- 1
- Kia whai taringa mai, e nga rangi, ka korero atu ahau; whakarongo mai hoki, e te whenua, ki nga kupu a toku mangai.
- 2
- Ka patapata iho taku whakaakoranga, ano he ua, ka maturuturu iho taku kupu me te tomairangi, me te ua punehunehu ki runga i te tupu hou, me te ua ta ki runga i te tarutaru:
- 3
- No te mea ka kauwhautia atu e ahau te ingoa o Ihowa: waiho te nui i to tatou Atua.
- 4
- Ko te Kamaka ia, tika rawa tana mahi: he whakarite tikanga nei hoki ona huarahi katoa: he Atua pono, e kore hoki e he, tika tonu, tapatahi tonu ana whakaaro.
- 5
- Kua taka ratou; ehara to ratou koha i te koha no ana tamariki: he hapa, he parori ke to ratou whakatupuranga.
- 6
- Ko ta koutou utu ianei tenei ki a Ihowa, e te iwi kuware, e kore nei e mohio? ehara ianei ia i tou matua nana koe i hoko, nana koe i hanga, nana hoki koe i whakau?
- 7
- Maharatia nga rangi o mua, whakaarohia nga tau o tera whakapaparanga, o tera whakapaparanga: ui atu ki tou papa, a mana e whakaatu mai ki a koe; ki ou kaumatua, a ma ratou e korero mai ki a koe.
- 8
- I ta te Runga-rawa whakaritenga kāinga mo nga iwi, i tana wehewehenga i nga tamariki a Arama, i whakaturia e ia nga rohe mo nga iwi, me te whakaaro ano ki te tokomahatanga o nga tamariki a Iharaira.
- 9
- No te mea ko to Ihowa wahi ko tona iwi; ko Hakopa hoki te taura o tona kāinga.
- 10
- I tutaki ia ki a ia i te whenua koraha, i te ururua, i te wahi tuhea, i te hamamatanga mohoao, i whakaawhiowhio i a ia, i whakaako hoki i a ia, i tiaki i a ia, ano ko te whatupango o tona kanohi.
- 11
- Rite tahi ki te ekara e whakakorikori ana i tona ohanga, e whakapaho ana i runga i ana pi, e roharoha ana i ona parirau, e tango ana i a ratou, e waha ana hoki i a ratou i runga i ona parirau:
- 12
- Waihoki na Ihowa anake ia i arahi, kahore ano hoki tetahi atua ke atu hei hoa mona.
- 13
- Nana hoki ia i whakaeke ki runga ki nga wahi tiketike o te whenua, hei hoiho mona, a hei kai mana nga hua o nga mara; momimomi ana ia i te honi i roto i te kamaka, i te hinu hoki i roto i te kohatu kiripaka;
- 14
- I te pata o te kau, i te waiu o nga hipi, me te ngako hoki o nga reme, me nga hipi toa i whanau ki Pahana, me nga koati toa, me te taupa hoki i nga whatukuhu o te witi; a i inu ano koe i te waina, i te toto o te karepe.
- 15
- Nawai-a, ka whai kiko a Iehuruna, a whana mai ana: kua whai kiko koe, kua nui, kua kapi i te ngako; whakarerea iho e ia te Atua nana ia i hanga, whakahawea atu ana ia ki te Kamaka o tona whakaoranga.
- 16
- A na ratou i mea kia hae ia ki nga atua ke, whakapataritari ana ratou i a ia ki nga mea whakarihariha.
- 17
- He rewera, ehara i te Atua, mana a ratou patunga tapu, he atua kihai nei ratou i mohio, he mea puta hou ake nonaianei, kihai nei i wehingia e o koutou mātua.
- 18
- Ko te Kamaka i whanau ai koe, ka wareware i a koe, kahore hoki o mahara ki te Atua nana koe i hanga.
- 19
- A, te kitenga mai o Ihowa, na, anuanu ana ia ki a ratou, mo te whakapataritaringa hoki a ana tamariki, me ana tamahine.
- 20
- Na, ko tona meatanga mai, Ka huna ahau i toku kanohi i a ratou, ka tirohia atu e ahau he whakamutunga aha to ratou: he whakatupuranga parori ke hoki ratou, he tamariki kahore he pono i roto i a ratou.
- 21
- Na ratou au i mea kia hae ki nga mea ehara i te Atua; whakapataritaria ana ahau ki a ratou mea horihori: na, maku ratou e mea kia hae ki te hunga ehara i te iwi; maku ratou e whakapataritari ki te iwi poauau.
- 22
- Ta te mea ka ngiha te ahi i a au e riri ana, ka toro, a, aua noa iho ki te reinga, pau ake hoki te whenua, me ona hua, tahuna ana nga turanga o nga maunga.
- 23
- Ka opehia e ahau nga kino ki runga ki a ratou; ka whakapotoa atu aku pere ki a ratou.
- 24
- Ka hemo ratou i te mate-kai, ka pau hoki i te hana e wera ana, me te hunanga nui whakaharahara: maku ano hoki e tuku atu te niho o nga kararehe ki a ratou, me te huhare whakamate o nga mea e ngoki ana i te puehu.
- 25
- Ma te hoari i waho, ma te wehi ano i roto, e whakamate ngatahi te taitamariki me te taitamahine, te mea e ngote u ana raua ko te tangata hina.
