Daniel Chapter 6 - Paipera Tapu 1868 | Te Paipera Tapu 1868

Daniel Chapter 6 - Paipera Tapu 1868

1
I pai a Tariuha kia whakaritea etahi ariki kotahi rau e rua tekau mo te kingitanga, hei kawana mo te kingitanga katoa;
2
A, e toru nga rangatira nui mo enei; ko Raniera to ratou tuatahi. Me homai e nga ariki nga korero ki enei, kei he nga mea a te kingi.
3
Na, kua whakanuia tenei Raniera ki runga ake i nga rangatira nui, i nga ariki, no te mea he pai rawa te wairua i roto i a ia, a i mea te kingi kia meinga ia hei rangatira mo te kingitanga katoa.
4
Katahi nga rangatira nui ratou ko nga ariki, ka rapu take mo Raniera i roto i nga mea o te kingitanga; heoi kihai i kitea e ratou tetahi take, tetahi he; he mahi pono hoki tana, kahore ano hoki ona kino, ona he.
5
Na, ko te meatanga ake a enei tangata, E kore e kitea e tatou he take mo tenei Raniera, ki te kahore e kitea he mea mona i roto i te ture a tona Atua.
6
Katahi enei rangatira nui ratou ko nga ariki ka huihui mai ki te kingi; ko ta ratou korero ano tenei ki a ia, E Kingi Tariuha, kia ora tonu koe.
7
Kua korerorero nga rangatira nui katoa o te kingitanga, nga kawana, ratou ko nga ariki, ko nga kai whakatakoto whakaaro, ko nga rangatira, kia whakatakotoria he tikanga kingi, kia whakapumautia he ture, ara, ki te inoia he mea e tetahi ki tetahi atua, tangata ranei, a kia toru tekau ra ano nga ra, he mea ehara i te inoi ki a koe, e te kingi, kia makā atu ia ki te ana raiona.
8
Na, mau e whakapumau te ture, e te kingi, whaitohungia hoki te mea i tuhituhia, kei whakaputaina ketia, kia rite ai ki te ture a nga Meri ratou ko nga Pahi e kore nei e puta ke.
9
Na, whaitohungia ana e Kingi Tariuha te mea i tuhituhia, me te ture.
10
Na, ka mohio a Raniera ka oti taua mea i tuhituhia te whai tohu, haere ana ia ki tona whare, ona matapihi tuwhera tonu i roto i tona ruma ki te ritenga atu o Hiruharama, e toru nga tukunga o ona turi i te ra, inoi ana ia, whakawhetai ana ki te aroaro o tona Atua, pera ana me tana i mua.
11
Na, te huihuinga mai o enei tangata, ka kitea a Raniera e karakia ana, e inoi ana ki te aroaro o tona Atua.
12
Katahi ratou ka whakatata mai, a ka korerotia te ture a te kingi ki te aroaro o te kingi, Kihai ianei i whaitohungia e koe he ture, na, nga tangata katoa e inoi ana ki tetahi atua, tangata ranei, i enei rangi e toru tekau, he mea ehara i te inoi ki a koe, e te kingi, ka makā ki te ana raiona? Ka whakahokia mai e te kingi, a ka mea, Pono tonu taua mea ra, e rite ana ki te ture a nga Meri ratou ko nga Pahi e kore nei e puta ke.
13
Katahi ratou ka whakahoki mai, a ka mea ki te aroaro o te kingi, Taua Raniera o nga tamariki o nga whakarau o Hura, kahore ana mahara ki a koe, e te kingi, ki te ture ranei i whaitohungia e koe, heoi e toru ana inoinga i te ra.
14
Na, te rongonga o te kingi i enei kupu, nui atu tana whakahe ki a ia ake, anga tonu mai tona ngakau ki a Raniera kia whakaorangia e ia: tohe ana ia ki te whakaora i a ia, a to noa te ra.
15
Na, ka huihui mai enei tangata ki te kingi, a ka mea ki te kingi, Kia mohio koe, e te kingi, ko te ture tenei a nga Meri, a nga Pahi, E kore e whakaputaina ketia tetahi ture, tikanga ranei, kua oti te whakapumau e te kingi.
16
Katahi te kingi ka whakahau, a kawea atu ana a Raniera e ratou, makā atu ana ki te ana raiona. I korero ano te kingi, i mea ki a Raniera, Tou Atua e mahi tonu na koe ki a ia, mana koe e whakaora.
17
Na, ka maua mai he kohatu, ka whakatakotoria ki te kuwaha o te ana; hiritia iho e te kingi ki tana ake hīri, ki te hīri ano a ana ariki; kei puta ke te tikanga mo Raniera.
18
Na, haere ana te kingi ki tona whare, a pau noa taua po, kihai i kai, kihai ano nga mea whakatangi i kawea mai ki tona aroaro: a turere atu ana tana moe.
19
Na, i te atatu ano ka maranga te kingi, a hohoro tonu te haere ki te ana raiona.
20
Tona taenga atu ki te ana, ka karanga ia ki a Raniera, tona reo me te mea e tangi ana: i korero te kingi, i mea ki a Raniera, E Raniera, e te pononga o te Atua ora, e kaha ana ranei to Atua e mahi tonu na koe ki a ia, ki te whakaora i a koe kei mate i nga raiona?
21
Na, ko te meatanga ake a Raniera ki te kingi, E te kingi, kia ora tonu koe.
22
Kua tukua mai tana anahera e toku Atua, a tutakina ana e ia nga mangai o nga raiona, kei pa mai ki a au: no te mea hoki kua kitea toku harakoretanga i tona aroaro; kahore ano hoki aku mahi he i tou aroaro, e te kingi.
23
Na, nui atu te koa o te kingi ki a ia, kei te whakahau kia tangohia ake a Raniera i roto i te ana. Na kua tangohia ake a Raniera i roto i te ana, kihai rawa ano hoki i kitea tetahi ahatanga ki a ia, mona hoki i whakapono ki tona Atua.
24
Na, ka whakahau te kingi, a ka maua mai aua tangata i whakawa ra i a Raniera, makā ana e ratou ki roto ki te ana raiona, ratou, a ratou tamariki, a ratou wahine, riro pu ratou i nga raiona, a, wawahia ana e ratou o ratou wheua katoa i te mea kiano i tatu noa ki raro o te ana.
25
Katahi a Kingi Tariuha ka tuhituhi ki nga tangata katoa, ki nga iwi, ki nga reo, e noho ana i te whenua katoa; Kia whakanuia te rangimarie ki a koutou.
26
Tenei au te whakatakoto tikanga nei, Na, i nga kawanatanga katoa o toku kingitanga kia wiri nga tangata, kia wehi ki te aroaro o te Atua o Raniera: ko ia hoki te Atua ora e pumau tonu ana, a ake ake ake, ekore tona kingitanga e ngaro, tona kawanatanga ano hoki, a, te mutunga ra ano.
27
Mana e whakaora, mana e mawhiti ai; e mahia ana hoki e ia nga tohu me nga mea whakamiharo i te rangi, i te whenua, nana nei hoki a Raniera i ora ai i te kaha o nga raiona.
28
Na, ka kake tenei Raniera i te kingitanga o Tariuha, i te kingitanga ano hoki o Hairuha Pahi.