- 1
- Ki te mea he tautohe ta etahi tangata, a ka haere mai kia whakariteritea, na, me whakarite ta raua whakawa: me whakatika ta te tika, me whakahe ta te he.
- 2
- Ki te mea hoki e meinga ana kia whiua te tangata kino, na, me mea ia e te kai whakariterite kia takoto, a kia whiua ki tona aroaro; kia rite ki tona kino, kia takoto te tikanga mo te maha.
- 3
- Ka wha tekau ana whakapānga atu ki a ia, kaua e whakamahā ake: he mea hoki kei whiu ano ia i a ia, a ka maha atu i enei nga whakapānga atu, na, ka iti tou teina ki tau titiro iho.
- 4
- Kaua e whakamokatia te kau ina takahia e ia te witi.
- 5
- Ki te noho tahi te teina me te tuakana, a ka mate tetahi o raua, a kahore ana tama, kaua te wahine a te tangata i mate e marenatia ki waho ki te tangata ke, me haere tona autane ki a ia, ka tango ai i a ia hei wahine mana, me mea ki a ia nga mea e tika ana ma te autane.
- 6
- A ka whanau tana matamua, ko ia hei whakarerenga iho mo te ingoa o tona tuakana, teina ranei i mate nei, a ka kore tona ingoa e horoia atu i roto i a Iharaira.
- 7
- Ki te kahore taua tangata e pai ki te tango i tona auwahine, katahi ka haere tona auwahine ki te kuwaha ki nga kaumatua, a ka mea, E kore e pai toku autane ki te whakatupu ingoa ake mo tona tuakana, teina ranei i roto i a Iharaira, e kore e meatia e ia nga mea e tika ana ma toku autane.
- 8
- Katahi ka karangatia ia e nga kaumatua o tona pa, a ka korero ratou ki a ia; a ki te u tonu tana, a ka mea ia, E kore ahau e pai ki te tango i a ia.
- 9
- Katahi ka whakatata mai tona auwahine ki a ia i te tirohanga a nga kaumatua, a ka unu i tona hu i tona waewae, ka tuwha hoki ki tona mata, a ka korero ake, ka mea, Kia peneitia te tangata e kore e hanga i te whare o tona tuakana, teina ranei.
- 10
- A ka karangatia tona ingoa i roto i a Iharaira, Ko te whare o te tangata i unuhia nei tona hu.
- 11
- Ki te whawhai etahi tangata ki a raua, a ka whakatata mai te wahine a tetahi, hei whakaora mo tana tahu i te tangata e patu ana i a ia, a ka toro mai tona ringa, ka mau hoki ki ona wahi ngaro;
- 12
- Na, tapahia atu tona ringa, kei tohu tou kanohi.
- 13
- Whakarerea atu i roto i to kete nga kohatu pauna e kore e rite, te mea nui, te mea iti.
- 14
- Whakarerea atu i roto i tou whare nga mehua e kore e rite, te mea nui, te mea iti.
- 15
- Kia rite, kia tika, tau kohatu pauna, kia rite, kia tika, tau mehua: kia whakaroaina ai ou ra ki runga ki te whenua e hoatu nei e Ihowa e tou Atua ki a koe.
- 16
- He mea whakarihariha hoki ki a Ihowa ki tou Atua te hunga katoa e pena ana te hunga katoa e he ana te mahi.
- 17
- Kia mahara ki ta Amareke i mea ai ki a koe i te ara, i to koutou putanga mai i Ihipa;
- 18
- Ki tona tutakitanga ki a koe ki te ara, a patua iho tou hiku e ia, nga mea kaha-kore katoa i muri i a koe, i a koe e hemo ana, e ngenge ana; a kihai i wehi ki te Atua.
- 19
- Mo reira, e meinga koe e Ihowa e tou Atua kia okioki i ou hoa riri, a, tawhio noa, ki te whenua e homai nei e Ihowa, e tou Atua ki a koe kia nohoia hei kāinga tupu, me horoi rawa atu e koe te maharatanga ki a Amareke i raro iho i te rangi; kei wareware koe.
Address: 
Phone: 
Email: