- 1
- I te tuatahi o nga tau o Tariuha tama a Ahahueruha, he uri ano hoki ia no nga Meri, whakakingitia ake ki te kingitanga o nga Karari;
- 2
- I te tuatahi o nga tau o tona kingitanga ka kitea e ahau e Raniera i roto i nga pukapuka te maha o nga tau i puta mai ai te kupu a Ihowa ki a Heremaia poropiti, ara, ka whakatutukitia e ia nga tau e whitu tekau o te whakaururuatanga o Hiruharama.
- 3
- Na, ka anga atu toku mata ki te Ariki ki te Atua; rapua ana e ahau i runga i te karakia, i te inoi, i te noho puku, i te kakahu taratara, i te pungarehu.
- 4
- Na, ka inoi ahau ki te Ariki ki toku Atua, ka whaki atu, ka mea atu, E te Ariki, e te Atua nui, e wehingia ana, e pupuri nei i te kawenata, i te atawhai, mo te hunga e aroha ana ki a ia, mo te hunga ano hoki e pupuri ana i ana whakahaunga;
- 5
- Kua hara matou, kua mahi i te kino, kua he, kua whakakeke, i a matou i whakarere nei i o whakahaunga, i o tikanga.
- 6
- Kihai ano matou i whakarongo ki o pononga, ki nga poropiti i korero nei i runga i tou ingoa ki o matou kingi, ki o mātou rangatira, ki o matou mātua, ki te iwi katoa ano hoki o te whenua.
- 7
- Kei a koe, e te Ariki, te tika; i a matou ia ko te whakama o te mata, koia ano tenei inaianei; i nga tangata ano o Hura, ratou ko nga tangata o Hiruharama, ko Iharaira katoa, ko nga mea e tata ana, ko nga mea i tawhiti, i nga whenua katoa i peia atu ai ratou e koe mo to ratou heanga i he ai ratou ki a koe.
- 8
- E te Ariki, ta matou nei, ko te whakama o te mata, ta o matou kingi ano hoki, ta o matou rangatira, ta o matou mātua; mo matou hoki i hara ki a koe.
- 9
- Na te Ariki na to matou Atua nga mahi tohu me nga murunga hara, ko matou ia kua whakakeke ki a ia;
- 10
- Kihai ano i whakarongo ki te reo o Ihowa o to matou Atua, kihai i haere i ana ture i whakatakotoria e ia ki to matou aroaro, he mea mea mai na ana pononga, na nga poropiti.
- 11
- Kua poka ke ano hoki a Iharaira katoa i ta to ture, kua whakarerea e ratou, kihai i whakarongo ki tou reo; koia i ringitia ai te kanga ki runga ki a matou, me te oati ano i tuhituhia i roto i te ture a Mohi pononga a te Atua, kua hara hoki matou ki a ia.
- 12
- Na, kua whakapumautia nei e ia ana kupu i korerotia e ia mo matou, mo o matou kai whakarite whakawa i whakarite nei i o matou whakawa, he nui te kino kua kawea mai nei e ia ki runga ki a matou: i raro nei hoki i te rangi katoa kahore he rite mo te mea kua meatia nei ki Hiruharama.
- 13
- Ka rite ki te mea i tuhituhia ki te ture a Mohi, kua tae katoa mai tenei kino ki runga ki a matou: heoi kahore a matou inoi ki te aroaro o Ihowa o to matou Atua, mo matou kia tahuri atu i o matou kino, kia mātau hoki ki to pono.
- 14
- Na reira te kino i tirotirohia mai ai e Ihowa, a kawea mai ana e ia ki runga ki a matou, tika tonu hoki ta Ihowa ta to matou Atua i ana mahi katoa e mahia ana e ia: kihai nei hoki matou i whakarongo ki tona reo.
- 15
- I te mea nei hoki, e te Ariki, e to matou Atua, kua kawea mai nei e koe to iwi i te whenua o Ihipa, i runga i te ringa kaha, a ka mahia e koe he ingoa mou, koia ano tenei inaianei, hara ana matou, kino ana.
