- 1
- A, tenei ake, i te wa e tae mai ai enei mea katoa ki a koe, te manaakitanga, me te kanga, i hoatu nei e ahau ki tou aroaro, a, ka mahara to hinengaro i roto i nga iwi katoa, e peia ai koe e Ihowa e tou Atua ki reira,
- 2
- A ka tahuri mai koe ki a Ihowa ki tou Atua, ka whakarongo hoki ki tona reo, ki nga mea katoa e whakahau atu nei ahau i tenei ra ki a koe, a koe, me o tamariki, i runga ano i tou ngakau katoa, i tou wairua katoa;
- 3
- Katahi a Ihowa tou Atua ka whakaputa ke i tou pārautanga, ka aroha mai ano ki a koe, ka tahuri mai hoki, ka kohikohi hoki i a koe i roto i nga iwi katoa, e whakamararatia atu ai koe e tou Atua ki reira.
- 4
- Ki te peia atu etahi o koutou, a, te pito ra ano o te rangi, ka kohikohi mai ano a Ihowa tou Atua i a koe i reira, ka tikina ano koe e ia i reira:
- 5
- A ka kawe mai ano a Ihowa tou Atua i a koe ki te whenua i nohoia e ou mātua, a ka nohoia ano a reira e koe; a, ka whakapai ia i a koe, ka mea hoki i a koe kia nui atu i ou mātua.
- 6
- A ka kokoti a Ihowa to Atua i tou ngakau, i te ngakau ano hoki o ou uri, kia aroha ai koe ki a Ihowa ki tou Atua, i runga i tou ngakau katoa, i runga ano hoki i tou wairua katoa, kia ora ai koe.
- 7
- A, ka tukua iho e Ihowa e tou Atua enei kanga katoa ki runga ki ou hoa riri, ki te hunga hoki e kino ana ki a koe, e whakatupukino na i a koe.
- 8
- Ko koe ia ka tahuri mai, ka whakarongo hoki ki te reo o Ihowa, ka mahi i ana whakahaunga katoa, e whakahau atu nei ahau i tenei ra ki a koe.
- 9
- A ka mea a Ihowa tou Atua kia maha, kia pai, nga mea mau, nga mahinga katoatanga a tou ringa, te hua o tou kopu, te hua hoki o au kararehe, te hua hoki o tou oneone: no te mea ka tahuri mai a Ihowa ka hari ki a koe, mo te pai, ka pera me ia i hari ki ou mātua:
- 10
- Ki te whakarongo koe ki te reo o Ihowa o tou Atua, ki te pupuri i ana whakahaunga, i ana tikanga, ka tuhituhia nei ki tenei pukapuka o te ture, ki te tahuri koe ki a Ihowa ki tou Atua i runga i tou ngakau katoa, i runga ano hoki i tou wairua katoa.
- 11
- Ta te mea, ehara tenei ture e whakahau atu nei ahau i tenei ra ki a koe, i te mea e ngaro ana i a koe, kei tawhiti atu ranei.
- 12
- Kahore i te rangi, e mea ai koe, Ko wai o tatou hei piki ki te rangi, ki te tiki atu i tena mea ma tatou, kia rongo ai, kia mahi ai tatou i tena mea?
- 13
- Kahore i tera taha o te moana, hei meatanga mau, Ko wai o tatou hei whakawhiti atu ki tera taha o te moana, ki te tiki i tena mea ki a tatou, kia rongo ai, kia mahi ai tatou i tena mea?
- 14
- Engari e tata rawa ana te kupu ki a koe, kei roto ano i tou waha, kei roto ano i tou ngakau, mo to mahi atu.
- 15
- Titiro, ka hoatu nei e ahau ki tou aroaro i tenei ra te ora me te pai, te mate me te kino;
- 16
- I a au e whakahau atu nei i a koe i tenei ra kia aroha ki a Ihowa ki tou Atua kia haere i ana huarahi, kia pupuri i ana whakahaunga, i ana tikanga, me ana whakariteritenga, kia ora ai koe, kia nui ai hoki: kia manaaki ai a Ihowa tou Atua i a koe ki te whenua e haere atu nei koe ki reira ki te tango.
- 17
- Otiia ki te tahuri ke tou ngakau, ki te kore koe e rongo, a ka akina atu koe ki te koropiko atu ki nga atua ke, kia mahi atu hoki ki a ratou;
- 18
- Maku e whakaatu atu ki a koutou i tenei ra, ka ngaro rawa koutou, e kore e roa o koutou ra ki runga ki te whenua, e whiti atu nei koe i Horano, e haere nei ki te tango.
- 19
- Ka waiho e ahau i tenei ra te rangi me te whenua hei kai titiro i a koutou, i te ora, i te mate, i te manaakitanga, i te kanga e tukua atu nei e ahau ki to koutou aroaro: na, manakohia te ora, kia ora ai koutou ko ou uri:
- 20
- Aroha atu ki a Ihowa ki tou Atua, whakarongo atu ki tona reo, piri atu hoki ki a ia: ta te mea ko ia te oranga mou, me te whakaroanga mo ou ra: kia noho ai koe ki runga ki te whenua i oati ai a Ihowa ki ou matua kia hoatu ki a ratou, ki a Aperahama, ki a Ihaka, ki a Hakopa.
Address: 
Phone: 
Email: