- 1
- Ma nga ngaro mate ka piro whakahouhou ai te hinu a te kai whakananu, ka pera ano te tangata kua ingoa-nuitia ona whakaaro me tona honore, ki te mea he wairangi tona, ahakoa iti.
- 2
- Kei tona ringa matau te ngakau o te tangata whakaaro nui; kei tona maui ia te ngakau o te wairangi.
- 3
- Ka haere ano hoki te wairangi i te ara, kahore ona mahara; e ki ake ana hoki ia ki te katoa he wairangi ia.
- 4
- Ki te ara ake te wairua o te rangatira, he riri ki a koe, kaua tou wahi e whakarerea; ka ai hoki te whakangawari hei whakamarie mo nga hara nui.
- 5
- Tenei tetahi kino i kitea e ahau i raro i te ra, e rite tonu ana ki te he i puta mai i te rangatira;
- 6
- Te wairangi e whakanohoia ana ki runga ki nga wahi tiketike rawa, a ko nga tangata taonga e noho ana i te wahi i raro.
- 7
- I kite ahau i nga kai mahi i runga i nga hoiho, a ko nga rangatira e haere ana, ano he kai mahi, i runga i te whenua.
- 8
- Te tangata e keri ana i te rua, ka taka ano ki roto; te tangata e wahi ana i te taiepa, ka ngaua ano ia e te nakahi.
- 9
- Te tangata e hapai atu ana i nga kohatu, ka mamae ano i reira; te tangata e tātā ana i te rakau, ka ora noa ano i reira.
- 10
- Ki te mea he puhuki te rino, a kahore e whakakoia e ia te mata, kia nui ake ano tona kaha; he pai ia nga whakaaro nui hei whakatikatika.
- 11
- He pono ka ngau te nakahi, ki te kahore e whakawaia, e kore ano hoki e hipa ake te arero kapetau.
- 12
- Ataahua tonu nga kupu a te mangai o te tangata whakaaro nui; te wairangi ia ka horomia ia e ona ngutu.
- 13
- Te timatanga o nga kupu a tona mangai he wairangi; te mutunga ano o tana korero, he haurangi, he hē.
- 14
- He maha ano hoki nga kupu a te wairangi: e kore te tangata e mohio ko te aha e puta mai a mua. Na, nga mea e puta mai i muri i a ia, ma wai ra e whakaatu ki ia?
- 15
- Hoha iho nga wairangi i tana mahi i tana mahi: e kore nei hoki ia e matau ki te haere ki te pa.
- 16
- Aue te mate mou, e te whenua he tamaiti nei tou kingi, a e kai ana o rangatira i te ata!
- 17
- Ka hari koe, e te whenua, he tamaiti nei no nga rangatira tou kingi, a e kai ana o rangatira i te wa e tika ai, hei mea whakakaha, ehara i te mea hei whakahaurangi.
- 18
- Ma te mangere ka pirau ai te whare; ma te ngoi-kore ano o nga ringa ka tuturu ai te whare.
- 19
- Hei mea mo te kata te hakari i tukua ai, he mea whakahari ano te waina; otiia, ka rite nga mea katoa i te hiriwa.
- 20
- I o whakaaro nei ano kaua e kangā te kingi; kaua hoki e kangā te tangata taonga i roto i tou whare moenga: no te mea ka kawea te reo e tetahi manu o te rangi, ka korerotia hoki taua mea e tetahi mea whai parirau.