- 16
- E te Ariki, kia rite ki au mahi tika katoa; tena ra, kia tahuri atu to riri, to weriweri, i to pa, i Hiruharama, i to maunga tapu: he hara nei hoki no matou, he kino no o matou mātua i meinga ai a Hiruharama me to iwi hei ingoa kino ki te hunga katoa i tetahi taha o matou, i tetahi taha.
- 17
- Na, whakarongo mai aianei, e to matou Atua, ki te inoi a to pononga, ki ana tangi, kia mārama mai ano hoki tou mata ki to wahi tapu kua ururua nei, me whakaaro ki te Ariki.
- 18
- Kia anga mai, e toku Atua, to taringa, whakarongo hoki, titiro mai hoki o kanohi, kia kitea ai e koe o matou matenga, me te pa ano kua karangatia nei to ingoa ki reira: ehara hoki i te mea he tika no matou i tukua atu ai e matou a matou inoi ki tou aroaro, engari he nui no o mahi tohu.
- 19
- Whakarongo, e te Ariki; e te Ariki, murua te he; e te Ariki, whakarongo mai, e mahi, kaua e whakaroa, kia mahara ano ki a koe, e toku Atua, kua oti hoki to ingoa te karanga ki to pa, ki to iwi ano hoki.
- 20
- I a au ano e korero ana, e karakia ana, e whaki ana i toku hara, i te hara ano hoki o toku iwi o Iharaira, e tuku ana i taku inoi ki te aroaro o Ihowa o toku Atua mo te maunga tapu o toku Atua;
- 21
- I a au ano e korero ana, e karakia ana, na, ko Kapariera, ko te tangata i kitea e ahau i te whakakitenga i te timatanga tona rere he mea whakahohoro, kua pa mai ki a au i te wa o to te ahiahi whakahere.
- 22
- Na, ka whakaatu mai ia, a ka korero ki a au, ka mea, E Raniera, kua puta mai nei ahau kia mohio ai koe, kia mātau ai.
- 23
- I te timatanga o o inoi i puta mai te kupu, a kua tae mai ahau ki te whakaatu; e arohaina nuitia ana hoki koe, na, kia mohio koe ki te mea, whakaaroa ano hoki te mea i puta mai ra.
- 24
- E whitu tekau nga wiki kua oti te whakarite mo to iwi, mo to pa tapu hoki, e whakaotia ai te poka-ke, e whakamutua ai nga hara, e oti ai te whakamarietanga mo te kino, e kawea mai ai te tika e mau tonu ana, e hiritia ai te mea i puta mai ra, me te poropititanga, e whakawahia ai te Tapu-rawa.
- 25
- Na, kia mohio koe, kia mātau, e whitu nga wiki e ono tekau ma rua nga wiki o te putanga atu o te kupu mo Hiruharama kia whakahoutia, kia hangā, a tae noa ki te rangatira, ki a te Mihaia: ka hangā ano te waharoa me te taiepa, he raruraru ano hoki nga wa.
- 26
- A, ka taka nga wiki e ono tekau ma rua ka hatepea atu a te Mihaia, ehara ano ia i te mea mona ake; ka ngaro ano hoki i te iwi o te rangatira e haere mai te pa me te wahi tapu, he waipuke ano hoki to tona mutunga iho, kua takoto ano hoki te tikanga mo nga whakangaromanga, a taea noatia te mutunga o to whawhaitanga.
- 27
- Ka whakapumautia ano e ia te kawenata ki etahi, he tokomaha, kotahi ano te wiki: a i waenganui o te wiki ka whakamutua e ia te patunga tapu me te whakahere, a te horapatanga atu o nga mea whakarihariha, na, ka whakangaromia e ia, taea noatia te whakaotinga, kia ringitia ano hoki te mea kua oti te whakarite ki runga ki te mea kua oti te whakangaro.