- 1
- A ko nga whakariteritenga enei e whakatakotoria e koe ki to ratou aroaro.
- 2
- Ki te hoko koe i tetahi pononga Hiperu, e ono nga tau e mahi ai ia; a i te whitu ka haere noa atu, kaua he utu.
- 3
- Ki te mea he takakau ia i tona haerenga mai, me haere atu ano he takakau: ki te mea he wahine tana, me haere tahi ano tana wahine i a ia.
- 4
- Ki te mea, na tona ariki te wahine i homai ki a ia, a ka whanau a raua tamariki, tamahine ranei; ma tona ariki te wahine, ratou ko ana tamariki, a ko ia anake e haere.
- 5
- A ki te ata mea mai te pononga, E aroha ana ahau ki toku Ariki, ki taku wahine, me aku tamariki; e kore ahau e haere noa atu:
- 6
- Na, me kawe ia e tona ariki ki nga kai whakariterite; me kawe hoki ia e ia ki te tatau, ki te pou ranei o te tatau; a ka okaia tona taringa e tona ariki ki tetahi oka; a ka oti mai ia hei kai mahi mana.
- 7
- Ki te hokona atu hoki e tetahi tangata tana tamahine hei pononga, e kore e rite tona haerenga mai ki waho ki te haerenga mai o nga pononga tane.
- 8
- Ki te kino ia ki te titiro iho a tona ariki, i taunaha nei i a ia mana, na me whakahoki mai ia mo tetahi utu: e kore e ahei te hoko i a ia ki tetahi iwi ke; mona hoki i tinihanga ki a ia.
- 9
- A ki te mea kua taunahatia ia e ia ma tana tamaiti, kia rite ki te tikanga ki nga tamahine tupu tana e mea ai ki a ia.
- 10
- Ki te tango ia i tetahi atu mana; kaua e whakaititia e ia te kai ma tera, te kakahu mona, me ta raua moe tahi.
- 11
- A ki te kahore enei mea e toru e meatia e ia ki a ia, na, me haere noa atu ia, kaua he moni.
- 12
- Ki te patu tetahi i te tangata kia mate, me tino whakamate ano ia.
- 13
- A ki te kahore tetahi e whanga atu, a ka mea te Atua kia tupono mai ki tona ringa; na, maku e whakarite ki a koe te wahi e rere ai ia.
- 14
- Tena ko tenei i pokanoa te tangata ki tona hoa, ki te kohuru tinihanga i a ia; me tango ia e koe i taku aata, kia mate ai ia.
- 15
- Me tino whakamate ano hoki te tangata e patu ana i tona papa, i tona whaea ranei.
- 16
- Te tangata hoki e tahae ana i tetahi tangata, a hokoa ana e ia, e kitea ana ranei ki tona ringa, me tino whakamate ano ia.
- 17
- Me tino whakamate ano hoki te tangata e kanga ana i tona papa, i tona whaea ranei.
- 18
- A ki te whawhai etahi tāngata ki a raua a ka akina tona hoa e tetahi ki te kohatu, ka motokia ranei, a kahore ia e mate, engari ka takoto i runga i te moenga;
- 19
- Ki te ara ake ia, a ka haereere ki waho me te toko i tana tokotoko, katahi ka kore te hara o te tangata i patua ai ia; otiia me utu e ia tona whakamangeretanga ki te mahi, me mea hoki kia ata rongoatia kia ora ai.
- 20
- Ki te patu hoki te tangata i tana pononga tane, i tana pononga wahine ranei, ki te rakau, a ka mate i raro iho i tona ringa; me ata takitaki tona matenga.
- 21
- Otiia ki te ora ia, a, kotahi, e rua ranei, nga ra, e kore e takitakina: no te mea ko tana moni ia.
- 22
- Ki te whawhai etahi tangata ki a ratou, a ka whara tetahi wahine e hapu ana, a ka mate-roto tana tamaiti, otiia kahore atu he hē, me tango he utu i a ia, ara ta te tahu o te wahine e whakarite mai ai ki a ia; hei ta nga kai whakarite whakawa e mea ai tana e homai ai.
- 23
- Ki te mate, na, me homai e koe he mate hei utu mo te mate,
- 24
- He kanohi mo te kanohi, he niho mo te niho, he ringaringa mo te ringaringa, he waewae mo te waewae,
- 25
- He wera mo te wera, he motu mo te motu, he karawarawa mo te karawarawa.
- 26
- Ki te patua e te tangata te kanohi o tana pononga tane, te kanohi ranei o tana pononga wahine, a ka matapotia; me tuku kia haere noa atu, hei utu mo tona kanohi.
- 27
- A ki te patua e ia kia marere te niho o tana pononga tane, te niho ranei o tana pononga wahine; me tuku kia haere noa atu, hei utu mo tona niho.
- 28
- Ki te werohia tetahi tangata, tetahi wahine ranei, e tetahi kau, a ka mate; me tino aki te kau ki te kohatu, kaua ano hoki ona kikokiko e kainga; a ka tukua noatia atu te rangatira o te kau.
- 29
- Otiia ki te mea he kau wero ia no mua, a ka whakaaturia mai ki tona rangatira, a kahore ia e tiaki i a ia, a ka mate i a ia tetahi tangata, tetahi wahine ranei; me aki te kau ki te kohatu, me whakamate ano hoki tona rangatira.
- 30
- Ki te whakaritea kia homai e ia he moni, me homai e ia hei utu mo tona oranga te mea i whakaritea mai ki a ia.
- 31
- Ki te mea he tamaiti, he kotiro ranei, i werohia e ia, kia rite ano ki tenei tikanga te meatanga ki a ia.
- 32
- Ki te wero te kau i tetahi pononga tane, i tetahi pononga wahine ranei; kia toru tekau nga hekere hiriwa e homai ki to raua ariki, me aki hoki te kau ki te kohatu.
- 33
- Ki te whakatuwhera hoki te tangata i tetahi poka, ki te keria ranei e te tangata tetahi poka, a e kore e hipokina e ia, a ka taka he kau, he kaihe ranei, ki roto;
- 34
- Me utu e te tangata nana te poka, me homai he moni e ia ki to raua ariki; a mana te mea mate.
- 35
- Ki te tukia te kau a tetahi tangata e te kau a tetahi, a ka mate; na, me hoko e raua te kau ora, ka wehe ai i ona utu; me wehe ano hoki e raua te mea kua mate.
- 36
- Otiia ki te mea i mohiotia he kau wero ia no mua, a kahore i tiakina e tona ariki, me utu mai e ia te kau ki te kau; a mana te mea mate.
Address: 
Phone: 
Email: