Deuteronomy Chapter 18 - Paipera Tapu 1868 | Te Paipera Tapu 1868

Deuteronomy Chapter 18 - Paipera Tapu 1868

1
Kaua tetahi wahi, tetahi kāinga tupu ranei i roto i a Iharaira mo nga tohunga, mo nga Riwaiti, mo te iwi katoa ano hoki o Riwai: ko nga whakahere ahi a Ihowa, ko ona taonga ake hoki, hei kai ma ratou.
2
No reira i kore ai tetahi kāinga tupu mo ratou i waenganui i o ratou tuakana: ko Ihowa, ko ia to ratou taonga tupu, pera hoki me tana i korero ai ki a ratou.
3
A, ko te tikanga tenei mo nga mea a te iwi ma nga tohunga, a nga tangata hoki e patu ana i te patunga tapu, ahakoa kau, ahakoa hipi ranei; na, me homai e ratou ki te tohunga te peke, nga paparinga e rua, me te puku.
4
Ko nga hua matamua o to witi, o to waina, o to hinu hoki, me te huruhuru matamua o o hipi, me hoatu e koe ki a ia.
5
No te mea kua whiriwhiria ia e Ihowa e tou Atua i roto i o iwi katoa, kia tu hei minita i runga i te ingoa o Ihowa, a ia me ana tamariki i nga ra katoa.
6
A ki te haere mai tetahi Riwaiti i hea noa atu i a Iharaira, i tetahi o ou kuwaha i noho ai ia, a, ka tae mai me te hiahia nui ano o tona ngakau ki te wahi e whiriwhiria e Ihowa;
7
Na, me minita ia i runga i te ingoa o Ihowa o tona Atua, me pera me ona tuakana katoa me nga Riwaiti, e tu nei i reira i te aroaro o Ihowa.
8
Kia rite te wahi hei kai ma ratou, hāunga ano nga utu i a ia mo nga taonga o ona mātua.
9
E tae koe ki te whenua e homai ana e Ihowa e tou Atua ki a koe, kei ako koe ki te mahi i nga mea whakarihariha a ena iwi.
10
Kei kitea i roto i a koe tetahi tangata e mea ana i tana tamaiti, i tana tamahine ranei, kia haere i roto i te ahi, tetahi tohunga whakaaro ki nga tohu, e whakaaro ana ki nga kapua ranei, ki nga nakahi ranei, tetahi tohunga makutu ranei,
11
Tetahi tohunga whaiwhaia ranei, tetahi kai ui i te atua maori, tetahi tohunga maori ranei, tetahi kai ui tupapaku ranei.
12
No te mea e whakariharihangia ana e Ihowa nga tangata katoa e mea ana i ena mea: a, na aua mea whakarihariha a Ihowa tou Atua i pana ai i a ratou i tou aroaro.
13
Kia tino tika koe ki te aroaro o Ihowa o tou Atua.
14
He mea hoki ko enei iwi, ka riro mai nei i a koe, e whakarongo ana ki nga tohunga taima, ki nga tohunga maori: ko koe ia, e kore a Ihowa tou Atua e tuku i a koe kia pera.
15
Ma Ihowa ma tou Atua e whakaara ake he Poropiti mou i roto i a koe, no ou teina, rite tahi ki a au; ko ia ta koutou e whakarongo ai;
16
Hei whakaritenga mo nga mea katoa i inoi ai koe ki a Ihowa ki tou Atua i Horepa i te ra o te huihuinga, i mea ai, Kaua ahau e whakarongo atu ano ki te reo o Ihowa o toku Atua, kaua ano hoki ahau e titiro ano ki tenei ahi nui, kei mate ahau.
17
Na, ka mea mai a Ihowa ki a au, He mea pai ta ratou i korero ra.
18
Maku e whakaara ake he Poropiti mo ratou, i roto i o ratou teina, rite tahi ki a koe, a ka hoatu e ahau aku kupu ki roto ki tona waha; mana e korero atu ki a ratou nga mea katoa e ki atu ai ahau ki a ia.
19
Kei reira ano hoki, ko te tangata e kore e whakarongo ki aku kupu, e korero ai ia i runga i toku ingoa, maku e rapu he utu i a ia.
20
Tena, ko te poropiti, i hikaka nei te korero i runga i toku ingoa, i tetahi kupu kihai nei i kiia atu e ahau kia korerotia, nana ranei i korero i runga i te ingoa o nga atu ke, ina, ka mate taua poropiti.
21
A ki te mea koe i roto i tou ngakau, Ma te aha e mohio ai tatou ki te kupu kihai nei i korerotia e Ihowa?
22
Ki te korero tetahi poropiti i runga i te ingoa o Ihowa, a e kore e puta mai te mea, e kore hoki e tae mai, koia tena te mea kihai i korerotia e Ihowa, i korero hikaka tena poropiti: kaua koe e wehi i a ia.