, ka mea ia,
20
Haere, e tu i roto i te temepara, ka korero ki te iwi i nga kupu katoa o tenei ora.
21
A, to ratou rongonga ai, tomo atu ana ki te temepara i te atatu, ako ana. Na, te haerenga mai o te tohunga nui, ratou ko ona hoa, huihuia ana e ratou te runanga me nga kaumatua katoa o nga tamariki a Iharaira, ka tono tangata atu ki te whare herehere hei tiki i a ratou.
22
A, te taenga atu o nga katipa, kihai ratou i kitea i roto i te whare herehere, na, ka hoki atu, ka korero,
23
Ka mea, Rokohina atu e matou e tutaki ana ano te whare herehere, u tonu, me nga kai tiaki e tu ana i waho mai o nga tatau: te whakapuaretanga, kahore kau i kitea tetahi i roto.
24
Ano ka rongo te tohunga, ratou ko te rangatira o te temepara, ko nga tohunga nui, ki enei kupu, ka pororaru ratou he aha ranei te tukunga iho o tena mea.
25
Na, ko te haerenga mai o tetahi, ka korero ki a ratou, ka mea, Na, te hunga i makā ra e koutou ki te whare herehere, e tu mai ra i te temepara, e ako ana i te iwi.
26
Katahi ka haere te rangatira, ratou ko nga katipa, a arahina mai ana ratou, he mea ata hanga: i wehi hoki i te iwi, kei akina ki te kohatu.
27
A ka oti ratou te arahi mai, ka whakaturia ki roto i te runanga: na, ka ui atu te tohunga nui ki a ratou,
28
Ka mea atu, Kihai koia matou i ata whakatupato i a koutou kia kaua e ako i runga i tenei ingoa? na, kua kī nei Hiruharama i ta koutou ako, a e mea ana koutou kia whakairia nga toto o tenei tangata ki a matou.
29
Na, ko te whakahokinga atu a Pita, ratou ko nga apotoro, ka mea, Erangi te whakarongo ki te Atua, kaua ki te tangata.
30
Na te Atua o o tatou tupuna i whakaara ake a Ihu, kua whakamatea na e koutou, e mea whakairi ki te rakau.
31
Kua oti tenei te whakanoho ki runga e te ringa matau o te Atua, hei Piriniha, hei Kai whakaora, hei homai i te ripeneta i te murunga hara ki a Iharaira.
32
A ko matou ana kai whakaatu i enei mea; ko te Wairua Tapu ano hoki, i homai e te Atua ki te hunga e rongo ana ki a ia.
33
A, to ratou rongonga ai, mamae pu ratou, a ka runanga kia whakamatea ratou.
34
Na, ka whakatika tetahi o nga Parihi i roto i te runanga, ko Kamariere te ingoa, he kai whakaako i te ture, he tangata e whakanuia ana e te iwi katoa, ka mea, kia nekehia atu nga apotoro ki waho tetahi wahi;
35
Na, ko tana meatanga ki a ratou, E nga tāngata o Iharaira, kia tupato ki ta koutou e mea ai ki enei tāngata.
36
I mua hoki i enei ra ka whakatika a Teura, me te ki ano, ko ia tetahi tangata nui; a tata tonu ki te wha o nga rau te tokomaha o nga tāngata i huihui ki a ia: na, marū iho ia; whakamararatia ake hoki te hunga katoa i rongo ki a ia, kore ake.
37
A muri iho ano i taua tangata, ka whakatika a Hura o Kariri i nga ra o te tuhituhinga, a he tini te tangata i kumea ki te whai i a ia; mate iho ano hoki ia; marara ake te hunga katoa i rongo ki a ia.
38
Na, ko taku kupu tenei ki a koutou, Kāti te mea ki enei tāngata, waiho; ki te mea hoki na te tangata tenei whakaaro, tenei mahi, tera e kahore noa iho:
39
Tena, na te Atua, e kore rawa e taea te whakakahore e koutou; kei kitea pea e whawhai ana koutou ki te Atua.
40
A rongo rawa ratou ki a ia: na, ka karanga ratou i nga apotoro, ka whiu, ka whakatupato, kia kaua e waiho te ingoa o Ihu hei korerotanga ma ratou, a tukua ana ratou kia haere.
41
Heoi haere hari atu ana ratou i te aroaro o te runanga, no te mea i paingia ratou kia whaikinotia mo tona ingoa.
42
A i tenei ra i tenei ra, hore rawa kia mutu ta ratou ako ta ratou kauwhau i a Ihu Karaiti, i roto i te temepara, i tenei whare i tenei whare.