Ecclesiastes Chapter 6 - Paipera Tapu 1868 | Te Paipera Tapu 1868

Ecclesiastes Chapter 6 - Paipera Tapu 1868

1
Tetahi he i kitea e ahau i raro i te ra, he mea nui ano i roto i nga tangata:
2
He tangata i homai nei e te Atua ki a ia nga taonga, nga rawa, he kororia, kihai ano hoki tona wairua i hapa ki tetahi mea i hiahia ai ia, heoi kihai i tukua mai e te Atua ki a ia te tikanga mo te kai i tetahi wahi o aua mea, no te mea hoki e kainga ana e te tangata ke. He mea horihori tenei, he mate kino.
3
Ki te mea ka kotahi rau nga tamariki a tetahi tangata, a he maha nga tau e ora ai ia, maha atu nga ra o ona tau, a kahore tona wairua i makona i te pai, kahore ano hoki ia e whai tanumanga, e mea ana ahau tera noa atu te pai o te mate-roto i tona.
4
I haere mai hoki ia i runga i te horihori, a haere atu ana i runga i te pouri, ka taupokina ano hoki tona ingoa e te pouri.
5
Kihai ano hoki ia i kite i te ra, kihai ano i mohio ki tetahi mea; nui atu to tenei okiokinga i to tera.
6
Ahakoa kotahi mano topu nga tau i ora ai ia, heoi kahore he pai i kitea e ia. He teka ianei e haere ana te katoa ki te wahi kotahi?
7
Nga mea katoa i mauiui ai te tangata, hei mea ano mo tona mangai; e kore ano hoki tona wairua e makona.
8
He aha hoki ta te tangata whakaaro nui e hira ake ana i ta te wairangi? He aha hoki ta te ware, e mohio nei ki te haere i te aroaro o te hunga ora?
9
Te tirohanga atu a te kanohi, pai atu i te hiahia haereere: he mea horihori ano hoki tenei, he pouritanga wairua.
10
To enei wa kua oti noa ake te hua ki te ingoa, e mohiotia ana ano hoki he tangata: e kore ano ia e tau hei totohe ki te mea e kaha atu ana i a ia.
11
Ka maha nei nga mea hei whakanui i te horihori, he aha te painga ki te tangata?
12
Ko wai hoki e mohio ana he aha te pai ki te tangata i a ia nei i te ora, i nga ra katoa o tona oranga horihori, e rite nei ki te atarangi i a ia e mahi nei? Ko wai hoki hei whakaatu ki te tangata ko te aha e puta mai i muri i a ia i raro i te ra?