- 26
- I mea ahau, Ka whakamarara atu ahau i a ratou ki nga kokonga, ka mutu i a au te maharatanga ki a ratou i roto i nga tangata:
- 27
- Me i kahore ahau te wehi i te ngakau kino o te hoa whawhai, kei poauau, ona hoa riri, kei mea ratou, Kua kake to tatou ringaringa, kahore ano hoki a Ihowa i mea i enei mea katoa.
- 28
- He iwi whakaaro-kore hoki ratou, kahore hoki he mohiotanga i roto i a ratou.
- 29
- E, me i tupato ratou, me i mohio ki tenei, me i whakaaro ki to ratou mutunga iho!
- 30
- Ina, kua whai te kotahi i te mano, whati ana nga mano tekau i te tokorua, me i kahore ratou i hokoa e to ratou Kamaka, i tukua atu hoki e Ihowa.
- 31
- Ta te mea, ehara to ratou kamaka i te penei me to tatou Kamaka, ki te titiro mai a o tatou hoa riri.
- 32
- No te mea, no te waina o Horoma a ratou waina, no nga mara hoki o Komora: ko a ratou karepe he karepe paoa, e kawa ana hoki a ratou tautau:
- 33
- Ko ta ratou waina ko te huhare whakamate o nga tarakona, me te huhare nanakia o nga ahipi.
- 34
- Kahore ianei tenei i rongoatia ki roto ki a au, i hiritia hoki ki roto i oku taonga?
- 35
- Maku nga utu e rapu, maku hoki e ea ai; kei tona taima ano ka paheke o ratou waewae: ta te mea e tata ana te ra e hunā ai ratou; a, e hohoro mai ana nga mea i whakaritea mo ratou.
- 36
- Ta te mea ka whakatikatika a Ihowa i ta tona iwi, ka aroha hoki ki ona pononga, ina kite ia kua riro to ratou kaha, kahore hoki he tangata i tutakina ki roto, i kapea atu ranei.
- 37
- A, ka mea mai ia, kei hea o ratou atua, te kamaka i okioki atu ai ratou,
- 38
- I kai nei i te ngako o o ratou patunga tapu, i inu hoki i te waina o a ratou ringihanga? kia whakatika mai ratou ki te whakaora i a koutou, kia ai hoki ratou hei kuhunga atu mo koutou.
- 39
- Na, titiro ko au, ina, ko au ia, a kahore atu i a au tetahi atua: maku e whakamate, maku hoki e whakaora; maku e tukituki, maku hoki e whakamahu: kahore hoki he tangata e ora ai tetahi i toku ringa.
- 40
- Ta te mea, ka torona atu taku ringa ki te rangi, me taku ki ano, E ora tonu ana ahau.
- 41
- Ki te whakakoia e au taku hoari kanapa, a ka mau toku ringa ki te whakariterite; ka whakahokia atu e au he utu ki oku hoa riri, ka ea hoki i a au ta te hunga e kino ana ki a au.
- 42
- Ka whakahaurangitia e ahau ki te toto aku pere, ka kai hoki taku hoari i te kikokiko; ki te toto o te hunga i patua, o te herehere, o nga mahunga o nga rangatira o te hoa riri.
- 43
- Kia hari tahi me tona iwi, e nga tauiwi: ta te mea hoki ka takitakina e ia te toto o ana pononga, a ka whakahokia mai e ia he utu ki ona hoa riri, ka marie ano hoki ki tona whenua, me tona iwi.
- 44
- Na, ka haere mai a Mohi, ka korero hoki i nga kupu katoa o tenei waiata ki nga taringa o te iwi, a ia, me Hohua tama a Nunu.
- 45
- A ka mutu i a Mohi te korero enei kupu katoa ki a Iharaira katoa:
- 46
- Na, ka mea ia ki a ratou, Kia anga mai o koutou ngakau ki nga kupu katoa e kauwhautia atu nei e ahau ki a koutou i tenei ra; mo ta koutou whakahau atu ki a koutou tamariki kia puritia, kia mahia, nga kupu katoa o tenei ture.
- 47
- Ta te mea, ehara tenei i te mea noa iho ki a koutou; ko to koutou oranga hoki ia: a ma tenei mea e roa ai o koutou ra ki runga ki te whenua, ka whiti atu nei koutou i Horano ki reira ki te tango.
- 48
- A i korero mai ano a Ihowa ki a Mohi i taua tino rangi ano, i mea,
- 49
- E piki koe i tenei maunga, i Aparimi, ki Maunga Nepo, i te whenua o Moapa, e anga atu ana ki Heriko; ka titiro atu ki te whenua o Kanaana, e hoatu nei e ahau ki nga tamariki a Iharaira, hei kāinga:
- 50
- A, e mate koe ki runga ki te maunga e piki atu na koe, kia kohia atu hoki ki tou iwi; kia peratia me Arona hoki, me to tuakana, i mate ki Maunga Horo, a kohia atu ana ki tona iwi:
- 51
- Mo korua hoki i hara ki a au i waenganui o nga tamariki a Iharaira i nga wai o Meripa i Karehe, i te koraha o Tini; mo korua kihai i whakatapu i a au i waenganui o nga tamariki a Iharaira.
- 52
- Rakoa ka titiro atu koe ki te whenua e takoto mai ana i tou aroaro; otiia e kore e tae atu ki reira, ki te whenua e hoatu ana e ahau mo nga tamariki a Iharaira.
Address: 
Phone: 
Email: