- 1
- A muri iho, ka haere a Mohi raua ko Arona, a ka korero atu ki a Parao, Ko te kupu tenei a Ihowa a te Atua o Iharaira, Tukua mai toku iwi ki te taka hakari ki a au i te koraha.
- 2
- Na, ko te meatanga mai a Parao, Ko wai a Ihowa, kia rongo ahau ki tona reo, kia tukua atu a Iharaira? Kahore ahau e mohio ki a Ihowa, e kore ano hoki e tukua atu a Iharaira e ahau.
- 3
- A ka mea raua, Kua tutaki te Atua o nga Hiperu ki a matou: tena ra, tukua matou kia haere, kia toru nga ra e haere ana i te koraha, ka mea patunga tapu ai matou ki a Ihowa ki to matou Atua; kei torere mai ia ki a matou, na, ko matou, i te mate uruta ranei, i te hoari ranei.
- 4
- Na, ko te meatanga mai a te kingi o Ihipa ki a raua, He aha korua, e Mohi raua ko Arona, i whakaware ai i te iwi ki a ratou mahi? haere koutou ki a koutou kawenga.
- 5
- A i mea ano a Parao, Nana, ka tini nei nga tangata o te whenua, a na korua ratou i noho ai ki a ratou kawenga.
- 6
- Na, ka ako atu a Parao i taua ra ki nga kai akiaki o te iwi me o ratou rangatira, ka mea,
- 7
- Kaua e hoatu e koutou he tākakau ki te iwi a muri ake nei, hei hanga pereki, me o mua ra: me haere ratou ki te kohikohi tākakau ma ratou.
- 8
- Otiia, whakaritea ki a ratou: kia rite tonu nga pereki te maha ki era i hangā e ratou i mua ai; kaua e whakahokia iho te maha e koutou; e mangere ana hoki ratou koia ratou i karanga ai, i mea ai, Ka haere matou ki te mea patunga tapu ki to matou Atua.
- 9
- Whakanuia te mahi ma nga tangata ra, a ko tena hei mahi ma ratou; kaua hoki ratou e whakarongo ki nga kupu horihori.
- 10
- Na, ka haere atu nga kai akiaki o te iwi, me o ratou rangatira, ka korero ki te iwi, ka mea, Ko te kupu tenei a Parao, e kore e hoatu e ahau he tākakau ki a koutou.
- 11
- Haere koutou ki te kohikohi tākakau ma koutou i te wahi e kitea ai e koutou: otiia, kaua e whakahokia iho e koutou te maha o a koutou e mahi ai.
- 12
- Na, ka marara noa atu te iwi ki te whenua katoa o Ihipa, ki te kohikohi putake witi hei tākakau.
- 13
- A ka whakatatutatu atu nga kai akiaki, ka mea, Whakaotia a koutou mahi, to tenei rangi to tenei rangi, kia rite ki o te wa i whai tākakau ai.
- 14
- Na, ka whiua nga rangatira o nga tamariki a Iharaira, i whakaritea iho ra mo ratou e nga kai akiaki a Parao, mea mai ratou, He aha tē whakaotia ai e koutou inanahi, inaianei, a koutou pereki i whakaritea ra ki a koutou, tē pera ai me o mua ra?
- 15
- Na, ka haere mai nga rangatira o nga tamariki a Iharaira, me te tangi ano, ki a Parao, ka mea, He aha koe i penei ai ki o pononga?
- 16
- Kahore he tākakau i homai ki o pononga, a e mea ana ratou ki a matou, Hangā nga pereki: na, ka whiua o pononga; no o tangata ia te he.
- 17
- Na, ko tana meatanga mai, E mangere ana koutou, e mangere ana; no reira koutou ka mea ai, Ka haere matou ki te mea patunga tapu ki a Ihowa.
- 18
- Na, haere, e mahi; e kore hoki e hoatu he tākakau ki a koutou; otiia me homai ano e koutou nga pereki i whakaritea ra.
- 19
- Na, ka kite nga rangatira o nga tamariki a Iharaira i te kino mo ratou, i te kianga mai ra, Kaua e whakaokuokutia iho a koutou pereki o tenei ra o tenei ra.
- 20
- A ka tutaki ratou ki a Mohi raua ko Arona, e tu mai ana i mua i a ratou, i to ratou haerenga atu i a Parao:
- 21
- A ka mea ki a raua, Ma Ihowa e titiro iho ki a korua, e whakariterite hoki; na korua hoki matou i piro whakarihariha ai ki te aroaro o Parao, ki te aroaro hoki o ana pononga, na korua i hoatu he hoari ki o ratou ringaringa hei patu i a matou.
- 22
- Katahi ka hoki atu a Mohi ki a Ihowa, a ka mea atu, E te Ariki, he aha koe i whakahaere-kino ai ki tenei iwi? na te aha koe i unga ai i ahau?
- 23
- Na, no taku haerenga atu ki a Parao ki te korero i runga i tou ingoa, i kino ai ia ki tenei iwi; kahore ano hoki koe kia whakaora noa i tou iwi me he aha me he aha.
Address: 
Phone: 
Email: