Exodus Chapter 7 - Paipera Tapu 1868 | Te Paipera Tapu 1868

Exodus Chapter 7 - Paipera Tapu 1868

1
A ka mea mai a Ihowa ki a Mohi, Na, kua oti koe te mea e ahau hei atua ki a Parao; ko Arona hoki, ko tou tuakana, hei poropiti mou.
2
Korerotia atu e koe nga mea katoa e ki ai ahau ki a koe; a ma Arona ma tou tuakana e korero atu ki a Parao, kia tukua mai e ia nga tamariki a Iharaira i tona whenua.
3
A maku e whakapakeke te ngakau o Parao, e whakamaha hoki aku tohu me aku merekara ki te whenua o Ihipa.
4
Otiia e kore a Parao e rongo ki a korua, a ka pa toku ringa ki Ihipa, a he nui nga whakawakanga e whakaputaina mai ai e ahau aku mano tini, taku iwi, nga tamariki a Iharaira, i te whenua o Ihipa.
5
A e mohio nga Ihipiana ko Ihowa ahau, ina torona atu toku ringa ki Ihipa, ina whakaputaina mai e ahau nga tamariki a Iharaira i roto i a ratou.
6
A i mea ano a Mohi raua ko Arona i ta Ihowa i whakahau ai ki a raua, pera ana raua.
7
A e waru tekau nga tau o Mohi, e waru tekau ma toru nga tau o Arona, i ta raua korerotanga ki a Parao,
8
A i korero mai a Ihowa ki a Mohi raua ko Arona, i mea,
9
Ki te korero mai a Parao ki a korua, ki te mea mai, Tena koa, tetahi merekara i a korua; ko reira koe mea atu ai ki a Arona, Tangohia to tokotoko, makā iho ki te aroaro o Parao, a ka whakanakahitia.
10
Na, ka haere a Mohi raua ko Arona ki a Parao, a peratia ana e raua me ta Ihowa i mea mai ai: a makā iho ana e Arona tona tokotoko ki te aroaro o Parao, ki te aroaro hoki o ona tangata, a whakanakahi ana.
11
Na, ka karanga hoki a Parao i nga tangata mohio me nga tohunga maori: na, nga tohunga o Ihipa, i pera ano ratou ki a ratou nei karakia maori.
12
Makā iho ana hoki e ia tangata e ia tangata o ratou tokotoko, a whakanakahi ana: otiia horomia ana o ratou tokotoko e te tokotoko o Arona.
13
Na, ka whakapakeketia e ia te ngakau o Parao, a kihai ia i wkakarongo ki a raua; i rite tahi ano ki ta Ihowa i mea mai ai.
14
A i mea mai ano a Ihowa ki a Mohi, E pakeke ana te ngakau o Parao, e kore ia e whakaae ki te tuku mai i te iwi.
15
Haere ki a Parao i te ata; na, e haere ana ia ki te wai; a hei te pareparenga o te awa tu atu ai koe ki a ia; a ko te tokotoko i whakanakahitia ra maua atu i tou ringa.
16
A ka mea atu ki a ia, Na Ihowa, na te Atua o nga Hiperu, i unga mai au ki a koe; e mea ana ia, Tukua mai toku iwi kia mahi ki a au i te koraha: titiro hoki, kahore koe kia rongo, a mohoa noa nei.
17
E penei mai ana a Ihowa, ma konei e mohio ai koe ko Ihowa ahau: nana, maku e patu iho nga wai i te awa ki te tokotoko i toku ringaringa, a ka whakariroia ketia hei toto.
18
A e mate nga ika i roto i te awa, a e piro te awa; a e anuanu nga Ihipiana ki te inu i te wai o te awa.
19
A i korero mai a Ihowa ki a Mohi, Mea atu ki a Arona, Tangohia to tokotoko, torona atu hoki tou ringaringa ki runga i nga wai o Ihipa, ki runga i o ratou wai e rere ana, ki runga i o ratou awa, ki runga i o ratou roto, ki runga hoki i o ratou huihuinga wai katoa, kia meinga ai hei toto; a ka whai toto a roto i nga oko rakau, i nga oko kohatu, i te whenua katoa o Ihipa.
20
A peratia ana e Mohi raua ko Arona, me ta Ihowa i ako atu ai; a hapainga ana e ia te tokotoko, patua ana ki nga wai i roto i te awa, i te tirohanga a Parao, i te tirohanga ano hoki a ana tangata; a whakariroia ketia iho hei toto nga wai katoa i roto i te awa.
21
A mate ana nga ika i roto i te awa; a piro ana te awa, kihai hoki i ahei nga Ihipiana te inu i te wai o te awa: na, he toto tera puta noa i te whenua katoa o Ihipa.
22
A, peratia ana e nga tohunga o Ihipa ki a ratou whakananakia: a ka whakapakeketia te ngakau o Parao, kahore hoki ia i whakarongo ki a raua; i rite tonu ki ta Ihowa i korero ai.
23
Na, tahuri ana a Parao, haere ana ki roto ki tona whare, kihai ano hoki i whakaanga i tona ngakau ki tenei.
24
Na, ka keri nga Ihipiana katoa ki tetahi taha o te awa, ki tetahi taha, i te wai hei inu; kihai hoki i ahei te inu te wai o te awa.
25
Na kua rite nga ra e whitu, i muri iho i ta Ihowa patunga i te awa.