- 1
- I puta mai ano te kupu a Ihowa ki a au, i mea,
- 2
- E whakawa ranei koe, e te tama a te tangata, e whakawa ranei koe i te pa whakaheke toto? whakakitea ano ana mea whakarihariha katoa ki a ia.
- 3
- Mea atu hoki, Ko te kupu tenei a te Ariki a Ihowa, E whakahekea ana he toto e te pa i waenganui ona, he mea e tae mai ai te wa mona, e hangā ana ano e ia nga whakapakoko hei he mona, hei whakapoke ano i a ia.
- 4
- Kua he koe i o toto i whakahekea e koe, kua poke i o whakapakoko i hangā e koe, kua meinga ano e koe o ra kia tata, kua tae ano koe ki o tau: na reira koe i meinga ai e ahau hei tawainga ma nga tauiwi, hei taunutanga ma nga whenua katoa.
- 5
- Te hunga e tata ana, te hunga ano e matara atu ana i a koe, ka taunu ki a koe ki te ingoa poke, ki te mea raruraru nui.
- 6
- Nana, nga rangatira o Iharaira, puta ana nga uaua o tetahi, o tetahi, i roto i a koe ki te whakaheke toto.
- 7
- E whakahawea ana ratou ki te pāpā, ki te whaea, i roto i a koe, he mahi whakatupu kino ta ratou ki te tautangata i roto i a koe: e tukinotia ana e ratou te pani me te pouaru i roto i a koe:
- 8
- Aku mea tapu whakahaweatia iho e koe, aku hapati whakanoatia ana e koe.
- 9
- Kei roto i a koe nga tangata ngau tuara, he mea kia whakahekea ai he toto: i roto i a koe te kai ki runga ki nga maunga: i roto i a koe te mahi puremu.
- 10
- I roto i a koe te hura i to te pāpā e takoto tahanga ai: i roto i a koe te whakaiti i te wahine poke i motuhia atu.
- 11
- He mahi whakarihariha ano ta tetahi ki te wahine a tona hoa; ta tetahi whakapokea iho, puremutia iho tana hunaonga; ta tetahi i roto i a koe, he whakaiti i tona tuahine, i te tamahine a tona pāpā.
- 12
- I roto i a koe te tango i te utu whakapati e whakahekea ai he toto; kua tango koe i te moni whakatuputupu, i nga hua ano hoki, kua haoa mai ano e koe nga taonga a o hoa, he mea tukino, kua wareware ano koe ki a au, e ai ta te Ariki ta Ihowa.
- 13
- Nana, kua pakia e ahau toku ringa ki to hao taonga i hao ai koe, ki o toto ano kua heke na i waenganui i a koe.
- 14
- E u ranei to ngakau, e pakari ranei o ringa, i nga ra e mahi ai ahau ki a koe? Naku na Ihowa te kupu, maku ano e mahi.
- 15
- Ka whakamararatia atu ano koe e ahau ki roto ki nga tauiwi, ka titaritaria hoki koe ki nga whenua, a ka poto i a au to poke i roto i a koe.
- 16
- Ka whakanoatia ano hoki koe e koe ano i te tirohanga mai a nga iwi, a ka mohio koe ko Ihowa ahau.
- 17
- A i puta mai ano te kupu a Ihowa ki a au, i mea,
- 18
- E te tama a te tangata, ki a au, kua rite te whare o Iharaira ki te para: he parahi ratou katoa, he tine, he rino, he matā i waenga oumu; he para hiriwa ratou katoa.
- 19
- No reira tenei kupu a te Ariki a Ihowa; Na, he para nei koutou katoa, na, tenei ahau te kohikohi nei i a koutou ki waenganui o Hiruharama.
- 20
- Ka rite ki te kohikohinga o te hiriwa, o te parahi, o te rino, o te matā, o te tine ki waenganui o te oumu, puhia tonutia atu te ahi ki runga hei whakarewa; ka pena ano taku kohikohinga i a koe i runga i taku riri, i taku weriweri, ka waiho ano koutou e ahau ki reira, ka whakarewaina ano hoki koutou.
- 21
- Ina, ka whakaminea koutou e ahau, ka pupuhi atu ano ahau ki a koutou i runga i te ahi, ara, i taku riri, a ka rewa koutou i waenganui.
- 22
- Ka rite ki te whakarewanga o te hiriwa i roto i te oumu; ka pena ano to koutou whakarewanga i waenganui o taua oumu, a ka mohio koutou kua oti taku weriweri te riringi atu e ahau e Ihowa ki runga ki a koutou.
- 23
- A i puta mai ano te kupu a Ihowa ki a au, i mea,
- 24
- E te tama a te tangata, mea atu ki a ia, Ko koe te whenua kihai i purea, kihai ano i whai ua i te ra o te whakatakariri.
- 25
- E whakatakotoria ana he hē e ana poropiti i waenganui i a ia, koia ano kei te raiona mangai nui e haehae ana i te tupapaku; kua pau nga wairua i a ratou; kua riro i a ratou nga taonga me nga mea utu nui; kua whakatokomahatia e ratou ana pouaru i roto i a ia.
- 26
- Kua whakatakā e ana tohunga taku ture, whakanoatia ana e ratou aku mea tapu: kihai i wehea mai e ratou te tapu i te noa, kihai ano i whakakitea e ratou te wehenga o te poke, o te ma; o ratou kanohi hunā ake e ratou ki aku hapati, a whakapokea ana ahau i roto i a ratou.
- 27
- Ona rangatira i roto i a ia, rite tonu ki nga wuruhi e haehae ana i te tupapaku, he whakaheke toto, he whakangaro wairua, kia riro mai ai he taonga.
- 28
- Pania iho ano hoki ratou e ana poropiti ki te paru kihai i konatunatua; he moemoea horihori a ratou; he teka nga korero a aua tohunga tuāhu ki a ratou, i a ratou ka mea nei, Ko te kupu tenei a te Ariki a Ihowa, i te mea ano kihai a Ihowa, i korero.
- 29
- Te iwi o te whenua, ta ratou, he whakatupu-kino, he pahua, e tukinotia ana e ratou te ware raua ko te rawa-kore: e whakatupuria kinotia ana e ratou te tautangata i te mea kahore nei he take.
- 30
- I te rapu ano ahau i te tangata i roto i a ratou hei hanga i te taiepa, hei tu ki te wahi pakaru ki toku aroaro mo te whenua, hei mea kei whakangaromia: heoi kihai i kitea.
- 31
- Na, ringitia ana e ahau taku whakatakariri ki runga ki a ratou; whakapotoa atu ana ratou e ahau ki te ahi a taku riri: hoatu ana e ahau te utu o to ratou ara ki runga ki o ratou māhunga, e ai ta te Ariki ta Ihowa.
Address: 
Phone: 
Email: