Exodus Chapter 19 - Paipera Tapu 1868 | Te Paipera Tapu 1868

Exodus Chapter 19 - Paipera Tapu 1868

1
No te toru o nga marama o te haerenga mai o nga tamariki a Iharaira i te whenua o Ihipa, no taua rangi ano, ka tae mai ratou ki te koraha o Hinai.
2
Kua riro mai hoki ratou i Repirimi, a haere mai ana ki te koraha o Hinai, a noho iho i te koraha; a noho ana a Iharaira ki reira, ki te ritenga atu o te maunga.
3
Na, ka piki atu a Mohi ki te Atua, a ka karanga mai a Ihowa ki a ia i te maunga, ka mea, Kia penei to korero ki te whare o Hakopa, to kauwhau hoki ki nga tamariki a Iharaira;
4
Kua kite koutou i nga mea i mea ai ahau ki nga Ihipiana, i a au hoki e waha ana i a koutou i runga i nga parirau ekara, e kawe mai ana hoki i a koutou ki a au.
5
Na, akuanei, ki te ata whakarongo koutou ki toku reo, ki te pupuri hoki i taku kawenata, ka waiho koutou hei taonga moku, nui atu i nga iwi katoa: i a au hoki te whenua katoa:
6
A ka waiho ano koutou e ahau hei kingi, hei tohunga, hei iwi tapu hoki. Ko nga kupu enei e korero ai koe ki nga tamariki a Iharaira.
7
A te haerenga iho a Mohi, na, ka karanga ia ki nga kaumatua o te iwi, a hoatu ana e ia ki to ratou aroaro enei kupu katoa i akona nei e Ihowa ki a ia.
8
Na, ka pa katoa te iwi ki te whakahoki mai, ka mea, Ka mahia e matou nga mea katoa i korerotia mai na e Ihowa. A kawea atu ana e Mohi nga kupu a te iwi ki a Ihowa.
9
Na, ka mea a Ihowa ki a Mohi, Nana, ka haere atu ahau ki a koe i roto i tetahi kapua matotoru, kia rongo ai te iwi, ua korero ahau ki a koe, kia whakapono ai hoki ratou ki a koe a mua tonu atu. A korerotia atu ana e Mohi nga kupu a te iwi ki a Ihowa.
10
Na, ka mea a Ihowa ki a Mohi, Haere atu ki te iwi, ka whakatapu hoki i a ratou akuanei, apopo, kia horoi hoki ratou i o ratou kakahu,
11
Kia takatu hoki koutou i te ra tuatoru; ta te mea, kei te ra tuatoru a Ihowa haere iho ai ki te aroaro o te iwi katoa, ki runga ki Maunga Hinai.
12
A whakatakotoria e koe he rohe mo te iwi, tawhio noa tawhio noa, ka mea atu, Kia mohio koutou kei piki ki te maunga, kei pa atu ranei ki tona taha: ko nga tangata katoa e pa atu ana ki te maunga, ina, me whakamate.
13
Kaua tetahi ringaringa e pa atu ki a ia, engari me aki ki te kohatu, me wero ranei ki te tao; ahakoa kararehe, ahakoa tangata, e kore e ora: ka kukume roa te tangi o te tetere, ka haere mai ai ratou ki te maunga.
14
A te haerenga iho a Mohi i te maunga ki te iwi, na, ka whakatapu ia i te iwi, a horoia ana e ratou o ratou kakahu.
15
A i mea ia ki te iwi, Kia takatu koutou i te toru o nga ra: kaua e whakatata atu ki a koutou wahine.
16
A ka taka ki te toru o nga ra, i te ata, na, ka puta mai nga whatitiri, me nga uira, me te kapua matotoru i runga i te maunga, me te tangi o te tetere, tona nui na! a wiri katoa ana te hunga i te puni.
17
Na, ka arahina atu te iwi e Mohi i te puni ki te whakatau i te Atua; a tu ana ratou ki raro iho i te maunga.
18
A he paowa kau Maunga Hinai, no te mea kua heke iho a Ihowa ki runga, i roto i te ahi; a kake ana tona paowa, ano he paowa oumu, a wiri pu te maunga katoa.
19
A i te mea ka nui haere rawa te tangi o te tetere, ka korero atu a Mohi, a ka korero a reo tangata mai te Atua ki a ia.
20
Na, ka heke iho a Ihowa ki runga ki Maunga Hinai, ki te tihi o te maunga: a karangatia iho ana a Mohi e Ihowa ki te tihi o te maunga; a piki atu ana a Mohi.
21
Na, ko te meatanga atu a Ihowa ki a Mohi, Heke atu, kauwhautia te iwi ra, kei wahi ake ratou ki a Ihowa, ki te matakitaki, a he tokomaha o ratou e hinga.
22
Ko nga tohunga hoki e whakatata mai ana ki a Ihowa, kia whakatapu i a ratou, kei auta atu a Ihowa ki a ratou.
23
A ka mea a Mohi ki a Ihowa, E kore e ahei i te iwi te piki mai ki maunga Hinai; nau hoki i kauwhau iho ki a matou, i mea, Taiepatia te maunga, whakatapua hoki.
24
Na, ko te meatanga mai a Ihowa ki a ia, Haere, heke atu; ka piki mai ano koe, korua tahi ko Arona: ko nga tohunga ia, me te iwi, kei wahi mai ratou, kei piki mai ki a Ihowa; kei auta atu ia ki a ratou.
25
A heke atu ana a Mohi ki te iwi, korero atu ana ki a ratou.