- 1
- Whakarongo ki tenei kupu ka maranga nei i a au mo koutou, he tangi, e te whare o Iharaira.
- 2
- Kua hinga, e kore e ara i muri, te wahina a Iharaira, kua mahue i runga i tona oneone, kahore he kai whakaara mona.
- 3
- No te mea ko te kupu tenei a te Ariki a Ihowa; Te pa kotahi nei te mano i te haerenga atu kotahi rau e toe, a tera kotahi nei te rau i te haerenga atu, kotahi tekau e toe ki te whare o Iharaira.
- 4
- Ko te kupu hoki tenei a Ihowa ki te whare o Iharaira, Rapua ahau, kia ora ai koutou.
- 5
- Kaua ano hoki a Pete-ere e rapua, kaua ano e haere ki Kirikara, kaua ano hoki e whiti atu ki Peere-hepa: no te mea tera a Kirikara ka riro i te whakaraunga, a hei kore noa iho a Pete-ere.
- 6
- Rapua a Ihowa, a ka ora koutou, kei toro atu ia, ano he ahi, i roto i te whare o Hohepa, a pau noa, a kore noa iho he kai tinei i roto i Pete-ere.
- 7
- E te hunga e whakaputa ke ana i te whakarite whakawa hei womawori, a e whakarere atu ana i te tika i runga i te whenua,
- 8
- Rapua te kai hanga o nga whetu e whitu, ratou ko Matariki; e riro ke ana hoki i a ia te atarangi o te mate hei ata, e whakapouritia ana e ia te ra hei po; e karangatia ana e ia nga wai o te moana, a ringitia ana e ia ki runga ki te mata o te whenua: Ko Ihowa tona ingoa:
- 9
- Ko ia hei whakakaha i te tangata e pahuatia ana, hei whawhai ki te tangata kaha, i whakaekea ai te pa taiepa e te tangata i pahuatia.
- 10
- E kinongia ana e ratou te tangata i riria ai te he i te kuwaha, he mea whakarihariha ki a ratou te tangata korero tika.
- 11
- Na, kua takatakahia ra e koutou te ware, a tangohia ana e koutou nga pikaunga witi i a ia; mo reira he whare kohatu tarai ta koutou i hanga ai, na, e kore e nohoia e koutou; whakatokia ana e koutou nga māra waina e minaminatia ana, otiia e kore te waina o aua māra e inumia e koutou.
- 12
- E mohiotia ana hoki e ahau te maha o a koutou pokanga ketanga, me o koutou hara kaha: e whakatupuria kinotia ana e ratou te tangata tika, e tango ana ratou i te utu whakapati, e whakangau ke ana ratou i ta te rawa-kore i te kuwaha.
- 13
- Mo reira, ka whakarongo puku te tangata tupato i taua wa; no te mea he wa kino tera.
- 14
- Rapua te pai, kauaka hoki te kino, kia ora ai koutou: penei ko Ihowa Atua o nga mano hei hoa mo koutou, hei pena ano me ta koutou i ki ai.
- 15
- Kinongia te kino, arohaina te pai, whakapumautia ano hoki te whakarite whakawa ki te kuwaha: tera pea a Ihowa Atua o nga mano ka aroha ki te toenga o Hohepa.
- 16
- No reira tenei kupu a Ihowa Atua o nga mano, a te Ariki, I nga waharoa katoa ko te tangi, ka mea ano hoki ratou i nga huarahi katoa, Aue! Aue! ka karangatia ano hoki e ratou te kai ngaki whenua ki te tangi, me te hunga mātau ki te uhunga hei aue.
- 17
- He aue i nga māra waina katoa: ka tika atu hoki ahau i waenganui i a koe, e ai ta Ihowa.
- 18
- Aue te mate mo te hunga e hiahia ana ki te ra o Ihowa. Hei aha ma koutou? he pouritanga te ra o Ihowa, ehara hoki i te māramatanga.
- 19
- Ka rite ki to te tangata i rere atu i te aroaro o te raiona, a, ka tutaki te pea ki a ia; i haere ranei ki roto ki te whare, a, okioki atu ana tona ringa ki te taha, na, ngaua iho ia e te nakahi.
- 20
- He teka ianei hei pouritanga te ra o Ihowa, he mea mārama-kore? he pouri kerekere, kahore hoki he ra whiti?
- 21
- Kino tonu ahau, whakarihariha tonu ki ā koutou hakari, e kore ahau e hongi atu ki ā koutou huihuinga nui.
- 22
- Ahakoa whakaeke noa koutou i nga tahunga tinana, i ā koutou whakahere toto-kore ki a au, e kore e manakohia e ahau: e kore ano e tirohia atu e ahau nga whakamarietanga, ara, a koutou mea momona.
- 23
- Kia matara atu i a au te ngangau o o waiata; e kore hoki ahau e whakarongo ki te rangi o o hatere.
- 24
- Engari kia huri mai te whakarite whakawa, ano he wai, te tika ano hoki, ano he awa nui.
- 25
- I homai koia e koutou ki a au nga patunga tapu me nga whakahere toto-kore, e te whare o Iharaira, i te koraha, i nga tau e wha tekau.
- 26
- Engari i maua e koutou te tapenakara o to koutou Moroka, a Kiunu ano hoki, o koutou whakapakoko, te whetu o to koutou atua, ta koutou i hanga ai ma koutou.
- 27
- Na, ka meinga koutou e ahau kia haere ki ko atu i Ramahiku, e ai ta Ihowa nona nei te ingoa, Ko te Atua o nga mano.
Address: 
Phone: 
Email: