- 1
- Na, ko nga ingoa enei o nga tamariki a Iharaira, i haere tahi atu me Hakopa ki Ihipa; i haere atu tenei tangata tenei tangata, me nga tangata ano o o ratou whare ake.
- 2
- Ko Reupena, ko Himeona, ko Riwai, ko Hura,
- 3
- Ko Ihakara, ko Hepuruna, ko Peniamine,
- 4
- Ko Rana, ko Napatari, ko Kara, ko Ahera.
- 5
- Na, nga wairua katoa i puta mai i roto i te hope o Hakopa, e whitu tekau wairua: i Ihipa hoki a Hohepa.
- 6
- A, ka mate a Hohepa, me ona tuakana katoa, me tena whakapaparanga katoa.
- 7
- A ka tupu nga tamariki a Iharaira, ka tini haere, ka hira rawa, ka kaha noa atu; a, kapi ana te whenua i a ratou.
- 8
- Na, ka poka ake he kingi hou mo Ihipa, kihai i mohio ki a Hohepa.
- 9
- A ka ki atu ia ki tona iwi, Nana, e hira ana, e kaha ana i a tatou te iwi o nga tamariki a Iharaira.
- 10
- Tena, kia tupato tatou i a ratou; kei tini haere, a tenei ake, ki te ara he pakanga, na, ka uru hoki ratou ki roto ki o tatou hoa riri, ka whawhai mai ki a tatou, a ka maunu atu i te whenua.
- 11
- Katahi ka whakakaritea e ratou nga rangatira akiaki mo ratou, hei whakawhiu mo ratou ki a ratou kawenga. A, hangā ana e ratou nga pa takotoranga taonga mo Parao, a Pitoma, a Raamahehe.
- 12
- Nawai-a, whakawhiu noa ratou i a ratou, e hua tonu mai ana, e tupu ana. A pawera ana ratou i nga tamariki a Iharaira.
- 13
- A nanakia noa iho te whakamahinga a nga Ihipiana i nga tamariki a Iharaira:
- 14
- A meatia ana e ratou kia kawa ake ratou ki te ora, i te mamahi, i te paru pokepoke, i te pereki, i nga mahi katoa o te mara: he nanakia rawa a ratou mahi katoa i whakamahia ai ratou.
- 15
- Katahi ka mea te kingi o Ihipa ki nga wahine whakawhanau i nga wahine a nga Hiperu; (te ingoa o tetahi ko Hipera, te ingoa hoki o tetahi ko Pua):
- 16
- I ki atu ia, E whakawhanau korua i nga wahine a nga Hiperu, a ka kite i a ratou i runga i nga kumete, ki te mea he tamaiti tane, whakamatea; na, he kotiro, kia ora tena.
- 17
- Otira i wehi nga kai whakawhanau ki te Atua, kihai hoki i mea i ta te kingi o Ihipa i mea ai ki a raua, a whakaorangia ana e raua nga tamariki tane.
- 18
- Na, ka karangatia nga kai whakawhanau e te kingi o Ihipa, a ka mea ki a raua, Na te aha tenei mahi a korua, i whakaora ai korua i nga tamariki tane?
- 19
- A ka mea atu nga kai whakawhanau ki a Parao, No te mea ra, ehara nga wahine a nga Hiperu i te pena me nga wahine a nga Ihipiana; e maia ana hoki ratou, kahore ano kia tae atu te kai whakawhanau ki a ratou kua whanau ke.
- 20
- Na, ka atawhai te Atua ki nga kai whakawhanau; a ka nui haere te iwi, a kaha rawa ana.
- 21
- A no te mea i wehi nga kai whakawhanau ki te Atua, ka hangā e ia he whare mo raua.
- 22
- Katahi ka ako atu a Parao ki tona iwi katoa, ka mea atu, Ko nga tamariki tane katoa e whanau mai, makā atu e koutou ki te awa, ko nga kotiro katoa ia, me whakaora.
Address: 
Phone: 
Email: