- 1
- A i korero ano a Ihowa ki a Mohi, i mea,
- 2
- Hei te ra tuatahi o te marama tuatahi koe whakaara ai i te tapenakara o te teneti o te whakaminenga.
- 3
- A me hoatu e koe ki roto te aaka o te whakaaturanga, ka hipoki atu ai i te aaka ki te arai.
- 4
- Me kawe ano e koe te tepara ki roto, ka ata whakatakoto ai i nga mea e whakatakotoria ana ki runga; me kawe ano e koe te turanga-rama ki roto, ka tahu ai i ona rama.
- 5
- Me whakatu ano e koe te aata koura mo te whakakakara ki mua o te aaka o te whakaaturanga, ka whakairi ai i te pa o te whatitoka ki te tapenakara.
- 6
- Me whakatu ano e koe te aata mo te tahunga tinana ki mua o te whatitoka o te tapenakara o te teneti o te whakaminenga.
- 7
- Me whakatu ano e koe te takotoranga wai ki te takiwa o te aata o te teneti o te whakaminenga, ka riringi ai i te wai ki roto.
- 8
- Me whakatu ano te marae, a tawhio noa, ka whakairi ai i te pa ki te kuwaha o te marae.
- 9
- Na, ka tango koe i te hinu whakawahi, ka whakawahi ai i te tapenakara, me nga mea katoa i roto, ka whakatapu hoki i taua mea, me ona oko katoa: a ka tapu.
- 10
- Me whakawahi ano e koe te aata mo te tahunga tinana, me ona oko katoa, ka whakatapu ano hoki i te aata: a ka meinga hei aata tino tapu.
- 11
- Me whakawahi ano e koe te takotoranga wai me tona turanga, me whakatapu hoki.
- 12
- Me kawe ano e koe a Arona ratou ko ana tama ki te whatitoka o te tapenakara o te whakaminenga, ka horoi ai i a ratou ki te wai.
- 13
- Ka whakakakahu atu ai i nga kakahu tapu ki a Arona, ka whakawahi ai i a ia, ka whakatapu ai i a ia: a ka waiho ia hei tohunga maku.
- 14
- Na, me kawe mai ana tama e koe, ka whakakakahu ai i nga koti ki a ratou:
- 15
- Ka whakawahi ai hoki i a ratou; kia rite ki tau whakawahinga i to ratou papa, a ka meinga ratou hei tohunga maku: a ka ai to ratou whakawahinga hei whakatohunga i a ratou, mo ake tonu atu, puta noa i o ratou whakatupuranga.
- 16
- I pera ano a Mohi: rite tonu tana i mea ai ki nga mea katoa i whakahaua mai e Ihowa ki a ia.
- 17
- Na, i te marama tuatahi o te rua o nga tau, i te ra tuatahi o te marama ka whakaarahia te tapenakara.
- 18
- Na Mohi hoki i whakaara te tapenakara, a whakatakotoria ana e ia ona turanga, whakaarahia ana hoki ona papa, kuhua ana hoki ona kaho, whakaarahia ana hoki ona pou.
- 19
- I hipokina iho ano hoki e ia te teneti ki runga i te tapenakara, a makā iho ana te hipoki o te teneti ki runga ake; i pera ano ia me ta Ihowa i whakahau ai ki a Mohi.
- 20
- Na, ka mau ia ki te whakaaturanga, a hoatu ana e ia ki roto ki te aaka, a kuhua ana nga amo ki te taha o te aaka, a taupokina iho ana te taupoki whakamarietanga ki runga ki te aaka:
- 21
- Na, ka maua e ia te aaka ki roto ki te tapenakara, a whakaarahia ake ana te arai hipoki, hei hipoki mo te aaka o te whakaaturanga; i pera ano ia me ta Ihowa i whakahau ai ki a Mohi.
- 22
- I whakaturia ano e ia te tepara ki te teneti o te whakaminenga, ki te taha whaka-te-nota o te tapenakara, ki waho mai o te arai.
- 23
- A whakararangitia ana e ia te taro ki runga, ki te aroaro o Ihowa; i pera ano me ta Ihowa i whakahau ai ki a Mohi.
- 24
- I whakaturia ano e ia te turanga-rama ki te teneti o te whakaminenga, ki te ritenga atu o te tepara, ki te taha whaka-te-tonga o te tapenakara.
- 25
- A tahuna ana e ia nga rama ki te aroaro o Ihowa; i pera ano me ta Ihowa i whakahau ai ki a Mohi.
- 26
- I whakaturia ano hoki e ia te aata koura ki te teneti o te whakaminenga ki mua atu o te arai:
- 27
- A tahuna ana e ia he whakakakara reka ki runga; i pera ano me ta Ihowa i whakahau ai ki a Mohi.
- 28
- I whakairihia ano hoki e ia te pa mo te whatitoka o te tapenakara.
- 29
- A i whakaturia e ia te aata mo te tahunga tinana ki te whatitoka o te tapenakara o te teneti o te whakaminenga, a whakaekea ana ki runga te tahunga tinana me te whakahere toto-kore; i pera ano me ta Ihowa i whakahau ai ki a Mohi.
- 30
- A i whakaturia e ia te takotoranga wai ki te takiwa o te aata o te teneti o te whakaminenga, a ringitia ana he wai ki roto hei horoi.
- 31
- A i horoia e Mohi, e Arona, ratou ko ana tama, o ratou ringaringa me o ratou waewae ki reira:
- 32
- I to ratou haerenga ki roto ki te teneti o te whakaminenga, i te mea ranei ka whakatata ki te aata, na, ka horoi ratou; i pera ano me ta Ihowa i whakahau ai ki a Mohi.
- 33
- I whakaturia ano hoki e ia te marae o te tapenakara, o te aata, a tawhio noa, a whakairihia ake ana te pa o te kuwaha o te marae. Na, ka oti te mahi i a Mohi.
- 34
- Katahi ka taupokina iho te teneti o te whakaminenga e te kapua, a ka ki te tapenakara i te kororia o Ihowa.
- 35
- A kihai i taea e Mohi te haere ki roto ki te teneti o te whakaminenga, no te mea e taungia iho ana e te kapua, a e ki ana te tapenakara i te kororia o Ihowa.
- 36
- A ka riro ake te kapua i runga i te tapenakara, na ka haere nga tamariki a Iharaira i o ratou haerenga katoatanga:
- 37
- A ki te mea kihai i riro ake te kapua, na, kihai ratou i haere, a taea noatia ra ano te ra i riro ai.
- 38
- I runga hoki i te tapenakara te kapua o Ihowa i te awatea, a he ahi kei runga i te po, i te tirohanga mai a te whare katoa o Iharaira, i o ratou haerenga katoatanga.
Address: 
Phone: 
Email: